امریکا تشقی ایشلر وزیرلیگی اسرایل و لبنان هجوملرنی تۉختهتیش، حزباللهنی قورالسیزلنتیریش همده آخر-عاقبت اونینگ زیرساختلرینی توگهتیش بۉییچه سعی-حرکتلرنی باشلش شرطی بیلن اۉت آچیشنی تۉختهتیش یوزهسیدن کېلیشووگه اېریشگنینی معلوم قیلدی.
وزیرلیک بوگون (۱۴ جوزا، پنجشنبه) صلح و مذاکرهلرنی دوام اېتتیریش بۉییچه اوچ دولت نینگ قۉشمه بیاناتینی نشر قیلدی.
بیاناتگه کۉره، صلحنینگ جاري اېتیلیشی و لبنان همده اسرایل اۉرتهسیده تینچلیکنی تأمینلشگه قرهتیلگن سیاسي سعی-حرکتلرنینگ دوام اېتیشی حزبالله هجوملرینینگ تۉلیق تۉختهتیلیشی همده اوشبو گروهنینگ برچه اعضالرینی لیتانی دریاسینینگ جَنوبي حدودیدن چیقریشگه باغلیق.
بیانات متنیده شوندهی دېییلهدی: «تامانلر امریکا کۉمهگیده لبنان قوراللی کوچلری نادولت توزیلمهلردن خالی طرزده حدود اوستیدن مطلق نظارتنی عملگه آشیرهدیگن سیناو زونالرینی تېزکار روشده تشکیل اېتیشگه کېلیشیب آلدیلر.»
ایکّی کون دوام اېتگن مذاکرهلردن سۉنگ، اوچهله تامان هم «اسرایل و لبنان اۉرتهسیدهگی مناسبتلرنینگ کېلهجگی ایکّی مستقل دولت تامانیدن بېلگیلنیشی کېرهکلیگی و هر قندهی دولت یاکه نادولت سوبژېکتنینگ لبنان کېلهجگینی گروگه آلیشگه اورینیشلری قبول قیلینمسلیگی»نی تأکیدلهدی.
امریکا تشقی ایشلر وزیرلیگی بیاناتیده هیئتلر لبنان و اسرایلنینگ حاکمیتینی، خوفسیزلیگی همده حدودي یخلیتلیگینی برقرار تأمینلش مقصدیدهگی خوفسیزلیک تیزیمی یوزهسیدن محاکمه آلیب بارگنی، نادولت قوراللی گروهلرنی توگهتیش و اولرنینگ قَیته پیدا بۉلیشینینگ آلدینی آلیش بۉییچه کېلیشووگه اېریشیلگنی ایتیلهدی.
شونینگدېک، امریکا لبنان قوراللی کوچلرینی قۉللب-قوّتلش، اولرنینگ صلاحیتینی آشیریش و مملکت حدودی بۉیلب دولت حاکمیتینی ثمرهلی عملگه آشیریش امکانیتلرینی مستحکملش نیتینی ینه بیر بار تصدیقلهدی.
مذکور بیاناتده حزبالله نهفقط اسرایل و امریکانینگ، بلکه «لبنان نینگ هم دشمنی» دېب تعریفلنگن.
اسرایل اۉز خوفسیزلیگی و حدودي یخلیتلیگیگه حرمت «فقط حزباللهنی قورالسیزلنتیریش و اونینگ لبنان بۉیلب آستقورمهلرینی توگهتیش آرقهلی» تأمینلنیشی ممکنلیگینی تأکیدلهدی.
اۉز نوبتیده، لبنان خلق ارا تن آلینگن چېگرهلرگه اۉز ارا حرمت کۉرسهتیش، صلحنی تۉلیق عملگه آشیریشنینگ زودلیک بیلن ضرورلیگی همده مملکت نینگ حدودي یخلیتلیگی و تۉلیق حاکمیت تمایللریگه رعایه اېتیش مهملیگینی قید اېتدی.
تامانلر یقین هفتهلرده کېنگ قمراولی کېلیشووگه اېریشیش مقصدیده سیاسي و خوفسیزلیک بۉییچه مذاکرهلرنی قَیته باشلشگه کېلیشیب آلدیلر.
لبنان اوردوسیدن مستقل سیاسي و حربي توزیلمهگه اېگه بۉلگن حزبالله حاضرچه بو بارهده ایضاح بېرمهگن.
حزبالله نینگ سابق رهبری سید حسن نصرولله اوشبو حرکتنینگ مقصدی اسرایلگه قرشی کورهش اېکنینی تأکیدلب کېلگن و تشکیلات نینگ حربي توزیلمهلری خرجتلری تۉلیق ایران تامانیدن مالیهلشتیریلیشینی آچیق بیان قیلگن اېدی.
حزبالله لبنان حکومتیده هم اشتراک اېتهدی، بیراق اسرایلگه قرشی حربي عملیاتلرینی مستقل روشده رېجهلشتیریب و عملگه آشیریب کېلهدی.
