خالد محمدی
تخمیناً اۉن کون اوّل، اېرککلر فیزیک یۉنهلیشیدهگی «مستر المپیا» مسابقهسی نینگ سۉنگگی ایکّی دورهسیده نایب قهرمان بۉلگن علی بلال بادیبیلدینگ ساحهسیدهگی اېنگ ییریک مسابقه اشتراکچیسی افغانستانگه سفر قیلدی. اونینگ سفری افغانستان سپورت جماعتچیلیگی تامانیدن ایلیق کوتیب آلیندی. بیراق او طالبان عملدارلری نینگ مهماندۉستلیگی و قبولیدن تأثیرلنیب، طالبان حکمرانلیگی آستیدهگی افغانستان خوفسیزلیک جهتیدن اروپاگه قرهگنده یخشیراق احوالده اېکنینی دعوا قیلدی. بو بیانات اونینگ اطرافیده تورلی بحث-مناظرهلرگه سبب بۉلدی و نتیجهده او کېینگی بیر نېچته ویدیولریده اۉز فکری نینگ مقصدینی ینه-ده به تفصیل توشونتیریشگه حرکت قیلدی.
او کابلده عاموی اخبارات واسطهلری بیلن قیلگن ایلک مصاحبهسیده شوندهی دېگن اېدی: «افغانستانده خوفسیزلیک بارلیگینی بیلمس اېدیم. اروپاده آدملر افغانستانده خوفسیزلیک یۉق، دېب ایتیشردی. مېنگه: «افغانستانگه بارگهنینگنی هېچ کیمگه ایتمه»، دېب مصلحت بېریشردی. افغانستاندهگی خوفسیزلیک اروپانیکیدن کۉپراق». علی بلال نینگ بو گپلری قَیته ترقهتیلگچ، آدملر آرهسیده کېنگ مناسبت اویغاتدی. شوندن سۉنگ او کابلدهگی تصویري تصویری یېتکرمهلردن بیری بیلن قیلگن ایکّینچی مصاحبهسیده آدملر اونینگ سۉزلرینی ناتۉغری توشونگنینی ایتدی و بوندهی ایضاح بېردی: «مېن «وطنده حاضر خوفسیزلیک بار» دېگن اېدیم. آدملر افغانستان اروپا کبی خوفسیز، دېب اۉیلشدی. اوندهی اېمس، آدملر نینگ جوده کۉپ معمالری بار. مېن اَیتماقچی بۉلگنیم، حاضر اۉغریلیک و شونگه اۉخشش نرسهلر یۉقلیگی اېدی. بېش ییل آلدین افغانستانگه کېلگنیمده، قارانغی توشگندن کېین عموماً اوییمدن چیقه آلمهسدیم. اگر یانینگده تیلفون بۉلسه، اونی چۉنتهگینگدن هم چیقریب بۉلمسدی».
طالبان اسکورتی و خوفسیزلیک روایتی
بو ایضاحلر شوندهی بیر پیتده بیلدیریلدیکی، علی بلال جمهوریت توزومی دوریده افغانستانگه کېلگنیده، اۉز ایتیشیچه، اروپاده قوریلیش ایشلریده بند بۉلگن و حلی بادیبیلدینگ ساحهسیده مشهورلیککه اېریشمهگن اېدی. اما بو سفر او بادیبیلدینگ نینگ تنیقلی چهرهسی صفتیده کابلگه کېلدی، لوکس و اۉق اۉتمس موترده حرکتلندی، حتا طالبان اونی بیر نېچه شاسی بلند موترلر بیلن اسکورت قیلیب یوردی.
علی بلال نینگ افغانستانده خوفسیزلیک تأمینلنگنی حقیدهگی دعوالری طالبان طرفدارلری تامانیدن اجتماعي ترماقلرده، شونینگدېک، اوشبو گروه نظارتیدهگی یېتکرمهلرده کېنگ طرزده یاریتیلدی. اولر بو گپلرنی طالبان نینگ حاکمیتگه قَیتیشی بیلن مملکتده خوفسیزلیک قَیته تیکلنگنی نینگ دلیلی صفتیده تقدیم اېتدیلر.
