طالبان نظارتیدهگی ملي تلویزیونینینگ پنجشیردهگی بۉلیمی پنجشیر مرکزیدهگی «ولی محمد شهید» مکتبینینگ بیر قنچه اۉقووچیلریدن پاکستاننینگ افغانستانگه هوا هجوملرینی قارهلاوچی ویدیولرنی صورتگه آلگن. اوشبو ویدیولر اۉقووچیلرنینگ اشتراکیده تیارلنگن بۉلسه-ده، اولر نینگ آته-آنهلری بو ایش حقیده خبردار قیلینمهگن.
اوشبو مکتبنینگ بیر اۉقووچیسی اطلاعات روز گزیتهسیگه ایتیشیچه، مصاحبه سۉراوی اۉقیتووچینینگ تاپشیریغی بیلن عملگه آشیریلگن. «طالبان اعضالریدن بیری صنفداشلریمگه دېدی: بیز سیزگه کامرهگه نیمه دېییشینگیزنی ایتهمیز، فقط بیر نېچته جمله. شوندن سۉنگ صنفداشلریم تشقریگه چیقیب، طالبان بیلن صحبت قیلیشدی.»
شوندن سۉنگ، اوشبو ویدیولر پنجشیردهگی طالبان والیسینینگ مطبوعات بۉلیمی تامانیدن هم اجتماعي ترماقلرده شریک قیلیندی. مجبوري صحبت طالبان حکومتی بیلن پاکستان اۉرتهسیدهگی ترنگلیک آشگنیدن سۉنگ اۉتکزیلگن بۉلیب، صورتگه آلینگن ویدیولرده مکتب اۉقووچیلری طالبان حکومتینی قۉللب-قوّتلشینی بیلدیرهدی و پاکستانگه آگاهلنتیریش بېرهدی.
طالبان وصفیده جبری ترانه اۉقیش
طالبان نینگ پنجشیردهگی معارف ادارهسی هر بیر مکتبده «انجمن» ناملی فرهنگی دستورلرنی تشکیل اېتیش بۉییچه کۉرسهتمه بېرگن. اوشبو دستورلر، طالبان و اولر نینگ ییگیرمه ییللیک اوروشی مدحیهسینی اۉقیشدن عبارت بۉلیب، کمیده هر ایکّی آیده مکتبلرده اۉتکزیلهدی.
یما (مستعا)، پنجشیردهگی دولت مکتبلرینینگ باش اۉقیتووچیلریدن بیری، طالبان نینگ بالهلر و اۉسمیرلر اوچون ترغیبات فعالیتلرینی اۉتکزیش بۉییچه کۉرسهتمهلریگه قرشی توره آلمهسلیکلرینی ایتهدی و پنجشیردهگی مکتبلرده طالبان مدحیهسینی اۉقیش و مقاله یازیش مجبوري اېکنلیگینی بیلدیرهدی. او اطلاعات روز گزیتهسیگه شوندهی، «بیز هم اوشبو دستورلرنی اۉتکزهمیز و معارف ریاستی رهبریتی نینگ کۉرسهتمهلریگه موافق، بو انجمنلرده اۉقووچیلر امارت، مجاهد، فلسطین حقیده قۉشیقلر کویلشهدی، شونینگدېک آته-آنه، اۉقیتووچی و باشقه حماسی همده طالباننی ترغیب قیلووچی موضوعلرده مقالهلرنی اۉقیشهدی.»
اونینگ ایتیشیچه، طالبان اۉقووچیلرنی رسمي ییغیلیشلریگه آلیب بارهدی، او یېرده طالبان نمایندهلری حضوریده قۉشیقلر کویلش و حکومت بیلن باغلیق دستورلرنی بجریشلری کېرهک.
«طالبان اۉقووچیلریمیزنی ییغیلیشلرگه آلیب بارهدی، اولر قۉشیقلر کویلشهدی و پنجشیر ولایت والیسی همده باشقه منصبدار شخصلر اولسواللیگیمیزگه کېلگنیده، میکروفون آرتیگه آلیب چیقیب، توصیفي قۉشیقلرنی کویلشلرینی طلب قیلهدی.»
پنجشیردهگی بعضی آته-آنهلر اطلاعات روزگه ایتیشیچه، طالبان نینگ معارف ریاستی اۉقووچیلر اوچون کۉک و آق رنگلی کۉیلک و شیم، شونینگدېک پکول و رۉمال ساتیب آلگن و قۉشیقلر کویلش وقتیده بو کییملرنی کيدیرهدی. دستور توگهگچ، اۉقووچیلر کییملرنی قَیتریب بېریشگه مجبور، شونده کېینگی تدبیرده ینه ایشلهتیلهدی.
