اسرایل اوردوسی تهران شهریده ایراننینگ بیر نېچه یاقیلغی انبارلرینی نشانگه آلگنینی اعلان قیلدی.
اسرایل اوردوسی بوگون تانگده (یکشنبه، ۱۷حوت) اعلان قیلگن بیاناتده ایتیلیشیچه، ایران حربي کوچلری بو انبارلردن حربي ذخیرهلرنی ایشگه توشیریش اوچون «بېواسطه و تکرارن» فایدهلنگن.
ایراننینگ «ملي نفتنی قَیته ایشلش و ترقهتیش فابریکهسی» هم تهران و البرز ولایتلریدهگی بیر قنچه نفت انبارلری هجومگه اوچرهگنینی تصدیقلهدی.
شو بیلن بیر وقتده، ایراننینگ هم کېچه تونده اسرایل شهرلری و منطقهنینگ تورلی مملکتلریگه قیلگن هجوملری دوام اېتگن.
ایران عامهوي اخبارات واسطهلرینینگ خبر بېریشیچه، بو مملکت جملهدن اسرایلدهگی حیفا نفتنی قَیته ایشلش فابریکهنی راکت هجومی بیلن نشانگه آلگن.
بو یېتکرمه شونینگدېک، عراقنینگ سلیمانيه شهریده، کویت و دبیده جایلشگن «امریکا استخبارات کوچلری یشهیدیگن مهمانخانهلر»گه هم هجوملر بۉلگنینی خبر قیلگن.
امریکا و اسرایلنینگ ایرانگه قرشی اوروشی بوگون تۉقّیزینچی کونیگه کیردی و کۉرینیشیچه، ایکّی تاماننینگ هجوملری حاضر ینه-ده کوچهیگن.
تیناوون اېرتهلب ایران جمهور رییسی مسعود پزشکيان بو مملکت اېندی قۉشنی دولتلرگه هجوم قیلمسلیگینی اعلان قیلگن اېدی.
امریکا جمهور رییسی دونالد ترامپ بو قرارگه جوابن، ایران قتّيق مغلوبیتگه اوچرهیاتگنینی و قۉشنیلریگه تسلیم بۉلگنینی ایتدی.
شوندن سۉنگ ایران تشقی ایشلر وزیرلیگی امریکا جمهور رییسینینگ ناتۉغری تلقینی سببلی ایران جمهور رییسی اعلان قیلگن کېسکینلیکنی کمهیتیریش سیاستی برباد بۉلگنینی بیلدیردی.
امریکا و اسرایلنینگ ایرانگه قرشی هجوملری همده ایراننینگ منطقه دولتلریگه قیلهیاتگن هجوملری کوچهیگنی یقین شرقده اوروش کېنگهییشی و بېقرارلیک آرتیشی حقیدهگی خواطرلرنی کوچهیتیرماقده.
