اسرایل مدافعه وزیری یسرائیل کاتس، مملکت اوردوسی لبنان جَنوبیدهگی تاریخي و استراتژیک اهمیتگه اېگه «بوفورت» قلعهسینی اېگهللب، اونینگ اوستیگه اسرایل بیراغینی اۉرنهتگنینی معلوم قیلدی.
اسرایل مدافعه وزیری بوگون (یکشنبه، ۱۰ جوزا) بېرگن بیاناتیده اسرایل اوردوسی بنیامین نتانیاهو و اونینگ کۉرستمسیگه بناءً لباندهگی قوروقلیکدهگی حربي عملیاتلرینی کېنگهیتیرگنی، لیتانی دریاسیدن اۉتیب، «بوفورت» تاغ تیزمهسی همده «بوفورت» قلعهسینی نظارت آستیگه آلگنینی ایتدی.
اونینگ تأکیدلشیچه، مذکور حدود جلیل اهالی پونکتلرینی حمایه قیلیش و اسرایل کوچلری خوفسیزلیگینی تأمینلش اوچون اېنگ مهم استراتژیک نقطهلردن بیری حسابلنهدی.
اسرایل مدافعه وزیری، شونینگدېک، اسرایل کوچلری ۱۹۸۲-ییلده بۉلیب اۉتگن بیرینچی لبنان-اسرایل اوروشیدن ۴۴ییل اۉتیب ینه «بوفورت» قلعهسیگه قَیتگنینی دعوا قیلدی.
اسرایل اوردوسی لبنان جَنوبیدهگی قوروقلیکدهگی عملیاتلرینی کېنگهیتیرهیاتگن بیر پیتده، او لبنان حکومتی بیلن اۉت آچیشنی تۉختهتیش کېلیشوویگه عمل قیلماقده. ایکّی تامان اۉرتهسیدهگی نوبتدهگی مذاکرهلر امریکا واسطهچیلیگیده یقین کونلرده اۉتکزیلیشی رېجهلشتیریلگن.
محلي اهالی آرهسیده «قلعه الشقیف»نامی بیلن مشهور بۉلگن «بوفورت» قلعهسی لبنان جَنوبی و اسرایل شِمالی اوستیدن کېنگ کوزهتوو امکانینی بېرهدیگن تاریخي همده استراتژیک استحکام حسابلنهدی. بیرینچی لبنان-اسرایل اوروشی دوریده هم او شمالي حدودلرگه آلیب بارووچی مهم استراتژیک نقطهلردن بیری بۉلگن.
تاریخی ۱۲ عصرگه باریب تقهلهدیگن اوشبو قلعه اۉزی نینگ استراتژیک جایلشووی سببلی بوگونگی کونده هم لبنان جَنوبیدهگی حدودلرنی نظارت قیلیشده علیحده اهمیت کسب اېتهدی.
