ایران تشقی ایشلر وزیری عباس عراقچی چینلیک همکسبی وانگ یی بیلن اوچرهشوودن سۉنگ، ایکّی مملکت اۉرتهسیدهگی همکارلیک و استراتژیک شریکلیک ینگی شرایطلرده ینه-ده کوچلیراق دوام اېتیشینی معلوم قیلدی.
ایران تشقی ایشلر وزیرلیگی مطبوعات سۉزلاوچیسی ادارهسی ترقهتگن بیاناتگه کۉره، عراقچی و وانگ یی ایکّی تامانلهمه مناسبتلر همده منطقوي و خلقارا وضعیت یوزهسیدن فکر المشگن.
بوگون تانگده (چهارشنبه، ۱۶-ثور) پکنگه یېتیب کېلگن عراقچی چیننی «اېراننینگ یقین دۉستی و استرتژیک شېریگی» دېب اتهب، شوندهی دېدی: «بیز ایکّی مملکت اۉرتهسیدهگی همکارلیک و استراتژیک شریکلیک ینگی شرایطلرده اوّلگیدن هم کوچلیراق دوام اېتیشیگه ایشانهمیز.»
او امریکا و اسرایل نینگ ایرانگه قیلگن هجومینی قارهلهگنی اوچون چینگه منّتدارچیلیک بیلدیریب، چیننینگ بیرلشگن ملتلر تشکیلاتی خوفسیزلیک کېنگشینینگ نوبتدهگی رئیسلیگی دوامیده «خلقارا تینچلیک و خوفسیزلیککه قرشی قانونبوزرلیکلر» نینگ آلدی آلینیشی ممکنلیگیگه امید بیلدیردی.
بیاناتگه کۉره، عراقچی چینلیک همکسبینی اوروشنی توگهتیش بۉییچه آلیب باریلهیاتگن دیپلوماتیک جریانلر، سعی-حرکتلر و اسلام آباد مذاکرهلرینینگ سۉنگگی تفصیلاتلری بیلن تنیشتیرگن.
وانگ یی اېسه «منطقهده کېسکینلیکنینگ کوچهییب کېتیشینینگ آلدینی آلیش و دیپلوماتیک جریاننی دوام اېتتیریش» ضرورلیگینی تأکیدلب، چین «کوچ ایشلهتیش و ناقانوني اوروش نینگ دوام اېتیشیگه» قرشی اېکنینی بیلدیرگن.
اوچرهشوو دوامیده وانگ یی حاضرگی اوروش نهفقط ایرانگه، بلکه بوتون منطقه و دنیا مملکتلریگه سلبي عاقبتلر کېلتیرهیاتگنینی قید اېتدی.
او، شونینگدېک، چین جمهور رییسی تامانیدن ایلگری سوریلگن تۉرت بندلی تشبثگه اشاره قیلیب، اوروشنی تېز و قطعي یکونلش همده منطقهده برقرار تینچلیک و خوفسیزلیکنی تأمینلش ضرورلیگینی ایتدی.
چین اوشبو تشبث آرقهلی برچه دولتلرنی «تینچ-تاتوو یشش، بیر-بیری نینگ حاکمیتی و حدودي یخلیتلیگینی حرمت قیلیش، خلقارا حقوققه رعایه اېتیش همده رواجلنیش و خوفسیزلیک اۉرتهسیده موازنتنی سقلش»گه چقیرهدی.
