عادله سنگلاخی
زهرانینگ آوازی تلفون نینگ نریگی تامانیدن ساکن اېشیتیلهدی، اما اونده ییللر دوامیده تۉپلنگن اضطرابلرنینگ آغیرلیگی سېزیلیب تورهدی. بعضاً او تۉختهب قالهدی، چوقور نفس آلهدی و کېین گپینی دوام اېتتیرهدی؛ گۉیا هر بیر جمله ایتیش آسان بۉلمهگن خاطرهلر آرهسیدن اۉتیب کېلهیاتگندېک. اونینگ آوازیده غم بار، اما شو بیلن بیرگه حیاتنی دوام اېتتیریشگه بۉلگن اراده هم سۉزلریده یقّال سېزیلهدی.
زهرا غور ولایتی نینگ پسابند اولسواللیگیدن. حاضر او 28 یاشده. او حلی یېتّی یاشگه هم تۉلمهگن پیتیده آتهسیدن اَیریلگن. اۉزی بو نی انیق اېسلهی آلمهیدی، اما آنهسی نینگ ایتیشیچه، آتهسی للمی دهقانچیلیک بیلن شغللنیب یورگن پیتده قوراللنگن شخصلر تامانیدن اۉلدیریلگن. آتهسی نینگ اۉلیمی زَهرا حیاتیدهگی ایلک چوقور یاریق بۉلدی؛ بو یاریق نهفقط عایله نینگ باقووچیسینی تارتیب آلدی، بلکه اونینگ بالهلیگینی هم یریم یۉلده قالدیردی. آرهدن ایکّی ییل اۉتگچ، اوروشلر و تکرار-تکرار یوز بېرگن عایلهوي زۉرآورلیکلر سبب زَهرا نینگ آنهسی قیزینی (زَهرا آتهسی نینگ عایلهسی طلبیگه کۉره) ترک اېتیشگه مجبور بۉلدی و اۉز اکهسی نینگ اوییگه پناه تاپدی. اۉشه پیتده زَهرا اتیگی تۉقّیز یاشده اېدی. عیناً شو وقتدن باشلب، زَهرا نینگ جوده آغیر حیاتی عمکیسی نینگ اوییده باشلنهدی.
«مېن عمکیم نینگ اوییده یشردیم؛ طعامیم هر دایم عمکیم نینگ بالهلریدن قالگن طعام بۉلردی.»
زَهرا 10 یاشیدن باشلب عمکیسی نینگ پادهلرینی باقیش مسوولیتی اونینگ یېلکهسیگه یوکلندی؛ اۉزنینگ ایتیشیچه، بو ایش 10 یاشلی باله اوچون نهایتده مشقتلی اېدی. بېش ییل دوامیده زَهرا هر تانگ اېرته پادهلر بیلن تاغگه یۉل آلر، کېچگه باریب اېسه حالدن تایگن تنهسی و قهقشهگن آیاقلری بیلن اویگه قَیتردی. یالغیز تاغلرده جزیرهمه یازلر و ساووق کوزلرنی برداش بیلن اۉتکزیش اونینگ کوندهلیک حیاتی نینگ بیر قِسمیگه ایلنگن اېدی. زَهرا هېچ قچان اۉیینچاغی بۉلگنینی یاکه کیمدیر اوندن «چرچهمهدینگمی؟» دېب سۉرهگنینی اېسلهی آلمهسلیگینی ایتهدی.
بو آغیر ییللر دوامیده زَهرانینگ یگانه تسلیسی آنهسی بیلن بۉلگن قیسقه اوچرهشوولر اېدی؛ بوندهی اوچرهشوولر ییلیگه اتیگی بیر نېچه بارگینه ممکن بۉلردی: «عمکیم هر سفر فقط ایکّی کون آنهم نینگ یانیده قالیشیمگه رخصت بېرردی. آنهم نینگ اویی تخمیناً بیر یریم ساعتلیک پیاده یۉل اېدی. اۉشه ایکّی کون ایچیده آنهم ییرتیلگن کییملریمنی تیکیب بېرردی و قۉلیدن کېلسه، مېن اوچون نیمهدیر ساتیب آلردی. سۉنگ ینه عمکیم نینگ اوییگه قَیتردیم.» زَهرانینگ ایتیشیچه، اۉشه قیسقهگینه ایکّی کون اونینگ آنهلیک مِهریدن آلگن بوتون اولوشی اېدی. بالهلیگی حقیدهگی خاطرهلرینی سۉرهگنیمده اېسه، او کۉپراق آدملر حقیده اېمس، بلکه قۉیلر حقیده گپیرهدی.
زَهرانینگ 15 یاشگه تۉلگن بهاریده اونینگ حیاتی ینه باشقه بیر بحرانلی باسقیچگه کیردی. عمکیسی اونی یقینده اېراندن قَیتیب کېلگن بیر اېرکککه تورموشگه بېریشگه قرار قیلدی؛ زَهرا حاضر تخمین قیلیشیچه، او اېرکک قریب 28 یاشلر اطرافیده بۉلگن.
