۴۹ کیشی نیجر وطنداشی غربي افریقاده مالی دولتیدن اویلریگه قَیتیب، قربان هییتی کونلریده عایلهلری بیلن بیرگه بۉلیشنی ایستهگن پیتده، ایسّیق و قوروق صحراده قالیب کېتیب، چنقاق و آچلیکدن وفات اېتیشدی.
الجزیره ترماغی جمعه کونی (۱۵ جوزا) محلي رسميلرگه تهیهنیب خبر بېریشیچه، بو یۉلاوچیلر موتر بوزیلیب قالگنلیگی سببلی افریقانینگ اولکن صحرای کبیر چۉلیده قالیب کېتیشگن.
گزارشگه کۉره، جمعی۵۱ یۉلاوچیدن فقط ایکّیسی قیینچیلیک بیلن۵۰ کیلومتر پیاده یوریب سووگه یېتیب بارگن و تیریک قالگن.
بو ایکّی امان قالگن شخص کېین نیجرنینگ اېنگ یقین شهری آساماکا باریب، محلي حاکمیتدن یاردم سۉرهگن.
قوتقروو کوچلری حادثه جاییگه یېتیب کېلگنیده،۴۹ کیشی کوچلی ایسّیق، چنقاق و آچلیک سببلی موتر آستیده یاکه اونینگ اطرافیده وفات اېتگن اېدی.
نیجر محلي رسميلری بو یۉلاوچیلر مالی حدودیدهگی ت تلاندک شهریدن، نیجر چېگرهسیدن۳۰۰ کیلومتر اوزاقلیکدن قَیتهیاتگنینی، قربان هییتینی عایلهلری بیلن نشانلشنی رېجهلشتیرگنینی، اما۴۹کیشی منزلگه یېتیب باره آلمهگنینی ایتیشگن.
ایکّی امان قالگن آدم نینگ ایتیشیچه، تخنیکي ناسازلیکدن سۉنگ اولر نینگ موتری صحرای کبیرده تۉختهب قالگن و هیداوچی همده اونینگ یاردمچیسی معمانی برطرف اېته آلمهگن.
شو سببلی برچه یۉلاوچیلر ایسّیق و قوروق صحراده قالیب کېتگن.
حاضرچه موتر نیمه سببدن بوزیلگنی و یۉلاوچیلر انیق قنچه وقت صحراده قالیب کېتگنی انیق اېمس.
