رویترز خبرگزارلیگینینگ خبر بېریشیچه، پاکستان قۉشمه مدافعه کېلیشووی دایرهسیده سعوديه عربستانیگه ۸ مینگ عسکر، جنگاور اوچاقلر، اسکادرانی و هوا مدافعه تیزیمینی جایلشتیرگن.
خبرگزارلیک بوگون (دوشنبه، ۲۸ثور) اوچ نفر خوفسیزلیک رسميسی و ایکّی دولت عملداری بو معلوماتنی تصدیقلهگنینی همده اوشبو کوچلر احتمالي ینگی هجوملر یوز بېرسه، سعوديه اوردوسینی قۉللب-قوّتلشینی ایتگنینی یازدی.
رویترز معلوماتیگه کۉره، پاکستان جاري ییل اپریل آیی باشیده سعوديهگه تخمیناً۱۶ ته « جیاف-۱۷ قیرووچی اوچاقیدن عبارت تۉلیق اسکادران همده ایکّی اسکادران درون یوبارگن.
گزارشده ایتیلیشیچه، پاکستان شونینگدېک چینده ایشلب چیقریلگن «اچکیو۹» هوا مدافعه تیزیمینی هم سعوديه عربیستانیده جایلشتیرگن.
رویترز منبعلریگه تهیهنیب یازیشیچه، اوشبو تخنیکلرنی پاکستانلیک حربيلر باشقرهدی، مالیهلشتیریش اېسه سعوديه تامانیدن عملگه آشیریلماقده.
ایکّی خوفسیزلیک رسميسی رویترزگه سعوديهده جایلشتیریلگن پاکستان اوردوسی و هوا کوچلری خادملری اساسن مصلحت و اۉقوو وظیفهلرینی بجریشینی بیلدیرگن.
منبعلرنینگ ایتیشیچه، اولر ایکّی دولت اۉرتهسیده حربي تخنیکلرنی جایلشتیریشگه عاید حجتلر و یازیشمهلرنی کۉرگن.
رویترزنینگ یازیشیچه، پاکستان مدافعه و تشقی ایشلر وزیرلیکلری همده سهعوديه حکومتی عاموی اخبارات واسطهلر ادارهسی اوشبو حربي کوچ و تخنیکلر جایلشتیریلگنی حقیدهگی سواللرگه جواب بېرمهگن.
پاکستان و سعوديه عربستانی اۉتگن ییلی مدافعه شرطنامهسینی امضالهگن اېدی. اوشبو کېلیشوو مضمونی مخفي بۉلسه-ده، تامانلر هجوم صادر بۉلگن تقدیرده بیر-بیرینی حمایه قیلیش مجبوريتینی آلگنینی بیلدیرگن.
اۉشه پیتده پاکستان مدافعه وزیری خواجه محمدآصف بالواسطه اوشبو مدافعه کېلیشوو سعوديه عربستانینی پاکستان نینگ هستوي سایبانی آستیگه قۉیگنینی ایتگن اېدی.
رویترز بوندن آلدین هم ایران نینگ مهم انرژی زیرساختلریگه هجوملری و بیر سعوديه فقراسینینگ هلاک بۉلیشیدن سۉنگ پاکستان سعوديهگه جنگاور اوچاقلر یوبارگنی حقیده خبر بېرگن اېدی، بیراق ینگی گزارشده بو تفصیلاتلر ینه-ده آچیقلنگن.
پاکستان حربي کوچلری و تخنیکلری نینگ سعوديهده جایلشتیریلیشی سعوديه ایران هجوملریگه جواب قَیتریب، منطقهدهگی ماجرانی کېنگهیتیریشی ممکنلیگی حقیدهگی خواطرلرنی کوچهیتیرگن اېدی.
امریکا قۉشمه ایالتلری و اسرایلنینگ ایرانگه قرشی هجوملریدن کېین ایران سعوديه عربیستانیدهگی تورلی نقطهلرنی درون و راکت هجوملری بیلن نشانگه آلگن. ایران رسميلری بو هجوملر امریکاگه تېگیشلی بزهلر و مرکزلرگه قرهتیلگنینی، سهعوديه حدودي یخلیتلیگیگه حرمت بیلن قرهشلرینی بیلدیرگن.
شونگه قرهمهی، رویترز سعوديه اوروش دوامیده ایران حدودیده بیر نېچه مخفي هجوملر عملگه آشیرگنینی یازگن.
بیراق پاکستان امریکا-اسرایل و ایران اۉرتهسیدهگی ماجرا دوامیده اساسي واسطهچی صفتیده میدانگه چیقدی و عیناً پاکستان واسطهچیلیگیده امریکا همده ایران اۉت آچیشنی تۉختهتیش بۉییچه کېلیشووگه اېریشگن.
ایران و امریکا، شونینگدېک، پاکستان واسطهچیلیگیده اسلام آبادده تۉغریدن-تۉغری مذاکرهلرنینگ بیر باسقیچینی اۉتکزگن و تامانلر اۉرتهسیدهگی خبر المشینووی هنوز اسلام آباد آرقهلی دوام اېتماقده.
