پاکستان اوردوسینینگ معلوم قیلیشیچه، افغانستان بیلن چېگرهداش خیبر پختونخوا ایالتینینگ بنو اولسواللیگیده یوز بېرگن تۉقنهشووده پاکستان اوردوسینینگ ایکّی اعضاسی و بېش نفر عصیانچی هلاک بۉلگن.
پاکستان اوردوسی بوگون (شنبه،۲ حوت) اعلان قیلگن بیاناتیده اوشبو تۉقنهشوو تحرک طالبان پاکستانگه قرشی استخبارات اساسیدهگی عملیات چاغیده همده خودکوش پارتلش نینگ آلدینی آلیش جریانیده صادر بۉلگنینی بیلدیرگن.
بیاناتده ایتیلیشیچه، تۉقنهشوو دوامیده بېش نفر عصیانچی اۉلدیریلگن. شوندن سۉنگ ینه بیر عصیانچی پارتلاوچی مادّهلر اۉرنهتیلگن موترنی حربي کوچلر موتریگه اوریب یوبارگن و نتیجهده بیر افسر همده بیر عسکر هلاک بۉلگن.
شونینگدېک، بیاناتده «خوارج (تیتیپی اعضالری) افغانستان توپراغیدن فایدهلنیب، پاکستان ایچیده ترورچیلیک فعالیتینی دوام اېتتیرماقده و مبارک رمضان آیینینگ حرمتینی پایمال قیلماقده»،- دېییلهدی.
پاکستان اوردوسینینگ قۉشیمچه قیلیشیچه، «طالبان رژیمی ینه بیر بار خوارجلرنینگ افغانستان توپراغیدن پاکستان ایچیده، حتا رمضان آییده هم، ترورچیلیک فعالیتی اوچون فایدهلنیشیگه تۉسقینلیک قیله آلمهدی».
پاکستان اوردوسی تأکیدلهگن: «بو دولت هېچ قندهی مُراضاتگه بارمهیدی و خوارجلرنینگ بو جیرکنچ و قۉرقاقانه حرکتی اوچون قانوني قصاص آلیش مقصدیده، اولرنینگ قهیېرده بۉلیشیدن قطع نظر، عملیاتلرنی دوام اېتتیرهدی.»
سۉنگگی کونلرده پاکستان رسميلری بیر نېچه بار آگاهلنتیریب، اگر طالبان عصیانچیلرگه قرشی چارهلر کۉرمسه، پاکستان افغانستان ایچیده ضربه بېریشدن تارتینمسلیگینی ایتگن.
طالبان اېسه افغانستانده ترورچی گروهلر، جملهدن تیتیپی بارلیگینی انکار اېتیب، هېچ بیر گروهگه افغانستان توپراغیدن باشقه دولتلرگه قرشی فایدهلنیشگه رخصت بېرمسلیکلرینی بیلدیرهدی.
