فاروق علیم افغانستان حکومتی قولهگندن سۉنگ بویوک بریتانیاگه مهاجر بۉلدی. اونینگ اویینی دستلب عایلهسی اعضالری باشقرگن، لېکن طالبان اونی عایلهسینینگ نظارتیدن آلیب قۉییشدی. علیم اطلاعات روز گزېتهسی بیلن صحبتده ایتیشیچه، او کابلده قارهلاوچی صفتیدهگی ایشینی یۉقاتگچ، وطنی پنجشیرگه قَیتیب، اۉز اوییده یشهگن، اما طالبان هېچ قندهی سبب کۉرسهتمهی، اونینگ «تنخو» قیشلاغیدهگی اویینی اېگهللب آلگن. بو واقعه بهار فصلیده یوز بېرگن و حاضرگچه طالبان اویدن چیقیشگه نیت قیلمهگن. پنجشیرده سابق حکومت مسووللری، سیاستچیلر و حتا عادي یشاوچیلرنینگ اوی-جایلرینی اېگهللش بۉییچه کۉپلب حالتلر قید اېتیلگن. علیم شوندهی دېیدی: «افغانستان قولهگن بیرینچی آیلریده طالبان اوییم نینگ اېشیگینی تقیللهتیشدی. اکهم باریب اېشیکنی آچدی و مېنگه کېلیب، دېدی: طالبلر کېلگن، اویدن چیقیشینگیزنی ایتیشهیپتی.»
فاروق علیم بو پیامنی اېشیتیب، طالبان بیلن گپلشیش اوچون اېشیککه بارهدی، لېکن او یېرده قوراللنگن تخمیناً۲۰ کیشی طالبان قۉشینی بیلن تۉقنش کېلدی؛ «اولر بیلن گپلشگنیمده هېچ قندهی سببنی قبول قیلیشمهدی و شوندهی دېدیلر: سبب سۉرمهنگ، تېزده اوینی بۉشهتینگ، عکس حالده بیز اویگه کیرهمیز.»
سابق قارهلاوچی، عایلهسینینگ مصلحتیگه بناءً، اویینی عایلهسی بیلن بیرگه ترک اېتهدی و طالبان او یېرگه جایلشهدی. او اویینی اېگهللب آلگنیدن و احتمالي قصاص هجوملریدن قۉرقیب، افغانستاندن چیقیب، اوّل ایرانگه، سۉنگره بویوک بریتانياگه مهاجر بۉلدی.
فاروق علیمنینگ سۉزلریگه کۉره: طالبان اویدن چیققندن سۉنگ آلتی آی اۉتیب، اویگه کتّه ضرر یېتکزیشگن؛ «طالبان چیقیب کېتگچ، اوینی جدّي ترمیملش کېرهک اېدی. اېشیکلر و دېرَزهلرنی بېپروالیک سبب بوزیب تشلشگن، حمّام نینگ دستشویلرینی سیندیریشگن و حویلینی افلاس حالیگه کېلتیریشگن.»
او شونینگدېک، اوینی ترمیملشدن سۉنگ، تخمیناً بیر ییل اۉتیب، طالبان اونی ینه اېگهللب آلیشگنینی، هېچ قندهی سبب کۉرسهتمهگنینی بیلدیرهدی. حاضر او لندنده مینگلب کیلومتر اوزاقلیکده یشهیدی و اویینی قَیتریب آلیش بۉییچه هېچ قندهی امید کۉرمهیدی. علیم نینگ فکریچه، طالبان نینگ پنجشیرده قطعيلیک قیلگنی حقیدهگی مصاحبهلری اونینگ اویینی ینه اېگهللش اوچون بهانه بۉلگن.
اویینی قَیتریب آلیش ایستهگی رد اېتیلدی
اطلاعات روز گزېتهسی نتیجهلریگه کۉره، طالبان اېگهللب آلگن اویلر نهفقط حربي قرارگاه صفتیده ایشلهتیلماقده، بلکه بعضی طالبان قوماندانلری عایلهلرینی هم شو اویلریگه جایلشتیرگن. افغانستانده بۉلگن کۉپلب ملکدارلر اېسه طالباندن قۉرقیب، مصاحبه بېریش یاکه تفصیلاتلرنی آشکار قیلیشگه جرعت قیلمهیپتی.
محمد (مستعار آت)، امریکاده مهاجرلیکده یشاوچی طالبان تنقیدچیلریدن بیری، طالبان حاکمیتگه قَیتگن دستلبکی کونلرده اولرنینگ اویی دروازهسی نینگ قفلینی سیندیریب، اوینی اېگهلهگنینی ایتهدی.
او شونی قۉشیمچه قیلهدی، عایلهسی بیر نېچه بار اویینی قَیتریب آلیشگه اورینیب کۉرگن، لېکن نتیجه بۉلمهگن؛ «طالبان قوماندانلریدن بیری اویدن چیققنده، اوینینگ کلیتینی باشقه قوماندانگه بېریب قۉیهدی.»
محمدنینگ کۉپهیتیریشیچه، آتهسی بیر مرته کابلدن پنجشیرگه باریب، طالباننی اویینی بۉشهتیشگه قانیقتیرماقچی بۉلگن، اما موفقیتگه اېریشه آلمهدی؛ «طالبلر، یوقاری قبتده بیز یشهیمیز، پستکی قبتگه اېسه عایلهنگیزنی آلیب کېلینگ و یشنگ دېگن.»
