خالدمحمدی
بیر آی آلدین طالبان رهبری ملا هبتالله آخوندزاده و حقّاني ترماغی رهبری سِراجالدین حقّاني مملکت جَنوبیدهگی هلمند ولایتیگه سفر قیلیب، کجکی و گریشک اولسواللیکلریگه تشریف بویورگن اېدی. طالبان بو تشریفنی «اتفاق و بیرلیک» رمزی صفتیده تعریفلهگن، اما طالبان رهبری نینگ لشکرگاه کریکت استدیونی بۉییچه ینگی قراری ایکّی قنات اۉرتهسیدهگی قرهشلر و اوستوارلیکلر فرقی هنوز سهقلنیب قالهیاتگنینی کۉرستماقده. طالبان رهبری نینگ بویروغیگه بناءً، لشکرگاهدهگی کریکت استدیونی عیدگاهگه ایلنتیریلهدی. کریکت سپورتی حقّاني ترماغی و شخصن سِراج الدین حقّاني نینگ سېویملی سپورت توری حسابلنهدی. اوشبو ترماق سۉنگگی قریب بېش ییل دوامیده کریکت جماعهسی اعضالری بیلن یقین علاقهلر اۉرنهتیش، اولر بیلن اوچرهشوولر اۉتکزیش همده افغانستان ملي کریکت جماعهسی نینگ اَیریم مشهور اعضالریگه خوفسیزلیک همراهلیگینی تأمینلش آرقهلی اۉز قیافهسینی تیکلش و سپورت فعالیتلرینی قۉللب-قوّتلهیاتگنینی نمایش اېتیشگه اورینگن. اما کریکت سپورتی، باشقه سپورت تورلری کبی، ملا هبتالله آخوندزاده نینگ اعتباریدهگی یۉنهلیشلردن اېمس. طالبان رهبری دیني مدرسهلر، مسجدلر، عیدگاهلر و باشقه دیني مسکنلرنی کېنگهیتیریش همده قوریشنی اوستوار دېب بیلهدی. اونینگ فکریچه، بوندهی جایلر طالبان مفکورهسی اساسیدهگی «اسلامي شریعت»نی ترغیب قیلیش اوچون قولهی محیط یرهتهدی.
کریکت سپورتی افغانستان نینگ جَنوبي و شرقي ولایتلریده، یعنی ملا هبتالله آخوندزاده باشچیلیگیدهگی قندهار قناتی همده سِراجالدین حقّاني باشچیلیگیدهگی شرقي طالبان تأثیر حدودلریده مشهور حسابلنهدی. شونگه قرهمهی، طالبان نینگ قَیته حاکمیتگه کېلگنیدن بویان اۉتگن قریب بېش ییل دوامیده حقّاني ترماغی شرقي افغانستاندهگی کریکت مسابقهلرینی قۉللب-قوّتلشگه حرکت قیلگن بۉلسه، قندهار قناتی بوندهی یاندشوونی نمایان اېتمهگن. اېندیلیکده اېسه اولر لشکرگاه شهریدهگی کریکت استدیونینی بوزیش ایشلرینی آلیب بارماقده.
سپورت میدانی اۉرنیده عیدگاه
لشکرگاه اهالیسی شهرده و اونینگ اطرافیده اعیدگاه قوریش اوچون ماس بۉلگن کېنگ یېر میدانلری موجودلیگینی تأکیدلهماقده. اولر نینگ ایتیشیچه، حاضر نینگ اۉزیده هم لشکرگاهده عیدگاه موجود. شو سببلی، اگر ینگی عیدگاه قوریلیشی رېجهلشتیریلهیاتگن بۉلسه، او کریکت میدانی اۉرنیده اېمس، باشقه حدودده بنیاد اېتیلیشی کېرهک. اما طالبان رهبری نینگ بویروغیگه کۉره، لشکرگاه کریکت ستدیونی بوزیلیب، اونینگ اۉرنیگه عیدگاه قوریلهدی. یعنی، طالبان رهبری نینگ کۉرسهتمسیگه بناءً،عیدگاه عیناً کریکت میدانی جایلشگن حدودده برپا اېتیلیشی کېرهک. طالبان رهبری کریکت سپورتیگه قرشی اېکنلیگینی آچیقچهسیگه اعلان قیلمهگن. بیراق عیدگاه نینگ کریکت میدانی اۉرنیده قوریلیشی کۉپچیلیک تامانیدن اونینگ حقّاني ترماغی آرهسیده مشهور بۉلگن بو سپورت توریگه نسبتاً سلبي مناسبتی نینگ بېلگیسی صفتیده تلقین قیلینماقده. هلمنددهگی طالبان واليسی نینگ مطبوعات کاتبی محمد قاسم رياض کریکت ستدیونی عیدگاه مسجدیگه ایلنتیریلیشینی تصدیقلهدی. اونینگ سۉزلریگه کۉره، لشکرگاه مرکزي عیدگاهی 300 جېریب یېر میدانیده قوریلهدی و کریکت ستدیونی اوچون باشقه جای اجرهتیلهدی. اونینگ تأکیدلشیچه، کریکت میدانیگه تېگیشلی جهازلر امانت صفتیده سهقلب قۉییلهدی. لشکرگاه شهریدهگی کریکیت ستدیونی نینگ تمل تاشی 2017-ییلده گیاهوند مادّهلر بیلن کورهش وزیرلیگی نینگ مالیوي کۉمهگیده، تخمیناً 34 میلیون افغاني قیمتیدهگی لایحه صفتیده، 20 جېریب یېر میدانیده قۉییلگن اېدی. ستدیون بیر ییل اۉتیب فایدهلنیشگه تاپشیریلگن.
