ایران رهبری مجتبی خامنهای یوقاری درجهده باییتیلگن یورانیوم مملکت تشقریسیگه چیقریلمسلیگی حقیده کۉرسهتمه بېرگن.
بو حقده رویترز بوگون (پنجشنبه، ۳۱-ثور) ایکّی ایرانلیک منبعگه تهیهنیب خبر بېردی.
موضوعنینگ نازکلیگی سبب اسمی آشکار قیلینمهگن منبعلردن بیری شوندهی دېگن: «عالي رهبرنینگ کۉرسهتمهسی و حاکمیت ایچیدهگی عمومي قرهش شوکی، باییتیلگن یورانیوم ذخیرهلری مملکتدن تشقریگه چیقریلمسلیگی کېرهک.»
رویترز منبعلریگه کۉره، «ایراننینگ یوقاری مرتبهلی رسميلری بو موادلرنی تشقریگه یوباریش مملکتنی کېلهجکدهگی امریکا قۉشمه ایالتلری و اسرایل هجوملریگه نسبتاً ضعیفلشتیرهدی، دېب حسابلهیدی.»
خامنهای یکوني قرارنی قبول قیلووچی شخص بۉلگنی اوچون، بو مسأله تهراننینگ امریکا بیلن تینچلیک مذاکرهلریدهگی موضعینی ینه-ده مرکّبلشتیرماقده.
چونکه ایران رهبرینینگ ینگی کۉرسهتمهسی دونالد ترامپنی ینه-ده کۉپراق ناراضی قیلیشی، مذاکرهلرنی مرکّبلشتیریشی و احتمال اوروشنینگ قَیته باشلنیشیگه آلیب کېلیشی ممکن.
امریکا جمهور رییسی ایلگری اېراننینگ بیر نېچه پیشنهادلرینی، اولرده هستوي دستور مسألهسی یېترلی درجهده قمرهب آلینمهگنی سببلی رد اېتگن و هجوملرنی قَیته باشلش بیلن تهدید قیلگن اېدی.
آلدین ایران هستوي دستورینی بوتونلهی توگهتیشنی طلب قیلگن ترامپ یقینده اونینگ۲۰ییلگه تۉختهتیلیشیگه راضی بۉلگنی ایتیلماقده.
اما بونینگ عوضیگه او تهراندن باییتیلگن یورانیومنی امریکاگه تاپشیریشنی طلب قیلماقده.
اسرایل، امریکا قۉشمه ایالتلری و باشقه غرب دولتلری اوزاق ییللردن بېری ایراننی هستوي قورال یرهتیشگه اورینیشده عیبلب کېلهدی.
اما تهران هستوي قورالگه اېگه بۉلیشگه اورینهیاتگنینی قطعاً رد اېتهدی.
