طالبان پنجشیر اوستیدن نظارتنی قۉلگه کیریتگنیگه تۉرت ییلدن آشگن بۉلسه-ده، محلي منبعلر بو ولایتده حبسگه آلینگن اَیریم اهالینینگ هنوز بېدرَک یۉقالگنینی خبر قیلماقدهلر. اطلاعات روز گزیتهسینینگ تېکشیرولریگه کۉره، طالبان پنجشیرنی حربي یۉل بیلن اېگهلهگچ و بو ولایتگه کېنگ کۉلملی کوچلرینی یوبارگچ، یوزلب محلي اهالیلرنی مخالف جبههلر بیلن همکارلیک قیلیش یاکه اوّلگی حکومتگه علاقهدارلیک عیبلاوی بیلن حبسگه آلگن. اوشبو حبسگه آلینگنلر آرهسیدن کمیده اۉن کیشینینگ تقدیری حاضرگچه نامعلوم، و اولرنینگ عایلهلری طالباننینگ سکوتی و بېفرقلیگیدن شکایت قیلماقده.
محلي منبعلرنینگ خبر بېریشیچه، حبسگه آلینگنلردن تۉرتتهسینینگ اۉلیمی تصدیقلنگن، اما آلتی کیشی هنوز بېدرَک و اولر حقیده هېچ قندهی ایشانچلی معلومات یۉق. اوشبو شخصلر آرهسیده تۉرت سابق حکومت عسکری و آلتی عادي کیشی بار. بېدرَک یۉقالگنلرنینگ عایله اعضالری و یقینلری اطلاعات روز بیلن صحبتده ایتیشلریچه، تۉرت ییل اۉتگن بۉلیشیگه قرهمهی، اولر طالبانگه علاقهدار برچه ادارهلرده یقینلرینی قیدیریب کۉریشگن، بیراق هېچ قندهی جواب آلالمهگنلر. محلي طالبان مسووللری اېسه هر قندهی همکارلیکدن باش تارتگن.
طالبان نینگ پنجشیر ولایتیدهگی محلي رسميلری بو بارهده اطلاعات روز گزیتهسی بیلن صحبت بېریشدن باش تارتیشگن. گزیتهنینگ نتیجهلریگه کۉره، ایکّی سابق حربي و ایکّی کیشینینگ بېدرَک یۉقالگنیدن ایکّی ییل اۉتیب، اولرنینگ پنجشیرده اۉلدیریلگنی تصدیقلنگن. سید عالمنینگ اۉغلی حبیبالرحمان پنجشیر ولایتینینگ عنابه تومنیدهگی فراج قیشلاغیدن اېدی. او عنابه فوقالعاده شفاخانهسینینگ قۉریقچیسی بۉلگن و 1401-ییل عقرب آییده طالبان تامانیدن ایش جاییدن حبسگه آلینگن. میزا محمدنینگ اۉغلی مرتضی پنجشیر ولایتینینگ پریان تومنیدهگی کوجان قیشلاغیدن اېدی. او سابق حکومت اوردوسینینگ عسکری بۉلگن و 1401-ییل سرطان آییده طالبان کوچلری تامانیدن پریانده حبسگه آلینگن.
احمدجاننینگ اۉغلی نصرتالدین پریان تومنینینگ کهسار قیشلاغیدن اېدی. او هم سابق اوردو عسکری بۉلگن و 1401-ییل سرطان آییده اۉشه تومن حدودیده طالبان تامانیدن بېدرَک یۉقالگن. محمدمیرنینگ اۉغلی لالهمیر پنجشیر ولایتی نینگ عنابه اولسواللیگی تاواخ قیشلاغیدن اېدی. او مستقل ایش بیلن شغللنهدیگن کیشی بۉلگن و 1401-ییل سرطان آییده طالبان تامانیدن اۉشه منطقهده حبسگه آلینگن.
اوشبو تۉرت کیشینینگ اۉلدیریلگنی تصدیقلنگن، بیراق ینه آلتی کیشی جملهدن ایکّی سابق حربي و تۉرت عادي اهالی هنوز بېدرَک یۉقالگن و اولرنینگ تقدیری نامعلوملیگیچه قالماقده.
بو شخصلر طالبان پنجشیر ولایتینی اېگهلهگن ایلک کونلردن باشلب حبسگه آلینگن و حبسدن کېین بېدرَک یۉقالگن. اولرنینگ قرینداشلری و یقینلرینینگ ایتیشلریچه، طالبان حبسدن سۉنگ بو کیشیلرنینگ تقدیری حقیده هېچ قندهی معلومات بېرمهگن. گرچه عایلهلری کۉپ باره ایزلهگن و مراجعت قیلگن بۉلسه هم، حاضرگه قدَر اولر حقیده هېچ قندهی ایز تاپیلمهگن اولر تیریکمی یاکه اۉلدیریلگنمی، نامعلوملیگیچه قالماقده.اولر نینگ اسملری قوییدهگیچه.
