هند اوردوسی بیر وقتنینگ اۉزیده بیر نېچته جنگاور کلاهکنی تورلی نشانلرگه یۉنهلتیره آلهدیگن ینگی نسل «آگنی» راکتینینگ موفقیتلی سیناودن اۉتکزیلگنینی معلوم قیلدی.
هند مدافعه وزیرلیگی بیاناتیده ایتیلیشیچه، اوشبو راکت تیزیمینینگ «موفقیتلی سیناوی» جمعه کونی (۱۸-ثور) اودیشا ایالتی ساحللریدهگی عبدالکَلام آرالیده عملگه آشیریلگن.
وزیرلیکنینگ بیاناتیگه کۉره، «آگنی» راکتنینگ ینگی نسلی اتموسفیرگه بیر نېچه بار قَیته کیریش امکانیتیگه اېگه بۉلیب، «میرو» تیزیمی بیلن جهازلنگن. بو تکنالوژي راکتگه بیر نېچته جنگاور کلاهکنی تورلی حدودلردهگی نشانلرگه علیحده یۉنهلتیریش امکانینی بېرهدی.
هند مدافعه وزیرلیگینینگ قۉشیمچه قیلیشیچه، «اوشبو راکت بیر نېچته کلاهک یاردمیده هند اقیانوسیدهگی کېنگ جیوگرافیک حدودده بېلگیلنگن بیر نېچه نقطهنی موفقیتلی نشانگه آلگن».
هند «آگنی» راکتلرینی ایشلب چیقیشنی ۱۹۸۳-ییلدن باشلهگن. آلدین سیناودن اۉتکزیلگن «آگنی-5» نسل قطعهلر ارا بالیستیک راکت حسابلنهدی. او هسته کلّاهکنی تشیش امکانیتیگه اېگه بۉلیب، 5 مینگ کیلومتردن آرتیق مصافهگه اوچه آلهدی.
هند و پاکستان اۉزارا رقابتدهگی ایکّی قۉشنی دولت صفتیده سۉنگگی ییللرده هجومکار راکت امکانیتینی همده مدافعه تیزیملرینی رواجلنتیریشگه کتّه اعتبار قرهتماقده.
پاکستان هم سۉنگگی ایکّی ییل دوامیدهنینگ راکتگه قرشی مدافعه تیزیمیگه جوابن «ابابیل» راکتینی، منطقوي تيیب توریش مقصدیده ینگی «ابدالی» راکتینی همده جنگ میدانیدهگی انیق ضربهلر اوچون «فتاح » تورکومیدهگی راکتلرنی نمایش قیلیب، سیناودن اۉتکزگن.
