پاکستان تینچلیک تدقیقاتلری انستیتوتی (PIPS) گزارشیگه کۉره، اۉتگن میلادي ییلده اوشبو مملکتده هجوملر ۳۴ فایزگه آشگن.
گزارش آمازی معلوماتلرگه اساسلنیب ایتیلیشیچه، بو دورده پاکستان بۉیلب جمعی ۶۹۹ ته هجوم قید اېتیلگن. هجوملر نینگ۹۵ فایزدن آرتیغی خیبر پختونخوا و بلوجستان منطقهلریگه تۉغری کېلگن.
دان نشرینینگ یازیشیچه، اوشبو هجوملر عاقبتیده کمیده بیر مینگ ۳۴ کیشی هلاک بۉلگن و ینه بیر مینگ ۳۶۶ کیشی جراحتلنگن.
پاکستان تینچلیک تدقیقاتلری انستیتوتی حساباتیده تأکیدلنیشیچه، تروریزم بیلن باغلیق قربانلر سانی هم اۉتگن ییلده اوّلگی ییلگه نسبتاً ۲۱ فایزگه آشگن.
معلوماتلرگه کۉره، خوفسیزلیک کوچلری و پولیس خادملری تروریزم بیلن باغلیق عمومي تلفاتلر نینگ۴۲ فایزیدن آرتیغینی تشکیل اېتگن بۉلیب،۴۳۷نفر خوفسیزلیک خادمی هلاک بۉلگن.
عادی اهالی هم جدّي ضرر کۉرگن:۳۵۴ نفر تینچ اهالی حیاتدن کۉز یومگن.
شو بیلن بیرگه،۲۴۳ نفر جنگری یاکه اۉزلری عملگه آشیرگن خودکش هجوملر چاغیده، یاکه اَیریم ترورچیلیک هجوملریدن کېین خوفسیزلیک کوچلرینینگ جواب اۉقی آستیده هلاک بۉلگن.
گزارشده ینه قید اېتیلیشیچه، هجوملر نینگ۹۵ فایزدن آرتیغی خیبر پختونخوا و بلوجستانده صادر بۉلگن.
دان نیوزنینگ یازیشیچه، خیبر پختونخواده هجوملرنینگ ۴۰ فایزگه آشگنی تحریک طالبان پاکستان (تیتیپی) و اونگه علاقهدار گروهلر نینگ چوقور ایلدیز آتگنینی کۉرسهتهدی. اوشبو ولایت۲۰۲۵ ییلده۴۱۳ته هجوم بیلن پاکستانده اېنگ کۉپ هجوم قید اېتیلگن منطقه بۉلگن.
پاکستان رسميلرینینگ ایتیشیچه، افغانستانده طالبان حاکمیتگه کېلگنیدن سۉنگ پاکستاندهگی هجوملر کۉپهیگن. اسلام آبادگه کۉره، پاکستانلیک جنگریلر افغانستانده جایلشگن و اوشبو مملکت توپراغیدن پاکستانگه قرشی فایدهلنماقده.
پاکستان حکومتی بیر نېچه بار طالباندن پاکستانلیک جنگریلرگه، جملهدن تیتیپیگه قرشی چارهلر کۉریشنی طلب قیلگن، بیراق طالبان بو گروهلرنینگ موجودلیگینی انکار اېتیب کېلماقده.
