هرمز بۉغازیده ایران و امریکا اۉرتهسیده یوز بېرگن ینگی تۉقنهشوولردن سۉنگ بحرین و کویت دولتلریده هم خوف آژرلری ینگرهدی.
امریکا قۉشمه ایالتلری مرکزي قوماندانلیگی (سنتکام) بوگون (شنبه، ۱۶ جوزا) تانگده اعلان قیلیشیچه، ایراننینگ اوچووچیسیز قوریلمهلریگه قرشی چارهلر کۉریلگنیدن سۉنگ، اوشبو مملکت نینگ قیرغاق کوزهتوو رادار اۉبژېکتلریگه ضربه بېریلگن.
(سنتکام) بیاناتیده شوندهی دېییلهدی: «ایران هرمز تامان تۉرتته انتحاری درون اوچیردی. شوندن سۉنگ، دېنگیز قتناویگه بۉلگن زودلیکدهگی تهدیدنی برطرف اېتیش مقصدیده امریکا کوچلری ایراننینگ سِریک و قشم ایسلنددهگی قیرغاق کوزهتوو رادار اۉبژېکتلریگه هجوم قیلدی.»
بیراق، ایران سپاه پاسدارانی اوشبو تۉقنهشوو یوزهسیدن باشقهچه بیانات بېرگن.
ایران اسلام انقلابی قۉریقچیلری کارپوسینینگ معلوم قیلیشیچه، بوگون تانگده «امریکا اوردوسی تامانیدن یۉنهلتیریلگن و رغبتلنتیریلگن تۉرتته قاعدهبوزر نفت تانکېری موافقلشتیریشسیز همده بېریلگن آگاهلنتیریشلرگه اعتبار بېرمسدن هرمزدن ناقانوني چیقیب کېتیشگه اورینگن. آگاهلنتیریشلردن کېین تانکېرلردن بیری نشانگه آلینیب تۉختهتیلگن، قالگنلری اېسه آرتگه قَیتگن.»
سپاه پاسداران بیاناتیده ایتیلیشیچه، اوشبو حادثهدن سۉنگ «امریکا درونلری قېشم جزیرهسیدهگی بیر علاقه منارهسی و سِریکدهگی ینه بیر منارهگه ایکّی پرتابه بیلن ضربه بېرگن.»
پاسداراننینگ دعوا قیلیشیچه، اوشبو تۉقنهشوودن کېین او کویتدهگی امریکانینگ ایکّی هوا بزهسیگه همده بحرینده جایلشگن امریکا حربي-دېنگیز کوچلری نینگ نشانگه آلگن، بونگه قرشی امریکا قۉشمه ایالتلری هم بالیستیک راکتلر اوچیرگن.
بحرین ایچکی ایشلر وزیرلیگی اجتماعي ترماغیده اعلان قیلگن بیاناتیده: «خوف آژری ینگرهدی. فقرالر و مملکت اهالیسی خاطرجمعلیکنی سقلب، اېنگ یقین خوفسیز جایگه باریشلری سۉرهلهدی»، دېییلهدی.
شونینگدېک، کویت مدافعه وزیرلیگی مملکت هوا مدافعهسی تیزیملری ایشگه توشیریلگنینی معلوم قیلدی.
وزیرلیک بیاناتیده: «کویت هوا مدافعهسی تیزیملری حاضرده دشمن نینگ راکت و درون هجوملرینی قَیترماقده. اېشیتیلگن پارتلشلر هوا مدافعهسی تیزیملری نینگ دشمن هجوملرینی توتیب قالیشی نتیجهسیدیر. تېگیشلی ادارهلر تامانیدن بېریلگن خوفسیزلیک کۉرسهتمهلریگه عمل قیلینگ»، دېب قید اېتیلگن.
شو بیلن بیرگه، ستنکام ایران تامانیدن اوشبو ایکّی دولت تامان اوچیریلگن هجوملر تهدیدی برطرف اېتیلگنینی معلوم قیلگن.
سنتکام نینگ ینه بیر بیاناتیده ایتیلیشیچه، ایران هرمز بۉغازیدهگی حادثهدن بیر نېچه ساعت اۉتیب، کویت و بحرین تامان یېتّیته راکت اوچیرگن. اولردن آلتیتهسی توتیب قالینگن، یېتّینچیسی اېسه نشانگه یېتیب بارمهگن.
