کمیده اوچ آی بۉلدیکی، ۱۵یاشر مریم (مستعار)نی تخمیناً ۶۰یاشلردهگی بیر اېرکککه مجبورن اویلنتیریشگن. مریم مخدرماده سببلی قرضگه باتگن بیر آدم نینگ قیزی بۉلیب، آتهسی اونی ۴۰ مینگ افغاني پول عوضیگه دۉستلریدن بیریگه نکاحلب بېرگن. مریم حاضر قرینداشلریدن بیرینینگ اوییگه پناه تاپگن و حیات حکایهسینی اطلاعات روز گزېتهسیگه قوییدهگیچه بیان قیلگن. او شوندهی دېیدی: «هر مرته آتهمگه مېن بو قری آدمگه تورموشگه چیقمهیمن دېسم، مېنی قتّيق کلتکلردی. مېنی اۉزینینگ تېنگداشی بۉلگن اېرکککه بېردی. آتهم بیر نېچه روپیه گیاهوندلیک پولیگه دېب مېنینگ حیاتیمنی برباد قیلدی.»
مریم، جوزجان ولایتینینگ آلیس قیشلاقلریدن بیریده یشهیدی. اونینگ ایتیشیچه، جمهوریت تیزیمی قولهگنیدن کېین آتهسی بیر خصوصي ادارهده هیداوچیسی بۉلیب، آییگه ۲۰ مینگ افغاني درآمد آلگن، ایشسیز قالگن. آتهسی جمهوریت دوریده دارو-تابلتلرنی استعمال قیلردی، اما حکومت قولهگنیدن سۉنگ، ایشسیزلیک سبب هروئین ایشلهتیشگه اۉتگن.
او شوندهی دېیدی: «آتهم نینگ ایشدن بۉشهگنیگه فقط ایکّی آی اۉتگن اېدی، او تابلتلر اۉرنیگه باشقه بیر توردهگی مادّه ایشلهته باشلهدی. هر کونی بیر خیل آق مادّه آلیب کېلیب، چېکردی. اوّللری نیمه اېکنینی بیلمسدیم، لېکن کېینراق توشوندیمکی، پودر چېکرکن.»
مریم نینگ ایتیشیچه، آتهسی اوییدهگی قیمتبها بویوملرنی ساتگندن کېین، گیاهوندلیک اوچون پول تاپیش مقصدیده دۉستلریدن، قرینداش-اوروغ و تنیشلریدن قرض آله باشلهگن. اونینگ قرضلری استه-سېکین کۉپهییب، ۴۰مینگ افغانيگه یېتگن. قرض بېرگنلردن بیری تینیمسیز باسیم اۉتکزه باشلهگچ، آتهسی قیزینی بو کېکسه اېرککگه بېریش اوچون قرار آلهدی.
مریم ایتهدی: «آتهم مېنینگ «بهاییم»نی ۴۰مینگ افغاني قیلیب بېلگیلهگن اېدی. مېنگه ساوچی بۉلگن کیشی اوّلیگه اتیگی ۲۵مینگ افغاني بېرگن، قالگنینی اېسه تۉلهی آلمهگن. ساوچیلیک بېکار بۉلیش عرفهسیگه کېلگن، اما آتهم اۉشه ۲۵مینگنی قَیتریب بېره آلمهدی، چونکه پول نینگ همهسینی گیاهوندلیک اوچون ایشلهتیب یوبارگن اېدی. شو سببدن، نکاح عملگه آشدی.»
مریم نینگ ایتیشیچه، اونینگ هېچ قندهی حاميسی یۉق. آنهسی بیر نېچه ییل اوّل وفات اېتگن، اوکهلری اېسه اوندن یاش بۉلگنی اوچون آتهسی نینگ قراریگه قرشی اونی حمایه قیله آلمهگن.
اونینگ ایتیشیچه، تۉیگه قدَر بیر نېچه بار آتهسیگه قرشی چیقیب ناراضیلیک بیلدیرگن، اما بو ناراضیلیکلر فقط کۉپراق کلتک یېییشیگه سبب بۉلگن: «کۉپ مرته قرشیلیک قیلدیم. ییغلب، یالواردیم و دېدیمکی، آتم بیلن تېنگداش بیر اېرکککه تورموشگه چیقیشنی خواهلهمهیمن. اما هېچ فایده بېرمهدی. ینه هم کۉپراق کلتکلندیم و آتم مېنی باشقه بیراونی یخشی کۉرهسن دېب عیبلردی. مجبور بۉلیب جیم قالدیم.»
