یازوچی: دوکتور عزیزالله ارال
افغانستاننینگ جوزجان ولایتی، شبرغان شهریدهگی جوزجان دولت بیلیم یوریتیده اۉزبېک تیلی وادبیاتی بۉییچه ماسترلیک دستوری نینگ پیشنهاد متنی افغانستان عالی اۉقو وزیرلیگی تامانیدن رسمن تصدیقلنگنینی ایجابی سیلجیش صفتیده بهالش ممکن. اوشبو تشبثنی قۉللب-قوتلهگن استاذلر، متصدیلر و وزیرلیک رهبریتیگه منتدارلیک بیلدیریش بیلن بیرگه بو تاریخی قرار کېلهجک اولادنینگ علمی ترقیاتیگه خدمت قیلهدی، دیگن فکردهمیز.
وزیرلیکنینگ بو قراری نهفقط علمی صلاحیتنینگ یوکسهلیشی، بلکه اۉزبېک تیلینینگ اکادمیک موقعینی مستحکملش یۉلیده قۉییلگن اولکن قدمدیر. بوندهی امکانیت طفیلی یاشلر اۉز آنه تیلیده علمی ایزلنیشلر آلیب باریش، تیلشناسلیک و ادبیاتشناسلیکنینگ چوقور باسقیچلری بۉییچه متخصص صفتیده یېتیشیب چیقیش امکانیتیگه اېگه بۉلهدیلر.
شواۉرینده، جوزجان بیلیم یورتی عمومی دروازه سیگه اۉرنهتیلگن اۉزبېک تیلیدهگی لوحه آلیب تشلنگنیدن کۉپ اۉتمهی اونینگ قهیته تیکلنگنلیگینی – خلقنینگ تاریخي اۉرنی و همجهتلیک تمایللری، بو یورت اۉزبېکلرینینگ علمگه، مدنیت و معرفتگه، یورتگه بۉلگن صداقتینینگ یازمه رمزی تن آلینگنیدن دلالت بېرهدیگن ایجابی حرکت صفتیده قبول قیلیش ممکن.
اۉزبېک تیلی و ادبیاتی بۉییچه ماسترلیک بو نهفقط علمی درجه، بلکی تیل و ادبیاتگه محبت، ملی ترقیاتگه قۉشهدیگن حصهدیر. ایجابی امکانیتلر کۉپ، معمالر اېسه یېچیم طلب اېتهدی. هر بیر یاش متخصص نینگ بو ساحهده موفقیت قازانیشی اۉزبېک تیلی نینگ نفوذی و کېلهجگینی ینهده مستحکملهیدی. اۉزبېک تیلی دولتلررا علاقهلرده، مدني دیپلوماسیده و خلقارا تعلیم ساحهسیده تاباره کۉپراق قۉللنماقده. ماسترلیک درجهسی شو ساحهلرده فعالیت یوریتیش اوچون هم کوچلی پایدېوار یرهتهدی.
اۉزبېک تیلی، افغانستانده هم میلیونلب انسانلرنینگ آنه تیلی، مدنیتی، منعویتی و تاریخی خاطرهسی نینگ تهینچی بۉلیب، ملی اۉزلیکنی انگلشگه خدمت قیلوچی اولکن جریاندیر. شو سببلی اۉزبېک تیلی و ادبیاتی بۉییچه ماسترلیککه کیریش نهفقط علمی یۉل تنلش، بلکه اجتماعی مسؤلیتنی اۉز ذمهسیگه آلیش دېمک همدیر. ماسترلیک پروگراملری محصلگه چوقور علمی مېتودالوژی بیلن ایشلش، تیلشناسلیک نینگ فونولوژی، مورفولوژی، سینتکسیس، سېمانتیک کبی بۉلیملرینی تحلیلی درجهده اۉرگنیش امکانینی بېرهدی.
بیلیم یورتلریده ماسترلیک برنامهسی یۉلگه قۉییلیشینینگ ایجابی تامانلری شوندن عبارتکی، بیرینچیدن علمی کادرلرگه بۉلگن احتیاجنی قاندیرهدی، ایککینچیدن تعلیم صفتینی ینگی باسقیچگه کۉترهدی ونهایت اۉزبېک تیلی نینگ اکادمیک و مدنی نفوذینی ینهده مستحکملهیدی. مادامیکی شوندهی اېکن، ماسترلیک دستوری نهفقط جوزجان بیلیم یورتی بلکی اۉزبېک تیلی و ادبیاتی عملده موجود بولگن برچه بیلیم یورتلری، بیرینچی نوبتده کابل بیلیم یورتیده هم مملکت عالی اۉقو وزیرلیگی تامانیدن رسمن تصدیقلنیشی عینی عدالتدن بۉلراېدی.
بیلیم یورتلریدهگی اۉزبېک تیلی و ادبیاتی بۉلیملریده نظریه چوقور بۉلسه هم، أیریم یېتیشمهوچیلیکلرگه کۉره عملی تجربهلر کم بۉلیشی، درسلر یېترلی بۉلمهگنی، اۉقو دستورلری نینگ أیریم جایلرده اېسکیرگنلیگی، یاش متخصصلر اوچون زمانهوی علمي یۉنهلیشلرده ایشلهیدیگن علمی رهبرلر سانی آزلیگی، کېلهجکده ساحه متخصصلری ذمهسیگه: تیلشناسلیک لابراتوارلری، کارپوسلر، زمانهوی تکنالوژیلر بیلن یېترلی درجهده ایشلش مسؤلیتینی یوکلهیدی. بونینگ اوچون اېسه زمانهوی لینگویستیک مودللرینی کېنگهیتیریش،علمی عملیات تیزیمینی کوچهیتیریش، لایحهلر سانینی آشیریش، ادبی محیط بیلن محصللرنی باغلش کېرهک بۉلهدی.