جمهوریت توزومی دوریده هلمند ولایتیده کۉکناری اېکینلری نینگ کتّه قِسمی یېتیشتیریلردی. ولایت نینگ اَیریم حدودلری اۉشه پیتده طالبان نظارتی آستیده بۉلگنلیگی سببلی، افغانستان سابق حکومتی نینگ گیاهوند مادّهلر بیلن کورهش وزیرلیگی هلمندلیک یاشلرنی کریکت سپورتیگه قیزیقتیریش مقصدیده اوشبو استدیوننی برپا اېتگن اېدی. اما حاضر اوشبو استدیون بوزیب تشلنماقده.
تخمیناً ایکّی ییل اوّل طالبان رهبری شمالي ولایتلرگه قیلگن سفری چاغیده قوندوزدهگی طالبان نینگ 217 عمري حربي بازهسیده سۉزلهگن نطقیده کریکت اۉیینلری اۉتکزیلیشیگه قرشی اېکنلیگینی بیلدیرگن اېدی. طالبان عملدارلریدن بیریگه منسوب اېکنی ایتیلگن اودیو یازووده ملا هبتالله آخوندزاده کریکت اۉیینیدن «نفرتلنیشی» و شو سببلی طالبان نینگ حربي بازهلریده، جملهدن 217 عمري بازهسیده هم بو اۉییننی تعقیقلهگنی ایتیلهدی. شونینگدېک، «اطلاعات روز» گزېتهسی اوّلراق طالبان رهبریگه یقین کوچلر ننگرهار ولایتیده بیر نېچته کیچیک کریکت میدانلرینی بوزیب تشلهگنی حقیده خبر بېرگن اېدی. بوندن تشقری، طالبان رهبری نینگ یشش جایی بۉلگن قندهار ولایتیده هم بیر نېچه کریکت مسابقهلری بېکار قیلینگن.
یاش اولاد میدان و مدرسه اۉرتهسیده
کریکت افغانستان بالهلری، اۉسمیرلری و یاشلری نینگ، اینیقسه مملکت نینگ جَنوبي و شرقي ولایتلریده، اېنگ قیزیقرلی سپورت تورلریدن بیریگه ایلنگن. اوشبو اولاد نینگ بیر قِسمی اوچون اوّل افغانستانده، کېین اېسه خلقارا میدانده کریکت مسابقهلریده پارلش کتّه آرزوگه ایلنگن. اما بو طالبان رهبری ایستهیاتگن یۉل اېمس. طالبان رهبری «اسلامي شریعتنی تطبیق اېتیش» دعواسی آستیده افغانستان نینگ ینگی اولادینی مسجدلر، مدرسهلر و عیدگاهلرگه یۉنهلتیریشگه حرکت قیلماقده. او شو یۉل بیلن یاشلرنی اۉز مفکورهسی اساسیده کېلهجکدهگی «اسلامي امیرلیک» عسکرلری و اونینگ ذخیره کوچیگه ایلنتیریشنی مقصد قیلگن. افغانستان ملي کریکت جماعهسی نینگ اَیریم سپورتچیلری ملي و خلقارا مسابقهلردهگی موفقیتلری طفیلی مشهور کلوپلرگه جلب اېتیلگن و کتّه مالیوي امکانیتلرگه اېگه بۉلگن. انه شو یوتوقلر کۉپلب بالهلر و یاشلرنی هم کریکت میدانلریده پارلشنی آرزو قیلیشگه اوندهماقده.
راشیدخان و قندهار حلقهسی نینگ سېزگیرلیگی
راشدخان افغانستان کریکتی نینگ اېنگ مشهور سیماسی حسابلنهدی. او اوشبو سپورت توریدهگی خلقارا شهرتی طفیلی دنیا نینگ تنیقلی شخصلری، جملهدن باللیوود کینو (سینما) صناعتی نینگ مشهور یولدوزلری بیلن هم صورت و ویدیولرگه اېگه. تخمیناً یېتّی آی اوّل راشد خان نینگ ایکّینچی رفیقهسی راشد خانگه تېگیشلی بۉلگن خیریه جمغرمهسی نینگ آچیلیش مراسمیده بېزهتیلگن قیافهده و رۉمالسیز حالده نمایان بۉلدی. اوشبو تدبیرگه عاید صورت و ویدیولر اجتماعي ترماقلرده کېنگ ترقهلیب، طالبان حکومتی نینگ احتمالي مناسبتی حقیده قیزغین بحث-مناظرهلرگه سبب بۉلدی. شوندن سۉنگ راشد خان اوشبو عیال بیلن نکاحدن اۉتگنینی اعلان قیلدی.