«مېن عموماً نکاح نیمه اېکنینی بیلمسدیم. اۉشه اېرکک عمکیم نینگ اوییگه کېلگنیده، مېن اونی قۉی ساتیب آلیش اوچون کېلگن دېب اۉیلهگندیم.» اۉشه اېرکک اویلرنی ترک اېتگن کېچه نینگ اېرتهسیگه عمکیسی زَهراگه شوندهی دېدی: بو آدم سېنی کۉریش اوچون کېلگن، کېینراق ساوچیلیککه کېلهدی. سېن او بیلن تورموش قوریشینگ کېرهک. بو خبر تېز آرهده قیشلاق بۉیلب ترقهلدی و زَهرا نینگ آنهسی هم واقعهدن خبر تاپدی. «اۉشه کونلرده، مېن پادهلر بیلن تاغده یورگن پیتیمده آنهم کېلیب قالدی. جوده کۉپ ییغلردی. بو گپلر راستمی-یۉقمی، دېب سۉردی.»
آنهسی بو رېجه بیلن کېلگن اېدی: اگر زَهرا نینگ تورموشی حقیدهگی گپلر راستدن هم حقیقت بۉلسه، اونی اۉزی بیلن آلیب کېتهدی و ایکّلهسی هراتگه باریشهدی. زَهرا آنهسیگه بو مسأله راست اېکنینی ایتدی. اما زَهرا آنهسی بیلن هراتگه کېتیش قراری قندهی عملگه آشیشینی بیلمس اېدی؛ نه پول بار اېدی، نه امکانیت. فقط قۉرقوو و موهوم بیر امید بار اېدی، خلاص. شونگه قرهمهی، او آنهسی نینگ قراریگه ایشاندی. آنهسی اونگه کېتیش پیتیگچه عمکیسیگه هېچ قندهی قرشیلیک کۉرسهتمسلیکنی تعیینلهدی. رېجهگه کۉره، زَهرا تېز آرهده آنهسی نینگ آلدیگه باریشی کېرهک اېدی.
ایکّی-اوچ کوندن سۉنگ، زَهرا آنهسینی کۉریش بهانهسی بیلن عمکیسیدن رخصت آلدی. آنهسی نینگ اکهسی، تاغهسی نینگ اوییگه بارگچ، او یېرده آنهسی و تاغهسی بیلن بیرگه هرات تامانگه یۉل آلدیلر.
یاروغلیککه آچیلگن، اما ینه یاپیلگن دېرَزه
هراتده یشش نینگ دستلبکی ییللری هم زَهرا اوچون آسان کېچمهدی. هراتگه جایلشگچ، آنهسی جسماني حالتی ضعیف بۉلیشیگه قرهمهی، کوندهلیک خرجتلرنی تأمینلش اوچون آدملر نینگ کییملرینی یوودی، اوی تازهلش ایشلری بیلن شغللندی. اۉشه ییللرده زَهره سوادخوانلیک کرسیگه قتنهب، اۉقیش و یازیشنی اۉرگندی. شوندن سۉنگ او انگلیس تیلینی اۉرگنیشگه قرار قیلدی. بو قرار اونینگ حیات یۉلینی یاروغلیک و آچیلیش تامانگه بوردی.
زَهرا کتّه سعی-حرکت بیلن انگلیس تیلینی اۉرگندی و اۉزی اوچون ایش یۉلینی آچدی. اۉشه پیتلرده زَهرا نینگ آنهسی بیر خصوصي مکتبده خدمتکار صفتیده ایش باشلهدی و اولر نینگ حیاتی، برچه قیینچیلیکلرگه قرهمهی، معلوم درجهده برقرارلیک و ایشانچگه اېگه بۉلدی. جمهوریت توزومی نینگ سۉنگگی ییللریده زَهرا ایکّی انگلیس تیلی اۉقوو مرکزیده درس بېرر، آییگه قریب 30 مینگ افغاني درآمد تاپر اېدی. اونینگ ایتیشیچه، بو درآمد اۉزی و آنهسی اوچون نسبتاً یخشی حیات کېچیریش امکانینی بېرگن اېدی. اما طالبلر قَیتیشی بیلن همه نرسه برباد بۉلدی. حاضر زَهرا فقط آنلاین طرزده انگلیس تیلیدن درس بېره آلهدی؛ بو ایش نینگ بازاری هم اونچهلیک چقّان اېمس و اوندن توشهیاتگن کم درآمد حتا حاضر کسل بۉلیب قالگن آنهسی نینگ دوالنیش خرجتلرینی هم قاپلهی آلمهیدی. باشقه تاماندن، زَهرا دایما عمکیسیدن قصاص آلینیشی ممکن دېگن قۉرقوونی یورهگیده آلیب یورگن اېدی، اېندی اېسه بو قۉرقوو ینهده کوچهیگن. او عمکیسی طالبلر یاردمیده اۉزی و آنهسی نینگ حیاتینی ینهده اچّیق، حاضرگیدن هم آغیرراق قیلیب یوباریشیدن خواطرده. زَهرا هنوز تورموش قورمهگن. اېندی اېسه اونینگ حیاتی بوندن کېین قَیسی یۉلدن باریشینی اۉزی هم بیلمهیدی.
