پاکستان باش وزیری شهباز شریف، بیرلشگن عرب امیرلیکلریدهگی «براکه» اتم الکتر ستشنسیگه قیلینگن درون هجومینی قارهلهدی.
پاکستان باش وزیری بوگون (دوشنبه، ۲۸ ثور ) نشر قیلگن بیاناتیده بیرلشگن عرب امیرلیگی حکومتی و خلقی بیلن بیردم اېکنینی بیلدیرگن.
پاکستان باش وزیری شهباز شریف «بیز برچه تامانلرنی ماکسیمال درجهده وزمینلیک کۉرسهتیشگه و خلق ارا قانونلر بۉییچه اۉز مجبوريتلریگه عمل قیلیشگه چقیرهمیز.»
پاکستان باش وزیرینینگ تأکیدلشیچه، «ملاقات و دیپلوماتيک منطقهده تینچلیک، برقرارلیک و کېسکینلیکنی کمهیتیریش نینگ یگانه عملي یۉلی دیر.»
«براکه» اتم الکتر ستشنی کېچه درون هجومیگه اوچرهگن اېدی.
بیرلشگن عرب امیرلیگی مدافعه وزیرلیگینینگ معلوم قیلیشیچه، درونلردن بیری ستشننینگ ایچکی حدودیدن تشقریدهگی جنراتورگه اوریلیب، یانغین چیقیشیگه سبب بۉلگن.
وزیرلیکنینگ بیلدیریشیچه، اوچته درون غربي چېگرهلر آرقهلی مملکت حدودیگه کیرگن، اولردن ایکّیتهسی اوریب توشیریلگن، اوچینچیسی اېسه الکتر ستشن جنراتوریگه کېلیب اوریلگن.
بیرلشگن عرب امیرلیگی مدافعه وزیرلیگی هجوم منبعسی حاضرچه نامعلوم اېکنینی و تېرگاو دوام اېتهیاتگنینی ایتگن.
شونینگدیک بیرلشگن عرب امیرلیگی تشقی ایشلر وزیرلیگی اوشبو هجومنی «اساسسیز ترورچیلیک حرکتی»، «کېسکینلیک نینگ خوفلی کوچهییشی، قبول قیلیب بۉلمهیدیگن تجاوزکار حرکت و خوفسیزلیککه تۉغریدن-تۉغری تهدید» همده خلقارا قانونلرنینگ آچیق بوزیلیشی دېب بهالهگن.
بو هجوم ایران و بیرلشگن عرب امیرلیگی رسميلری اۉرتهسیدهگی آغزهکی کېسکینلیک سۉنگگی کونلرده کوچهیگن بیر پیتده صادر بۉلدی.
امریکا و اسرایلنینگ اېرانگه قرشی اوروشی باشلنگنیدن سۉنگ، بیرلشگن عرب امیرلیگی ایراننینگ کېنگ کۉلملی راکت و درون هجوملری نشانیگه ایلنگن اېدی.