مریم ، او نکاحدن آلدین اویدن قاچماقچی بۉلگن، اما بارهدیگن جایی بۉلمهگنینی ایتهدی. «قنچهلیک حرکت قیلسم هم، موفق بۉلالمهدیم. بیر نېچه بار قاچماقچی بۉلدیم، لېکن یاش اېدیم، هېچ قهیېرنی بیلمسدیم. قاچسم قهیېرگه بارردیم؟ توشونمهدیم. شو سبب قاچالمهدیم. کاشکی آنم تیریک بۉلگنیده، بو ایشلر بونهقه بۉلمسدی.»
مریمنینگ تۉیی اونینگ اېری حویلیسیده اۉتکزیلگن کیچیک بیر مراسم بۉلگن. مریم او اېرنینگ اوییگه قدم قۉیگن ایلک کوندن باشلب حیاتی اۉزگرگنینی تیلگه آلهدی. اېری و اونینگ بیرینچی خاتینی دایما اونگه مسخره قیلگن، کمسیتووچی نظر بیلن قرهشگن. اېری اوّلگی تورموشیدن آلتی فرزندگه هم اېگه.
او شوندهی حکایه قیلهدی: «بیرینچی کېچهدن باشلب مېنی اوریب-سوره باشلهدی و حقارت قیلدی. مېن اېر-خاتین حیاتیدن عموماً هېچ نرسه توشونمسدیم. او مېنگه زۉرلیک بیلن یقینلشدی، مېنی اوردی و دېدی: سېنی مېنگه تېکین بېرمهگنلر. مېن سېنی ساتیب آلگنمن.»
مریمنینگ ایتیشیچه، او اېرنینگ اوییده بیر نېچه بار اېری تامانیدن، شونینگدېک، اونینگ بیرینچی خاتینی تامانیدن دۉپپاسلنگن:
«هر سفر اېریم و اونینگ خاتینی مېنگه پهدینگ سېنی ساتگن، سېنینگ هېچ قیمتینگ یۉق دېب مسخره قیلیشهدی. حتا یېترلی نان هم بېریشمهیدی. اېریم نینگ اوییده مېن طعنه، کلتکلهنیشدن باشقه نرسه کۉرمهیمن.»
اونینگ ایتیشیچه، او آتهسینینگ بیرینچی قربانی اېمس. ایکّی ییل اوّل آتهسی اوندن اتیگی بیر یاش کتّه بۉلگن آپهسینی هم اۉزیدن 20 یاش کتّه بیر اېرکککه مجبورن تورموشگه بېرگن. «آتم هېچ قچان بیزنی اۉزی نینگ قیزلری، فرزندلری دېب اۉیلهمهگن. قچان پولگه محتاج بۉلسه، بیزنی گۉیاکه ساتیلهدیگن بویومدېک کۉرگن. اوّل آپهمنی ساتدی، کېین اېسه مېنی. آپم تورموشگه چیققن کوندن بېری بیر-بیریمیزنی کۉرمهدیک. خدا بیلهدی، او هم مېن کبی قندهی آغیر شرایطده یشه یاتگندیر.»
مریم بېشینچی صنفگچه اۉقیگنینی ایتهدی، آتهسی نینگ گیاهوند بۉلیشی سبب آپه-سینگیلی نینگ تۉییدن کېین او مکتبگه باریشدن هم محروم بۉلگن:
«آپهمنی ساتیب، مجبورن تورموشگه بېرگنیدن کېین، مېنی مکتبگه قۉیمهدی و اوی ایشلرینی قیلیشیم کېرهک دېدی. جوده آرزو قیلردیمکی، بیر کون مکتبنی توگهتیب، دوکتور بۉلهی. هېچ بۉلمهگنده آلتینچی صنفنی توگهتردیم. اما آتم نینگ گیاهوندلیگی سبب نه اۉقیشیم توگهدی، نه حیاتیم قالیب کېتدی.»
مریم «بعضاً آرزو قیلهمن، کاشکی هېچ توغیلمهگنیمده. مېنینگ تېنگداش قیزلریم اۉیین اۉینهب، اۉقیشده بند، مېن اېسه بوندهی تقدیرگه دوچ کېلدیم. بو یاشده یششدن چرچهدیم. خدا جانیمنی آلسه، بو حیاتدن قوتولردیم دېب دعا قیلهمن دېب نالیدی.»