اما بو تنگه نینگ فقط بیر تامانی خلاص. اونینگ باشقه تامانی شوندهکی، جمهوریت توزومی دوریده طالبان حکومتگه قرشی قوراللی هجوملر اویوشتیریب کېلگن و پارتلشلر همده خودکوشلیک (انتحاري) هجوملرینینگ کتّه قِسمی عیناً شو گروه تامانیدن عملگه آشیریلگن. حاضر اېسه طالبان حاکمیتنی قۉلگه آلگچ، بوندهی هجوملردن واز کېچگن. شو باعث، بوندهی بیاناتلر طالباننی تنقید قیلووچی و اونگه قرشی بۉلگن دایرهلر آرهسیده بو گروهنی «عاديلشتیریش» و «آقرتیریش» صفتیده تلقین قیلیندی همده کېنگ تنقیدلرگه سبب بۉلدی.
جنجللی تصویرلردن الکترون شخصي گواهنامه و پاسپورتگچه
علی بلال نینگ هم بیر قطار صورتلری ترقهلدی. اوشبو صورتلرده او قوراللنگن طالبان کوچلری یانیده کۉرینهدی. تصویرلردن بیریده علی بلال ایکّی نفر طالبان اعضاسی آرهسیده تورگنی عکس اېتگن بۉلیب، اولر نینگ یوزلری قاره نقاب بیلن یاپیلگن و اولردن بیری امریکا ایشلب چیقریلگن امفور روسوملی قورالنی اوشلب تورگن. بوندهی کيینیش اسلوبی عادتده طالبان استخبارات کوچلریگه خاص بۉلیب، اولر اۉز شخصینی یشیریش مقصدیده یوزلرینی یاپیب یوریشهدی.
افغانستاندن چیقیب کېتگنیدن سۉنگ، علی بلال اۉزی نینگ انستاگرام صحیفهسیده نشر قیلگن ویدیوده افغانستاندهگی خوفسیزلیک حقیدهگی گپلریدن مقصدی «جاني خوفسیزلیک» بۉلگنینی ایتدی: «خوفسیزلیک نینگ بیر نېچه توری بار: جاني، مالیوي، اجتماعي و اقتصادي خوفسیزلیک. مېنینگ نظرده توتگنیم فقط جاني خوفسیزلیک اېدی، یعنی جانیمیزگه هېچ قندهی خوف یۉق اېدی. بیر نېچه ییل اوّل افغانستانگه بارگنیمده احوال جوده یامان اېدی، بیرگینه تیلفون سبب آدملرنی اۉلدیریشردی و قارانغی توشگچ اوییدن تشقریگه چیقیب بۉلمسدی. حاضر اېسه بوندهی گپلر یۉق. افغانستانده خوفسیزلیک بار، جاني خوفسیزلیک. فقط و فقط شو نرسهنی نظرده توتگن اېدیک.»
«بیز سپورتچیلرمیز و ایشیمیز افغانستان همده اونینگ خلقی اوچون مدال و فخر آلیب کېلیش دیر. بیز نینگ ایشیمیز فقط و فقط شو، بوندن باشقه هېچ نرسه اېمس». اوشبو سفر دوامیده طالبان نینگ جسماني تربیه و المپیک بۉییچه عمومی اداره سی باشلیغی احمدالله وثیق علی بلالنی کابلدهگی الکترون شخصي گواهنامهلر ترقهتیلهدیگن مرکزلردن بیریگه آلیب باردی و اونگه شخصي گواهنامه رسميلشتیریب بېردی.
علی بلال، شونینگدېک، افغانستانلیک شخصیتگه اېگه بۉلگن باشقه سپورتچیلر و مشهور (سلېبریتی) شخصلرنی هم افغانستان شخصي گواهنامهسینی آلیشگه چقیردی و شوندهی دېدی: «مېن افغان شخصي گواهنامهسینی آلیش اوچون کېلدیم، شونده بوندن کېین هم افغانستان نامیدن مسابقهلرده قتنهشه آله من. بو یېرگه کېلیب جوده حیران قالدیم، شخصي گواهنامنی جوده آسان آلیش ممکن اېکن. حتا سپورتچیلر و سلېسبریتیلر اوچون مصافهوي بۉلیم (یعنی شخصي گواهنامنی مصافهدن توریب بېریش) هم موجود. سیزلر هم کېلیب شخصي گواهنامه آلیشینگیز ممکن. هر بیر افغان شخصي گواهنامهگه اېگه بۉلیشی کېرهک». شوندن سۉنگ احمدالله وثیق اۉزی نینگ ایکس اجتماعی صحیفهسیده علی بلال گه افغانستان پاسپورتی مسألهسی بۉییچه هم توشونتیریش بېریلگنی حقیده یازدی.
