ایران تشقی ایشلر وزیری عباس عراقچی، لبنان جمهور رییسی جوزف عوننینگ بیاناتلریگه عکسالعمل بیلدیریب، لبنان توپراغینینگ بیر قِسمینی ایران اېمس، بلکه باشقه کوچلر اېگهللب تورگنینی تأکیدلهدی.
عراقچی بوگون (شنبه، ۱۶ جوزا) ایکس اجتماعی ترماغیده نشر قیلگن پیامیده، جمهور رییس عونگه مراجعت قیلیب: «جناب جمهور رییس، لبناننی حقیقي دشمنیدن قوتقرینگ»، دېب یازدی.
لبنان جمهور رییسی جوزف عون جمعه کونی سیانان ژورنالیستی کریستن امنانپورگه بېرگن مصاحبهسیده ایران نینگ مملکت ایچکی ایشلریگه ارهلشهیاتگنیدن شکایت قیلگن اېدی.
عون جنابلری ایران سپاه پاسدارانگه خطاب قیلیب ایتیشیچه: «بو سیزلرنینگ مملکتینگیز اېمس، بیزلرنینگ اولکهمیز… بیزنینگ مملکتیمیزگه ارهلهشیش سیزلرنی وظیفهنگیز اېمس.
عون شونینگدېک، حزباللهنی اسرایل بیلن دیپلوماتیک یۉل توتیشگه چقیرگن و ایران امریکا بیلن مذاکرهلرده لبنان «سودالشوو واسطهسی» صفتیده فایدهلنهیاتگنینی تأکیدلهگن.
اونینگ سۉزلریگه کۉره، لبنان خلقی ایران منفعتلری اوچون دوام اېتهیاتگن وضعیت نینگ نرخینی تۉلهماقده همده اسرایل و حزبالله اۉرتهسیدهگی اوروشدن چرچهگن.
بونگه جوابن عراقچی: «اگر لبنان ایران اوچون سودالشوو واسطهسی بۉلگنیده، بیز الّهقچان کېلیشووگه اېریشگن بۉلردیک»، دېدی.
او کنایهلی طرزده قۉشیمچه قیلگن: «جناب عون نینگ گپلریگه قرهگنده، گۉیا لبنان نینگ بېشدن بیر قِسمینی ایران باسیب آلگن، لبنانلیکلرنینگ چارک قِسمینی ایران کۉچیشگه مجبور قیلگن و مملکتنی هر کونی بامباردمان قیلهیاتگن هم ایران اېمیش.»
مذکور بحث لبناندهگی حزبالله فعالیتی و ایران نینگ اوشبو حرکتنی قۉللب-قوّتلشی مسألهسی یانیده یوز بېرماقده.
شو بیلن بیرگه، امریکار واسطهچیلیگیده اسراېل و لبنان اۉرتهسیده یقینده اۉت آچیشنی تۉختهتیش بۉییچه کېلیشووگه اېریشیلگنی ایتیلماقده. کېلیشوو شرطلریدن بیری حزبالله نینگ حربي تاسیساتینی توگهتیش و قورالسیزلنتیریش جریانینی باشلش حسابلنهدی.
امریکا تامانیدن قۉللب-قوّتلنهیاتگن لبنان حکومتی هم حزبلله نینگ مستقل حربي فعالیتیگه قرشی اېکنینی بیلدیریب کېلماقده. اسرایل اېسه اۉز هجوملرینی حزبالله نینگ حربي فعالیتی و راکت هجوملری بیلن ایضاحلهیدی.
اۉتگن آی رویترزنینگ خبر بېریشیچه، اسرایل کوچلری تخمیناً ایکّی مینگ کوادرات کیلومتر، یعنی لبنان توپراغی نینگ قریب بېشدن بیر قِسمینی اېگهللب آلگن.
شونینگدېک، الپائیس گزېتهسی کېچه اعلان قیلگن حساباتده، اسرایل نینگ سۉنگگی ایکّی ییل دوامیده عملگه آشیرگن هجوملری عاقبتیده لبنان جَنوبیدهگی اۉنلب شهر و قیشلاقلر ویران بۉلگنی، مملکت اهالیسی نینگ قریب چارک قِسمی — 1،4 میلیون کیشی اۉز اویینی ترک اېتیشگه مجبور بۉلگنی قید اېتیلگن.
اسرایل اۉز حربي عملیاتلرینی حزب الله نینگ موجودلیگی و قوراللی فعالیتی بیلن آقلب کېلهدی.
اسرایل دایمي روشده حزبللهنی ایران تامانیدن قۉللب-قوّتلنهدیگن قوراللی گروه دېب اتهب، اونینگ راکت هجوملری اسرایل خوفسیزلیگیگه تهدید سالهیاتگنینی تأکیدلهیدی.
امریکاگه یقین لبنان حکومتی هم حزبالله نینگ مستقل حربي فعالیتیگه قرشی اېکنینی بیلدیریب کېلماقده.
لبنان حکومتی یقینده امریکا واسطهچیلیگیده اسرایل بیلن اۉت آچیشنی تۉختهتیش بۉییچه کېلیشووگه اېریشگن. اوشبو کېلیشوو نینگ مهم بندلریدن بیری حزبلله نینگ حربي تاسیساتلرینی توگهتیش حسابلنهدی.
امریکا تشقی ایشلر وزیرلیگی پنجشنبه کونی (۱۴ جوزا) معلوم قیلیشیچه، اسرایل و لبنان هجوملرنی تۉختهتیش، حزبللهنی قورالسیزلنتیریش همده اونینگ تاسیساتینی باسقیچمه-باسقیچ توگهتیش بۉییچه سعی-حرکتلرنی باشلش شرطی بیلن صلح تۉغریسیده کېلیشووگه اېریشگن.