عبدالحکیمنینگ اۉغلی جنرال عبدالودود پنجشیر ولایتینینگ مرکزیدهگی رحمانخیل قیشلاغیدن اېدی. او تقاعدده جنرال بۉلگن و 1400-ییل سنبله آیی نینگ 17-کونیده طالبان تامانیدن اۉز قیشلاغیده حبسگه آلینگن. جمالالدیننینگ اۉغلی کمالالدین نبیزاده پنجشیر ولایتی نینگ آبشار تومنیدهگی جهرعلی قیشلاغیدن اېدی. او سابق حکومت دوریده میدان وردک ولایتیدهگی جماعت خوفسیزلیگی نظم عامه کندکینینگ قوماندانی بۉلگن و 1401-ییل میزان آییده طالبان تامانیدن کابل شهریده حبسگه آلینگن. محمد فتاحنینگ اۉغلی شاکر پنجشیر ولایتینینگ مرکزیدهگی بازارک شهریدن اېدی. او مستقل ایش بیلن شغللنهدیگن اهالی بۉلگن و 1400-ییل سنبله آیی نینگ 16-کونیده طالبان کوچلری تامانیدن شتل تومنیده حبسگه آلینگن. شاهبچه نینگ اۉغلی شیرحمله پنجشیر ولایتینینگ عنابه تومنیدهگی فراج حدودیدن اېدی. او چاروادار (مال باقیش بیلن شغللنگن) بۉلگن و 1401-ییل ثور آییده طالبان تامانیدن اۉشه تومنده حبسگه آلینگن. محمد ملنگنینگ اۉغلی شاهپور پنجشیر ولایتی نینگ شتل اولسواللیگی جدید محلهسیده یشهگن. او ایشسیز اېدی و 1401-ییل جوزا آییده طالبان تامانیدن کابل شهرینینگ خیرخانه داوانیده حبسگه آلینگن. رحیم دل نینگ اوغلی سیدعبدالله پنجشیر ولایتی نینگ عنابه اولسواللیگی کرآبدره قیشلاغیدن اېدی. او چاروادار (مال باقیش بیلن شغللنگن) بۉلگن و 1401-ییل جوزا آییده طالبان تامانیدن اۉشه تومنده حبسگه آلینگن
اوشلش و یۉق قیلیشدن روایت
طالبان فقط، محمدمیرنینگ اۉغلی لالهمیرنینگ اۉلدیریلگنینی رسمي طرزده تصدیقلهگن. خبرلرگه کۉره، طالبان لوگر ولایتیدهگی بیر قبرستانده اونینگ قرینداشلریگه بیر قبرنی کۉرسهتیب، بو لاله میر نینگ قبری اېکنینی ایتگن. بیراق اونینگ قرینداشلری، طالبان اونینگ اۉلیمی حقیده هېچ قندهی ایشانچلی حجت یاکه دلیل تقدیم اېتمهگن دېدی. محلي منبعلر نینگ اطلاعات روزگه بېرگن معلوماتیگه کۉره، عنابه اولسواللیگینینگ تاواخ قیشلاغیده جایلشگن طالبان حربي بۉلیملری اصلیده میدان وردک ولایتیدن بۉلگن. عیناً شو کوچلر لالهمیرنی حبسگه آلیب، میدان وردککه آلیب کېتگن.
اما او او یېردن قچان لوگرگه اۉتکزیلگنی و قَیسی سنهده اۉلدیریلگنی حاضرچه نامعلوم. طالبان اېسه بو بارهده حلی هېچ قندهی ایضاح بېرمهگن.میرزامحمدنینگ اۉغلی مرتضی نینگ یقینلریدن بیری اطلاعات روزگه ایتیشیچه، مرتضی و اونینگ دۉستی نصرتالدیننینگ اۉلدیریلگنیگه عاید بېلگیلر تخمیناً بیر ییل اۉتگچ، پنجشیر رُخه تومنیده تاپیلگن.
