اېران تشقی ایشلر وزیری عباس عراقچی بوگون (جمعه، ۱۰ دلو) اېرتهلب تورکيهنینگ استانبول شهریگه سفر قیلگن.
ایران تشقی ایشلر وزیرلیگینینگ معلوم قیلیشیچه، عراقچی اوشبو سفر دوامیده نهفقط تورکيهلیک همکسبی بیلن ایکّی تامانلهمه مناسبتلر همده منطقوي و خلقارا واقعهلرنی محاکمه قیلهدی، بلکه تورکيه جمهور رییسی رجب طیب اردغان بیلن هم اوچرهشوو و صحبت اۉتکزهدی.
شو وقتلر امریکا یقین شرقده اۉز حربي موجودلیگینی کوچهیتیرگن؛ بو اېسه ایرانگه قرشی احتمالي هجوم و ایکّی دولت اۉرتهسیده تۉقنهشوو خوفینی آشیرگن.
امریکا جمهور رییسی دونالد ترامپ «امریکانینگ کتّه کېمهلری ایران تامان حرکت قیلماقده و اولرنی ایشلهتیشگه مجبور بۉلمسلیگیمیز جوده یخشی دېگن»
او آلدینراق ایراننی علاجی باریچه تېزراق مذاکره چوکیسیگه قَیتیشگه چقیرگن و عکس حالده اۉتگن ییلگی هجومدن هم آغیرراق ینگی هجوم بۉلیشینی آگاهلنتیرگن اېدی.
امریکا ایراندهگی ناراضیلیکلر آرتیدن یقین شرقده حربي موجودلیگینی کوچهیتیردی.
ترامپ ایلگری، اگر ایران حکومتی ناراضیلرنی اۉلدیرسه، امریکا ناراضیلرگه یاردم بېریب، اېران حکومتیگه کوچلی ضربه بېریشینی بیلدیرگن اېدی؛ اما ینگی بیاناتلریده ایران هستوي قورالگه اېگه بۉلمسلیگی کېرهکلیگینی تأکیدلهگن.
