افغانستانلیک ذکیه خدادادی پاراتکواندوچی و جهان قاچقینلر جماعهسی اعضاسی، اروپا کېنگشینینگ «شِمال-جَنوب» مکافاتیگه سزاوار بۉلدی.
خانیم ذکیه خدادادی اۉزینینگ انستاگرام صحیفهسیده یازیشیچه، او اوشبو مکافاتنی کېچه (چهارشنبه ۷ عقرب) پرتغال پارلمانیده بۉلیب اۉتگن رسمي مراسمده پرتغال جمهور رییسی مارسلو ربلو دسوزادن قبول قیلیب آلگن.
ذکيه، «بو مکافاتنی برچه قاچقینلرگه، افغانستاننینگ جسور عیاللریگه و هر کونی یخشیراق کېلهجک اوچون کورهشهیاتگن سپورتچیلرگه بغیشلهیمن» دېب یازگن.
اونینگ قۉشیمچه قیلیشیچه، «بو تقدیر مېن اوچون شونچهکه مکافات اېمس، بلکه امید، متانت و آرزولریگه ایشانچنینگ رمزی دیر حیات یۉلیده کتّه تۉسیقلرگه دوچ کېلهدیگن، اما هېچ قچان تسلیم بۉلمهیدیگن برچه انسانلر اوچون.»
«شِمال-جَنوب مکافاتی» اروپا کېنگشینینگ اېنگ نفوذلی مکافاتلریدن بیری بۉلیب، او انسان حقوقلرینی حمایه قیلیش، دموکراسینی قۉللب-قوّتلش یاکه گلابل بیردملیک و اۉز ارا باغلیقلیک حقیده جماعتچیلیک خبردارلیگینی آشیریش یۉلیده فعالیت یوریتگن شخصلرگه بېریلهدی.
ذکیه خدادادیدن تشقری، خلق ارا پارالمپیک کمیتهسی، خلق ارا المپیک کمیتهسی و قاچقینلر المپیک جمغرمهسی هم اروپا کېنگشی تامانیدن تقدیر اېتیلگن.
حاضرگچه «شِمال-جَنوب» مکافاتی بیرلشگن ملتلر تشیلاتینینگ سابق باش کتبی کوفی عنان قۉشیمچه 60 نفر تنیقلی شخصیتگه تاپشیریلگن.