او، مرتضی و نصرتالدین، ایلگری سابق حکومت عسکرلری بۉلگنلر، تیزیم اۉزگرگچ ایشسیز قالیشگن و پنجشیر ولایتیدهگی زمرد کانلریده ایشلشهیاتگن اېدی دېب ایتهدی. اولر کانلردن پستگه توشیب، اویگه قَیتهیاتگن پیتده، طالبان اولرنی موتردن توشیریب، سۉراقدن سۉنگ اۉزی بیلن آلیب کېتگن. شوندن کېین اولرنینگ قهیېرده سهقلنهیاتگنی و تقدیری حقیده هېچ قندهی معلومات بۉلمهگن، نهایت اولرنینگ ایکّلهسینینگ جسدی رُخه اولسواللیگینینگ پياوشت حدودیدهگی جرلیک آستیدن تاپیلگن.
اولرنینگ کییملریدن انیقلنگنکی، بو ایکّی کیشی عیناً مرتضی و نصرتالددین بۉلگن. منبع نینگ سۉزلریگه کۉره، طالبان بو ایکّی کیشینی بیر نېچه آی آلدین اۉلدیریب، جسدلرینی یېر آستیگه کۉمیب یشیریشگن، شونده قاتللیک ایزلری یۉقالهدی، دېب اۉیلشگن. اما محلي اهالینینگ سعی-حرکتلری بیلن اولرنینگ قبر جایی تاپیلیب، کییملری آرقهلی شخصیتی انیقلنگن. اونینگ قۉشمیچه قیلیشیچه، «مرتضی نینگ عایلهسی دېیرلی بیر ییل دوامیده طالبانگه عاید برچه ادارهلرگه مراجعت قیلدی، اما اونینگ تقدیری حقیده هېچ قندهی جواب آلیشمهدی.
نهایت، محليلر جسدلرنی تاپگچ، عایلهسیگه خبر بېریشدی. مرتضینینگ آنهسی اۉغلی غایب بۉلگنیدن بېری تون و کون ییغلردی، هېچ کیم اونی تینچلنتیره آلمهسدی. او هر دایم شوندهی دېر اېدی، «فقط بیلسم اېدی، مرتضی تیریکمی یا اۉلیک، یورهگیم تینچلنردی»
مرتضینینگ عایلهسی عادي، قیشلاق حیاتینی کېچیرهدی و بوتون تیریکچیلیگی دهقانچیلیکدن تأمینلنهدی.
اېندی اېسه مرتضی اولرنینگ آرهسیده یۉق، عایلهسی آغیر اقتصادي قیینچیلیکلرگه دوچ کېلگن، چونکه او اویده یگانه نان تاپووچی اېدی. حبیبالرحمننینگ قرینداشلریدن بیری، اسمینی آشکار اېتیشنی ایستهمهگن حالده، اطلاعات روز گزیتهسیگه شوندهی دېدی:
«او پنجشیر ولایتینینگ عنابه اولسواللیگی «ایمرجنسی» شفاخانهسیده قۉریقچی بۉلیب ایشلردی، اما طالبان اونی ایش جاییدن حبسگه آلدی. بیز بو طالبان جنگچیلرینینگ قرارگاهی قهیېرده اېکنینی بیلالمهدیک و اونی قهیېرگه آلیب کېتیشگنینی هم تاپه آلمهدیک.
طالباننینگ هر بیر بۉلینمهسی و ادارهسیگه باردیک، لېکن اونینگ ایزینی تاپالمهدیک. ولایت حاکمی و باشقه محلي طالبان مسووللریگه هم مراجعت قیلدیک، اما اولر فقط شوندهی دېییشردی: «او بیزده حبسده اېمس.» اونینگ کۉپهیتیریشیچه،
«تخمیناً ایکّی ییل اۉتگچ، منطقهیمیزدهگی طالبان حربي بۉلینمهسی حبیبالرحمننینگ کۉیلهگینی عایلهسیگه آلیب کېلدی و شوندهی دېدی: «حبیبالرحمن اۉلدیریلگن، او آبدره منطقهدهگی بیر مکتب آرتیده دفن اېتیلگن. سیز اېندی اونی ایزلهمنگ.» اونینگ سۉزلریگه کۉره، عایله طالباندن اونی نېگه اۉلدیریشگنینی سۉرهگنده، اولر هېچ قندهی انیق جواب بېرمهگن، فقط شوندهی دېییشگن:
«او تېرگاو پیتیده جان بېردی، سیز بو حقده هېچ کیمگه هېچ نرسه دېمهیسیز.»
او، «طالبان بو قاتللیکنینگ عیبدارلرینی هېچ قچان تېرگاو قیلمهدی و ایش بوتونلهی سکوت ایچیده یاپیلدی دېب تاکیدلهیدی. حبیبالرحمن اېلّیک یاشدن آشگن اېدی و طالباننینگ سیاسي یاکه حربي مخالف کوچلری بیلن هېچ قندهی علاقهسی یۉق اېدی.
