پاکستان رسميلرینینگ معلوم قیلیشیچه، پیشاور شهریدهگی فدرال پولیس مرکزیگه اویوشتیریلگن اۉزینی پارتلهتیش هجومی نتیجهسیده اوچ نفر پولیس خادمی اۉلگن، بېش کیشی اېسه یرهلنگن.
اکسپرس تریبونې خبریگه کۉره، بو هجوم بوگون اېرتهلب (دوشنبه، ۳ قوس) پیشاور شِمال-غربي قِسمیدهگی سدار منطقهسیده صادر بۉلگن.
خیبر پختونخوا پولیسینینگ معلوماتیگه کۉره، هجومده اوچ نفر اۉزینی پارتلهتووچی اشتراک اېتگن. اولردن بیری پارتلاوچی مادّهنی دروازهده پارتلهتگن، قالگن ایکّی کیشی اېسه محلگه کیریشگه موفق بۉلگن، اما اۉق اوزیلیشی نتیجهسیده هلاک بۉلگن.
خیبر پختونخوا باش تېرگاوچیسی ذوالفقار حمیدنینگ سۉزلریگه کۉره: «اوچهله جنگری آلیب باریلگن عملیات دوامیده اۉلدیریلدی.»
لیدی ریدینگ شفاخانهسی سۉزلاوچیسی محمد عاصم نینگ بیلدیریشیچه، هلاک بۉلگنلر و جراحتلنگنلر آرهسیده فدرال پولیس خادملری و تینچ اهالی هم بار. کسلخانه مسووللری جراحت آلگنلرنینگ حالتی یخشیلیگینی تأکیدلهگن.
پشاور پولیسی باشلیغی میان سعیداحمدنینگ سۉزلریگه کۉره، احتیاط چارهسی صفتیده پارتلش جایی اۉرهب آلینگن و شهر بۉیلب کیریش-چیقیش جایلری یاپیلگن.
اونینگ معلوماتیگه کۉره، تازهلش عملیاتی دوام اېتماقده و یکونلنگچ، یۉللر قَیته آچیلیشی کوتیلماقده.
حاضرگچه بو پارتلش اوچون هېچ بیر گروه جوابگرلیکنی اۉز ذمّهسیگه آلمهگن.