سپورتدهگی چېکلاولر، عیاللر سپورتی نینگ منع اېتیلیشی و سکوت
اوّل افغانستان نینگ آلدینگی حکومتی و اونینگ غربي اتفاقچیلریگه قرشی ترغیبات اوروشینی آلیب بارگن طالبان حکومتی همده اونینگ ترغیباتچی چهرهلری اېندیلیکده اۉز نظارتیدهگی افغانستاندهگی وضعیتنی «عادي حالت صفتیده کۉرسهتیش» (نارمهللشتیریش) وظیفهسینی بجرماقده. اجتماعي ترماقلر انفلوئنسرلری و تنیقلی سپورت چهره لری نینگ جملهدن کریکت و بادیبیلدینگ ساحهلریدهگی مشهورلر نینگ افغانستانگه سفری هم عیناً شو دایرهده تلقین قیلینهدی. طالبان نینگ ترغیبات مسووللریدن بیری بۉلگن احمدالله وثیق علی بلال نینگ افغانستانگه کېلیشیدن خبردار بۉلیب، اونی کوتیب آلیش مراسمینی تشکیل قیلدی. بو آرقهلی طالبان حکومتی سپورتچیلر و سپورت فعالیتینی قۉللب-قوّتلهیاتگندېک کۉرسهتیشگه اوریندی. مراسم چاغیده بیر نېچته یاش سپورتچیلر علی بلال و طالبان عملدارلری حضوریده کۉرگزمهلی مشقلرنی نمایش اېتدیلر، بیراق اولر نینگ هېچ بیریگه سان موشکلرینی آچیق کۉرسهتیشگه رخصت بېریلمهدی.
اوّلراق طالبان اېرککلر سپورت مسابقهلریده سانلرینی کۉرسهتمسلیک، اولرنی شیم (پتلون) بیلن یاپیب یوریش بۉییچه بویروق بېرگن اېدی. شونگه قرهمهی، علی بلال بو چېکلاولر بارهسیده سکوت سهقلهدی و حتا افغانستاندن چیقیب کېتگنیدن کېین هم بو مسألهده هېچ قندهی مناسبت بیلدیرمهدی. تنه توزیلیشی، موشکلر نمایشی و حرکت اېرکینلیگیگه اساسلنگن سپورت توری صفتیده بادیبیلدینگ طالبان سپورتچیلر تنهسی و کيینیشیگه یوکلهیاتگن چېکلاولر بیلن آچیقدن-آچیق ضد کېلهدی. طالبان عملدارلری اشتراکیده کۉرگزمهلی مشقلر بجریلیشی، بیراق سان موشکلرینی کۉرسهتیش تعقیقلنگنی بو ضدیت نینگ یقّال رمزیدیر. بو ضدیت نهفقط اوشبو سپورت توری نینگ ماهیتینی سوال آستیگه قۉیهدی، بلکه چېت اېلّیک مهمان نینگ بو حالتگه نسبتاً سکوتی هم اوشبو چېکلاولر نینگ «عاديلشتیریلیشیگه» خدمت قیلماقده.
شو بیلن بیرگه، طالبان عیاللر سپورتینی بوتونلهی تعقیقلب قۉیگن. اولر نهفقط عیاللر نینگ حرفهای سپورتده قتنهشیشینی منع قیلگن، بلکه اېرککلرسیز فعالیت یوریتگن عیاللرگه مۉلجللنگن فیتنېس سالونلری هم یاپیلگن. شو بیلن بیرگه، علی بلال اروپا سپورت سالونلریده مشق قیلهدی، او یېرده عیاللر و اېرککلر جنسیدن قطعي نظر اېرکین روشده سپورت بیلن شغللنهدی. طالبان نظارتیدهگی افغانستانده مشهور شخصلر نینگ رۉلی و اولر نینگ تأثیری شوندهیکی، اولر نینگ سکوتی اتوماتیک روشده خنثی حسابلنمهیدی. طالبان اېسه اوشبو شخصلر نینگ اشتراکیدن وضعیتنی «عادي حالت» صفتیده کۉرسهتیش روایتینی مستحکملش اوچون فایدهلنیشگه حرکت قیلهدی؛ بو اشتراکنی تأکیدلش آرقهلی موجود حقیقتلر نینگ بیر قِسمینی یشیریشگه خدمت قیلهدی.
