پاکستان اوردوسی، افغانستان چېگرهسیگه یقین جایلشگن خیبرپختونخوا ایالتینینگ کرم اولسواللیگیده جنگریلر بیلن تۉقنهشووده آلتی نفر عسکر هلاک بۉلگنینی تصدیقلهدی.
پاکستان اوردوسینینگ اظهاراتیگه کۉره، کرم اولسواللیگینینگ دوگر منطقهسیده پاکستان طالبانی (تیتیپی) اعضالری بارلیگی حقیده معلومات آلینگچ، خوفسیزلیک کوچلری مخصوص استخباراتی عملیاتی اۉتکزگن.
عملیات دوامیده «هندستان تامانیدن قۉللب-قوّتلنهیاتگن یېتّی نفر خارجي جنگری» اۉلدیریلگن دیدی اردو.
اردوگه کۉره، کوچلی اۉت المشووی چاغیده بیر ضابط و اونینگ بېش عسکری هلاک بۉلگن.
پاکستان اوردوسینینگ بیلدیریشیچه، «هندستان تامانیدن قۉللب-قوّتلنهیاتگن خارجي جنگریلرنی» بوتکول یۉق قیلیش اوچون تازهلش عملیاتی دوام اېتماقده.
پاکستان حکومتی تحرک طالبن پاکستان (تیتیپی) گروهینی «خارجي» و «هندیستاننینگ واسطهچیلری» دېب اتهیدی.
اسلامآبادنینگ فکریچه، پاکستان طالبانی حاضرده افغانستانده جایلشگن بۉلیب، او یېردن پاکستانگه قرشی هجوملر اویوشتیرماقده.
پاکستان حکومتی بیر نېچه بار افغانستان طالبانیدن تیتیپیگه قرشی چاره کۉریشنی سۉرهگن، بیراق طالبان افغانستان حدودیده پاکستانلیک جنگریلرنینگ بارلیگینی انکار اېتهدی.
پاکستان تیتیپی جنگریلرینی نشانگه آلیش مقصدیده افغانستان حدودیگه بیر نېچه بار هوا هجوملری اویوشتیرگن. سۉنگّی هوا هجوملری پاکستان حربيلری بیلن طالبان اۉرتهسیده بیر هفتهلیک تۉقنهشوولرگه سبب بۉلگن.
قطر و تورکيه واسطهچیلیگیده دوحهده اۉتکزیلگن مذاکرهلرده تامانلر اۉت آچیشنی تۉختهتیش تۉغریسیده کېلیشووگه اېریشگن، بیراق کېینگی مذاکرهلر حاضرچه باشی بېرک کۉچهگه کیرگن.
