عباس عراقچی مسقطگه عملگه آشیرگن سفری جریانیده بو مملکت سلطانی هیثم طارق آل سعید بیلن اوچرهشیب، مذاکرهلر اۉتکزدی.
ایران تشقی ایشلر وزیرلیگی بیاناتیگه کۉره، بوگون (یکشنبه،۶-ثور) بۉلیب اۉتگن اوچرهشووده تامانلر هرمز بۉغازیده حرکت خوفسیزلیگی، فارس کۉرفزی و عمان دېنگیزی خوفسیزلیگی، منطقوي اقتصادي همکارلیک همده پاکستان واسطهچیلیگیده دوام اېتهیاتگن اوروشنی یکونلش بۉییچه مذاکرهلر یوزهسیدن فکر المشگن.
عراقچی اوشبو اوچرهشووده «ایرانگه قرشی۴۰ کونلیک مجبوري اوروش تجربهسی شونی کۉرسهتدیکی، امریکانینگ منطقهدهگی حربي اشتراکی فقط بېقرارلیک و تفاوتلرنی کوچهیتیرهدی»، دېگن.
او، شونینگدېک، منطقه دولتلری امریکا ارهلشوویسیز، ایچکی و جماعهوي خوفسیزلیک میکانیزملرینی شکللنتیریش اوچون مسوولیتلی و کانتروکتیف یاندشوونی تنلشی کېرهکلیگینی تأکیدلهگن.
ایران تشقی ایشلر وزیرلیگی معلوماتیگه کۉره، عمان سلطانی اوروش نینگ تېزراق یکونلنیشی و منطقهده برقرارلیک تیکلنیشیگه امید بیلدیرگن همده بو یۉلده هر قندهی یاردم کۉرسهتیشگه تیار اېکنینی معلوم قیلگن.
عراقچی بوندن آلدین پاکستان رسميلری بیلن اوچرهشیب، ایران و امریکا اۉرتهسیدهگی مذاکرهلرده واسطهچیلیک قیلهیاتگن تامان بیلن مصلحتلشگنیدن سۉنگ عمانگه یۉل آلگن اېدی.
عمان اوّل هم ایران و امریکا اۉرتهسیدهگی بیر نېچه مذاکرهلرگه مېزبانلیک قیلگن و ایراننینگ هستهی دستوری بۉییچه ایشانچلی واسطهچی دولتلردن بیری حسابلنهدی.
ایران یېتکرمهلری خبریگه کۉره، عراقچی عمان سفریدن سۉنگ ینه پاکستانگه قَیتیشی، او یېرده قۉشیمچه اوچرهشوولر اۉتکزگچ، روسيهگه یۉل آلیشی کوتیلماقده.
