ایران تشقی ایشلر وزیری عباس عراقچینینگ ایتیشیچه، ایران و امریکا اۉرتهسیدهگی هسته مذاکرهلری اېرتهگه (جمعه،۱۷ دلو) عمان پایتختی مسقطده بۉلیب اۉتهدی.
ایران تشقی ایشلر وزیری ایکس اجتماعی ترماغیده نشر قیلگن پُستیده عمان رسميلریگه «ضرور برچه شرایطلرنی یرهتیب بېرگنلری اوچون» منّتدارلیک بیلدیرگن.
بوندن آلدین آکسیوس نشری امریکانینگ ایکّی نفر یوقاری مرتبهلی رسميسیگه تهیهنیب، جمعه کونگی مذاکرهلر اۉتکزیلهدیگن جای و اونینگ فورمتی بۉییچه کېلیشماوچیلیک سببلی بېکار قیلینگنی حقیده خبر بېرگن اېدی.
کېینراق بو نشر امریکا منطقه دولتلرینینگ باسیمی آستیده ایران بیلن مسقطده مذاکرهلر اۉتکزیشگه راضی بۉلگنینی هم معلوم قیلدی.
خلق ارا عامهوي اخبارات واسطهلری مذاکرهلر جمعه کونی استانبولده و منطقهنینگ بیر نېچه دولتلری وکیللری اشتراکیده اۉتکزیلیشی رېجهلشتیریلگنی حقیده خبر ترقهتگن اېدی.
اما ایران جمعه کونی اوشبو مذاکرهلرنی عمان پایتختی مسقطده و ایکّی تامانلهمه شکلده اۉتکزیشنی سۉرهگن.
بو مذاکرهلرده امریکانینگ یقین شرق بۉییچه مخصوص وکیلی استیو ویتکاف و ایران تشقی ایشلر وزیری عباس عراقچی اېراننینگ هسته دستوری یوزهسیدن مذاکره آلیب باریشی کوتیلماقده.
تامانلر اۉتگن ییلی هم عمان و ایتالياده بېش روند مذاکره اۉتکزگن اېدی. بیراق آلتینچی روند مذاکرهلر باشلنیشیدن بیرآز آلدین اسراییل نینگ ایرانگه هجومی سببلی بو جریان تۉختهب قالگن.
