اۉزبېکستان دولت خوفسیزلیک خدمتی سمرقندده بالهلرگه «ناقانوني» دیني تعلیم بېرگنی اوچون بیر کیشینینگ حبسگه آلینگنی حقیده خبر بېردی و عایلهلرگه فرزندلرینی یېترلیچه دیني بیلیمگه اېگه بۉلمهگن شخصلرگه تاپشیرمسلیکنی سۉرهدی؛ چونکه بوندهی حرکت جدّي عاقبتلرگه آلیب کېلیشی ممکن.
خدمتنینگ بیاناتیده ایتیلیشیچه، حبسگه آلینگن شخص فرغانه ولایتینینگ تاشلوک تومنیده یشهگن و سمرقندنینگ اورگوت تومنیگه قرهشلی «دۉستلیک» محلهسیده اوی اجارهگه آلیب، بیر «حجره» تشکیل قیلگن.
دولت خوفسیزلیک خدمتی معلوماتیگه کۉره، تېرگاو دوامیده انیقلنیشیچه، بو شخص مخصوص دیني تعلیمگه اېگه بۉلمهگن و تېگیشلی رخصتنامهسی بۉلمهگن، شونینگدېک، مادّي فایده عوضیگه 12–15 یاشدهگی یېتّی بالهگه دیني تعلیم بېرگن.
خدمت نینگ ایتیشیچه، حاضرده حبسگه آلینگنگه نسبتاً دیني تعلیم ترتیبینی بوزیش عیبلاوی بیلن جنایت ایشی آچیلگن و تېرگاو حرکتلری دوام اېتماقده.
اۉزبېکستان دولت خوفسیزلیک خدمتی عایلهلرگه مراجعت قیلیب، «فرزندلرینگیزنی یېترلیچه دیني بیلیمگه اېگه بۉلمهگن شخصلرگه تاپشیریب، اولرنی شبهه و خواطرگه سالمنگ. بوندهی حرکتلر کېلهجکده جدّي عاقبتلرگه آلیب کېلیشی ممکن» دېب آگاهلنتیردی.
اوشبو چاره اۉزبېکستاننینگ دیني تعلیم اوستیدن قطعي نظارت اۉرنهتگنینی و اېکسترېمیزم نینگ آلدینی آلیشگه قرهتیلگنینی کۉرسهتهدی.
رادیکال گروهلرنینگ، جملهدن، اۉزبېکستان اسلامي حرکتی فعالیتی دایما اۉزبېکستان حکومتی اوچون تشویش منبعی بۉلگن. اوشبو گروه ییللر دوامیده افغانستانده فعالیت یوریتگن.
2020 ییلده افغانستان مدافعه وزیرلیگی اۉزبېکستان اسلامي حرکتی رهبرلریدن بیری عبدالعزیز یولداشنینگ فاریاب ولایتی نینگ غورماچ اولسواللیگیده اۉلدیریلگنی حقیده خبر بېرگن.
سۉنگگی ییللرده اوشبو گروه افغانستانده ضعیفلشگن ایتیلیشیچه، اۉزبېکستان اسلامي حرکتینینگ بیر قِسمی افغانستانده داعش فعالیتی دوامیده بو گروهگه قۉشیلگن و کېینچهلیک باستیریلگن.
شونینگدېک، گروهنینگ باشقه قِسمی طالبانگه بیعت قیلگن و اولر اۉزبېکستانلیک جنگچیلرنی نظارت قیلگن.
حاضرده اۉزبېکستان حکومتی طالبان بیلن یقین علاقهلرگه اېگه و افغانستاندن اۉزبېکستانگه اېکسترېمیستلرنینگ کیریشینی آلدینی آلیش تاشکېنت و کابل مناسبتلرینینگ ایلیقلیگیگه سببلردن بیری حسابلنهدی.
طالبان حاکمیتگه کېلیشیدن آلدین اۉزبېکستان حکومتی بیلن اوشبو گروه علاقهده بۉلگن. حاضرگی کونده طالبان مأموریتیده باش وزیرنینگ بیر نفر اۉرینباسری اۉزبېک ملتیدن.