بو پیشنهاد محمدنینگ آتهسی اوچون مقبول بۉلمهگن و او ینه کابلگه قَیتگن. محمد هم، طالباننی اوییدن چیقریش ممکن بۉلیشینی بیلمهیدی.
غضب اېتیلگن اویلرنی بوزیش
طالبان پنجشیر اهالیسینینگ اویلرینی اېگهللش بیلن بیرگه، اولرنی سقلش و نظارت قیلیش بۉییچه هېچ قندهی ثمرهلی چاره کۉرمهیپتی. اوشبو اویلر فقط ایشلهتیلگن پیتده فایدهلنیلهدی، سۉنگره ویرانهگه ایلنگچ، طالبان او یېرنی ترک اېتهدی.
اطلاعات روزنینگ معلوماتیگه کۉره، اوی اېگهلری تامانیدن اوینی قَیته ترمیملشدن سۉنگ، طالبان احتمال ینه اویلرگه قَیتهدی؛ بو تکراري ایلنیش اهالی اوچون کتّه مالیوي ضرر کېلتیرهدی.
رشاد (مستعار آت) اوچ قبتلی اویی اوچ ییل دوامیده طالبان نینگ نظارتی آستیده بۉلگن و قوماندانلر نوبت بیلن اوینی حربي قرارگاه صفتیده ایشلهتیشگنی تیلگه آلهدی. اوی یشش ممکن بۉلمهگن حالگه کېلگچ، طالبان اونی ترک اېتگن.
او شوندهی دېیدی: «پنجشیر قولهگنده، بیز طالباندن قۉرقیب، اوییمیزنی ترک اېتدیک. طالبان اوییمیزگه حربي قرارگاه قوردیلر. اوییمیز اېندی یشش ممکن بۉلمهگن حالگه کېلدی.» اونگه کۉره، اویینی قَیته تیکلشگه۳۰۰ مینگ افغانیدن آرتیق مبلغ کېتهدی و بونی مالیوي جهتدن قیله آلمهیدی.
اطلاعات روز گزېتهسی قۉلگه کیریتگن خلاصه لرگه کۉره، پنجشیرده طالبان تامانیدن اېگهللنگن اوچته تورر-جای اویی یانغینده ویران بۉلگن و طالبان بونی نیمه سببدن قیلگنی حقیده ایضاح بېرمهگن. اوشبو اویلر ولایت مرکزی و رخه اولسواللیگیده جایلشگن بۉلیب، اولر سابق حکومتده عدلیه وزیری بۉلگن فضل احمد معنوي، سابق تیزیمده پنجشیر والیسی کمال آلدین نظامي و تاجیکستاندهگی افغانستان اېلچیسی ظاهر اغبرگه تېگیشلی بۉلگن.
پنجشیر سابق والسی کمال الدین نظامی، پنجشیر مرکزیدهگی «بادقول» قیشلاغیدهگی اویی طالبلر تامانیدن یاندیریلگندن سونگ اطلاعات روز گزېتهسی بیلن صحبتده ایتیشیچه، «اوییمنی تخمیناً قیرق ییل اوّل شخصي مبلغیم بیلن قورگن اېدیم و وطنیمنی ترک اېتگنیمدن سۉنگ، اویده یقینلریمیزدن بیری یشردی. طالبان اولرنی اویدن چیقریب، اویینی حربي قرارگاه صفتیده ایشلهتدی. اویدهگی برچه جهازلریم، آتهمدن میراث قالگن و مېنگه جوده قدرلی بۉلگن نرسهلر بوتونلهی یاندی، و طالبان محلي اهالیدن آلاونی اۉچیریشگه رخصت بېرمهدی.»
یانغینلرنینگ نیمه سبب بیلن یوز بیرگنی انیق اېمس
گرچه پنجشیر افغانستان نینگ میدان جهتیدن اېنگ کیچیک ولایتی بۉلسه-ده، طالبان بو یېرده آغیر و کېنگ مقیاسلی حربي موجودلیککه اېگه. اولر اۉزلرینینگ قرارگاهلری، پُستلری و حربي کامتینگېنتلرینی تورلی حدودلر و تورر-جای اویلریده جایلشتیرگن. اوشبو گروه افغانستانده حاکمیتنی قَیته قۉلگه کیریتگنیدن آرتیقچه تۉرت ییل اۉتگن بۉلسه-ده، پنجشیرده طالبان نینگ قتّيق قۉللیگی و کوچلی حربي اشتراکی کمهیمهگن.
ایکّی آی اوّل محمد آغا حکیم، طالبان نینگ پنجشیر والیسی، اوشبو ولایتده اولر نینگ حربي کوچلری موجودلیگی جیوگرافیک توزیلمه و اولر یوزهگه کېلهدیگن خوفسیزلیک تهدیدلری سببلی جوده کېنگ اېکنینی تن آلگن اېدی. او طالبانگه قرهشلی «رادیو حریت»گه بېرگن صحبتیده پنجشیرده اوی اجارهسی بۉییچه طلب آشگنینی و اهالینینگ اوی تاپیشده قیینچیلیکلرگه دوچ کېلهیاتگنینی ایتگن. بو آرهده طالبان پنجشیر اهالیسی یشهیاتگن بعضی تورر-جای اویلرینی اېگهللب آلگن و بو اویلر اولرنینگ حربيلری همده اَیریم عایله اعضالریگه بېریلگن.