طالبان اونی قندهی سبب بیلن آلیب کېتگنی و نیمه اوچون اۉلدیرگنی نامعلوم.» اونینگ ایتیشیچه، عایله تۉرت آی اۉتگچ حبیبالرحمن تیریک اېمسلیگیگه ایشانچ حاصل قیلگن. او، «سببی، طالبان عادي اهالیلرنی اوزاق وقت حبسده اوشلب تورمسدی؛
یاکه اولرنی اۉلدیرردی، یاکه قۉییب یوبارردی دیب تلگه آلهدی. بیز اۉیلردیکی، احتمال اونی اۉلدیریب، مسأله آشکار بۉلمسلیگی اوچون بیرار جایگه کۉمیب تشلشگن.» طالبان پنجشیر اوستیدن حاکمیتنی قۉلگه کیریتگن کوندن بېری حبسگه آلینگن کۉپلب آدملر نینگ یقینلری حلی هم اولر تیریکمی یاکه اۉلدیریلگنمی، دېگن خبرنینگ یۉلینی کوتیشماقده. جنرال عبدالودودنینگ قرینداشلریدن بیری اېسه، «اونینگ حبسگه آلینیشی و غایب بۉلیشی طالبان پنجشیرگه کیرگن دستلبکی کونلردهیاق صادر بۉلگن دېیه معلوم قیلدی.
اۉشنده طالبان بیلن «افغانستان ملي قرشیلیک جبههسی» کوچلری اۉرتهسیده جنگلر دوام اېتهیاتگن اېدی. اۉشه کونلرده کۉپچیلیک آدملر تاغلرگه چیقیب کېتگن، فقط بیر نېچته عایله اویلریده قالگن اېدی. طالبان یاووایی طرزده قیشلاقلر و اویلرگه اۉق اوزر، کۉرگن هر بیر کیشینی «مقاومتی» دېب اۉیلب، آتیب تشلردی.»
او بو تقاعد قیلگن جنرال عبدالودودنینگ یۉقالیشینی قوییدهگیچه حکایه قیلهدی. «بیز تاغده اېدیک. عبدالودود یاشی کتّه بۉلگنی اوچون، طالبان اونگه تېگمهیدی، اونی سابق حربي اېکنینی بیلیشمهیدی دېب اۉیلهگن اېدی. او تاغگه چیقه آلمهیدیگن بیر نېچه کېکسهلر اېرککلر و عیاللر بیلن قیشلاقده قالگن اېدی، اولرگه قرهشماقچی اېدی. اولرنینگ برچهسی بیرته اویده اېدیلر. طالبان قیشلاققه کیرگچ، اولرنی تاپدی. عبدالودودنی سۉراق قیلمسدن اوریب، عذابلشدی، قۉلینی باغلب، اۉزلری بیلن آلیب کېتیشدی. اۉشه کوندن بېری اونینگ تیریکمی اۉلیکمی هېچ قندهی خبر یۉق.» اونینگ قرینداشی: «بیر نېچه کوندن کېین وضعیت بیرآز تینچگچ، عایله اونی قهیېرگه آلیب کېتیشگنینی بیلیش اوچون همه جاینی قیدیردی، لېکن هېچ نرسه تاپه آلمهدی دېب کۉپهیتیرهدی. بیز حاکم و باشقه طالبان اعضالری آلدیگه باردیک اۉشنده اولرنینگ کۉپی پنجشیرلیک محليلر اېدی لېکن هېچ بیری هېچ نرسه بیلمسدی.» اونینگ سۉزلریگه کۉره، جنرال عبدالودودنینگ عایلهسی ایکّی ییل دوامیده او حقده معلومات تاپیشگه اورینیب کۉرگن، اما طالبان قماقخانهلری ایچیده هم اونی تیریک تاپه آلیشمهگن. او، «ایکّی ییلدن سۉنگ ایزلشنی تۉختهتدیک امید قالمهگندی.» دېدی. یۉقالگنلرنینگ عایلهلری اېسه شوندهی، «بیز ایشانهمیزکی، یقینلریمیز اېندی تیریک اېمسلر، لېکن یورهگیمیز تینچ اېمس. دېب تیلگه آلدی. بیز فقط، اگر اولر اۉلدیریلگن بۉلسهلر، رسماً اۉلیملری تصدیقلنسین، تاکه بو بېخبر و آغریقلی کوتیشدن قوتولیشنی ایستهیمیز دیدی.
