رویترز امریکا قۉشمه ایالتلرینینگ ایکّی رسميسیگه تهیهنیب خبر بېریشیچه، امریکا حربي تېرگاوی نتیجهلریگه کۉره، امریکا اوردوسی ایراندهگی بیر قیزلر مکتبیگه اویوشتیریلگن اۉلیملی هجوم اوچون مسوول بۉلیشی ممکن.
رویترز بوگون (جمعه، ۱۵حوت) نشر قیلگن حساباتیده بو ایکّی رسميگه تهیهنیب یازیشیچه، تېرگاوچیلر حلی یکوني خلاصهگه کېلمهگن و تېکشیروولر حلی توگللنمهگن.
هرمزگان ولایتینینگ میناب تومنیدهگی «شجره طیبه» قیزلر مکتبی شو هفته شنبه کونی، امریکا قۉشمه ایالتلری و اسرایلنینگ ایرانگه قرشی هجوملری باشلنگن پیتده هوا هجومیگه اوچرهگن.
ایران رسميلرینینگ معلوم قیلیشیچه، اوشبو هجومده۱۶۵ نفر اۉقووچی و اۉقیتووچی هلاک بۉلگن، ینه۹۵کیشی جراحت آلگن.
اوّلراق امریکا قۉشمه ایالتلری مدافعه وزیری پیت هگست، بو هجوم یوزهسیدن تېکشیروو آلیب باریلهیاتگنینی ایتگن اېدی.
رویترز بیلن ناتنیش طرزده گپلشگن امریکا رسميلری، شونینگدېک، ینگی دلیللر پیدا بۉلیب، امریکانی بو حادثه اوچون جوابگرلیکدن آزاد قیلیشی و باشقه بیر تاماننینگ مسوول اېکنینی کۉرسهتیشی احتمالینی هم رد اېتمهگن.
رویترزنینگ ینه قۉشیمچه قیلیشیچه، تېکشیروو قنچه وقت دوام اېتیشی یاکه امریکالیک تېرگاوچیلر یکوني بها بېریشدن آلدین ینه قندهی دلیللر ایزلهیاتگنی حاضرچه انیق اېمس. بو قیزلر مکتبیگه هجوم و اۉقووچیلرنینگ هلاک بۉلیشی کېنگ ناراضیلیکلرگه سبب بۉلگن.