طالبان نینگ دولت مکتبلریدهگی بوندهی ترغیبات فعالیتلری اۉقووچیلرنینگ عایلهلریده تشویش اویغاتماقده؛ اینیقسه، اوروش، انتحار هجوملری، طالبان وکیللری و فلسطیننی قۉللب-قوّتلشگه عاید قۉشیقلرنی کویلش فعالیتی معارف ریاستی تامانیدن جدّي نظارت قیلینهدی. جمهوریت دوریده اۉقووچیلردن سیاسي مقصدلرده فایدهلنیش و ترغیبات ایشلری قطعیاً تعقیقلنگن اېدی؛ اما طالبان اۉقووچیلرنی اۉز منفعتلریگه خدمت قیلهدیگن ایدیولوژیک کوچ صفتیده تربیهلهماقچی.
طالبان نینگ معارف ریاستی فقط دولت مکتبلریده و رسمي ییغیلیشلرده قۉشیقلر کویلش بیلن چېکلنمهی، بعضاً اۉز حکومتینی قۉللب-قوّتلش تدبیرلریده اۉقووچیلرنی کۉپچیلیکنی کۉرسهتیش اوچون ایشلهتهدی.
طالبان افغانستانده حاکمیتنی قَیته اېگهلهگن تۉرتینچی ییللریده، 24 اسد کونی بیر قطار اۉقووچیلرنی اوشبو کوننی نشانلش بیلن باغلیق ییغیلیشگه آلیب باریشگن. معارف ریاستی بو بالهلر و اۉسمیرلرنینگ باشیگه طالبان ایستهگن کییمنی کيیشلری اوچون سلّه تقیب قۉیگن.
پنجشیردهگی بیر محلي منبع اطلاعات روزگه ایتیشیچه، بیر نېچه آی آلدین طالبان حتا سپورت فستیوالی وقتیده تماشابین یېتیشمهگنی سببلی، ولایت مرکزی و روخه اولسواللیگی مکتب اۉقووچیلرینی پنجشیردهگی ولایت سپورت استدیونیگه آلیب کېلگن، شونده مسابقهلرگه آدملر کۉپ قتنهشگن کبی کۉرینیشی تأمینلنگن.
طالبان استخبارات باسیمی
«نقیبالله» (مستعار)، پنجشیردهگی محلي اهالیدن بیری، اطلاعات روزگه شوندهی دېیدی: پنجشیردهگی طالبان استخباراتی اۉز دستورلری اهالینینگ قۉللب-قوّتلشیگه اېگه اېکنینی کۉرسهتیش اوچون بالهلر و اۉسمیرلرنی ایشلهتهدی و اولرگه طالبان بیراقلرینی توتقزهدی.
اونینگ ایتیشیچه، طالبان کوچلری بو بالهلر و اۉسمیرلرگه طالبان امارتی طرفدارلیگینی بیلدیرووچی شعارلرنی ایتیشنی تأکیدلهیدی. اونینگ قۉشیمچه قیلیشیچه، «طالبان بو دستورلرگه مکتب اۉقووچیلری و یاشلرنی آلیب کېلهدی، اولرنینگ قۉلیگه بیراق بېرهدی و ویدیولرنی صورتگه آلیب، «اسلامي امارت یشهسین»، «امیرالمومنین یشهسین»، «اسلامي تیزیم برقرار بۉلسین»، «تیزیم دشمنلریگه اۉلیم» و «الله و اکبر» شعارلری بیلن پنجشیر ولایتی اهالیسی و ینگی اولادی نینگ قۉللب-قوّتلشینی سیاسي و حربي رقیبلرگه کۉرسهتیشگه حرکت قیلهدی.»
اطلاعات روز گزیتهسینینگ محلي منبعلری شونینگدېک طالبان تورلی دستورلر آرقهلی پنجشیر ولایتیدهگی بالهلر و یاشلرنینگ آنگینی اۉزگرتیریشگه و اۉز غایهلرینی اولرنینگ آنگیگه سینگدیریشگه حرکت قیلماقدهلر دېب ایتهدیلر.
پنجشیردهگی اهالینینگ ایتیشیچه، طالبان اۉز ایدیولوژیسینی ترغیب قیلیش مقصدیده کتابلر و موضوعلر بۉییچه، مثلاً، «غرب بیلن اِنتلِکتوال اوروش»، «امارتشناسلیک»، «دوحه کېلیشووی» و باشقه اساسي غایوي منبعلر بۉلگن رسالهلر بۉییچه مسابقهوي امتحانلر اۉتکزهدی. البته، بو امتحانلرده اشتراک اېتگنلرگه نقد و نقد بۉلمهگن مکافاتلر هم بېریلهدی.
طالبان افغانستانده حاکمیتنی قَیته اېگهلهگچ، پنجشیرگه علیحده اعتبار قرهتهدی و حربي کوچلر، پستهلر، قوماندانلیک مرکزلری و نظارت پُستلرینی کۉپهیتیریش بیلن بیرگه، ترغیبات و ایدیولوژیک فعالیتلرینی کوچهیتیریب، ولایت اهالیسیدن اۉز صفیده عسکرلر جلب قیلماقچی.