ملا هبتالله آخوندزاده، طالبان رهبری، «اسلامي شریعت»نی قطعي طرزده تطبیق اېتیش طرفداری حسابلنهدی. او عیاللر و قیزلر نینگ اویده قالیشینی، اوییدن تشقریگه چیققنیده اېسه اوشبو گروه تامانیدن معقوللنگن حجابده، جملهدن بورقه یاکه یوزنی نقاب بیلن یاپگن کېنگ و اوزون قاره عربچه حجابده کۉرینیشینی ایستهیدی. اما راشدخان و باشقه کریکت یولدوزلری طالبان طلب قیلهیاتگن کيینیش قاعدهلریگه عمل قیلمهیدیگن عیاللر بیلن بیرگه کۉرینگنیده، بو حالت قندهار حلقهسی نینگ کریکتگه نسبتاً سېزگیرلیگی و سلبي مناسبتینی ینه-ده کوچهیتیریشی ممکن.
قندهار و حقّاني ترماغی اۉرتهسیدهگی یشیرین رقابت
سراجالدین حقانی و حقّاني ترماغی، جمهوریت دوریده یوز بېرگن اېنگ قانلی پارتلش و خودکوشلیک هجوملری نینگ بیر قِسمی اوچون مسوول دېب حسابلنهدی. اولر طالبان نینگ افغانستانده قَیته حاکمیتگه کېلگنیدن بویان اۉتگن قریب بېش ییل دوامیده کریکت سپورتی و اونینگ ملي جماعهسیگه یقینلشیشگه حرکت قیلیب کېلماقده. مقصد اېسه اوشبو سپورت وکیللری و اولر نینگ خلقارا سپورت میدانیدهگی نفوذی آرقهلی اۉزلرینی «عمل پرست» و اۉزگریشلرگه آچیق کوچ صفتیده نمایش اېتیشدن عبارت بۉلگن.
سراجالدین حقّاني افغانستان ملي کریکت جماعهسی اعضالری بیلن اېسدهلیک صورتلریگه توشگن. اونینگ اوکهسی انس حقّاني هم ملي جماعه نینگ اَیریم اۉیینچیلری بیلن یقین علاقهلر اۉرنهتگن. بو مناسبتلر حقّاني ترماغی کریکت نینگ عامهباپلیگیدن فایدهلنیب، اۉزی نینگ اجتماعي و سیاسي موقعینی مستحکملشگه اورینهیاتگنینی کۉرسهتهدی.
بونگه قرهمه-قرشی روشده، هبتالله آخوندزاده و قندهار حلقهسی حقّاني ترماغیدن باشقه یۉنهلیشنی تنلهگن. اولر دیني مرکزلر، مدرسهلر، مسجدلر و باشقه دیني مؤسسهلرنی رواجلنتیریشنی اوستوار وظیفه دېب بیلهدیلر. گرچه ملا هبتالله آخوندزاده و سِراجالدین حقّاني هلمند ولایتیگه بیرگهلیکده سفر قیلگن و اۉزارا «بیرلیک» موجودلیگینی نمایش اېتیشگه اورینگن بۉلسهلر-ده، قندهار قناتی بیلن حقّاني ترماغی اۉرتهسیدهگی رقابت و قرهشلر تفاوتی هنوز دوام اېتماقده. بو رقابت اېندیلیکده سپورت، اینیقسه کریکت میدانیگه هم کۉچگن. لشکرگاه کریکت استدیونی نینگ عیدگاهگه ایلنتیریلیشی طالبان توزیلمهسی ایچیدهگی ایکّی خیل یاندشوو نینگ رمزی صفتیده کۉریلماقده. بیر تاماندن، حقّاني ترماغی سۉنگگی ییللرده کریکت نینگ عامهباپلیگیدن فایدهلنیب، اۉز قیافهسینی قَیته شکللنتیریش و ینهده عملي یاندشوونی نمایش اېتیشگه اورینگن بۉلسه، ایکّینچی تاماندن قندهار حلقهسی ملا هبتالله آخوندزاده رهبرلیگیده دیني مکتبلر، مسجدلر و دیني مرکزلرنی کېنگهیتیریشگه اوستوار اهمیت بېرماقده.
شو سببلی، کۉپلب فقرالر و سپورتچیلر نظریده بیر کریکت استدیونی نینگ بوزیلیب، اۉشه جایده عیدگاه قوریلیشی شونچهکه سپورت میدانی نینگ وظیفهسی اۉزگرتیریلیشی اېمس. بو واقعه طالبان رهبری نینگ افغانستان یاش اولادیگه و مملکتدهگی سپورت فعالیتلری نینگ کېلهجگیگه نسبتاً قندهی قرهشده اېکنی نینگ بېلگیسی صفتیده هم تلقین قیلینماقده.
