امریکا مدافعه وزیری پیت هگست نینگ ایتیشیچه، اگر کېلیشووگه اېریشیلمسه، مملکت اوردوسی ایرانگه قرشی هجوملرنی قَیته باشلشگه تۉلیق تیار.
پیت هگست بوگون (شنبه،۹ جوزا) سینگاپورده اۉتکزیلگن « شانگری-لا» خوفسیزلیک فارومیده؛ «ضرورت توغیلسه، عملیاتلرنی قَیته باشلش امکانیتیگه تۉلیق اېگهمیز»، دېدی.
امریکا مدافعه وزیری، دونهلد ترامپ ایران بیلن «مکمل کېلیشوو»گه اېریشیلیشینی و تهران هستوي قورالگه اېگه بۉلمسلیگینی کوتهیاتگنینی تأکیدلهدی.
اونینگ قۉشیمچه قیلیشیچه، اگر کېلیشوو عملگه آشمسه، امریکا اوردوسی نینگ قورال-یراغ ذخیرهلری حربي حرکتلر اوچون «تۉلیق یېترلی» حسابلنهدی.
ایران و امریکا اۉرتهسیدهگی مذاکرهلر قریب ایکّی آیدن بویان پاکستان واسطهچیلیگیده دوام اېتماقده، بیراق حاضرگچه سېزیلرلی نتیجه بېرمهگن.
هر ایکّی دولت رسميلری منتظم روشده تورلیچه بیاناتلر بېرماقده، تامانلر نینگ حربي کوچلری اېسه آلدیندن ایتیب بۉلمهیدیگن حرکتلرنی عملگه آشیرماقده.
امریکا جمهور رییسی دونالد ترامپ کېچه کېچقورون اېران نینگ دېنگیز قملی «حاضراق» بېکار قیلینیشینی اعلان قیلگن اېدی، اما بو قرار حلی عملده اجرا اېتیلگنی کوزهتیلمهگن.
آرهدن بیر نېچه ساعت اۉتیب، اېران عامهوي اخبارات واسطهلری فارس کۉرفزی ساحللریده مملکت نینگ هوا مدافعه تیزیملری «دشمنانه کیچیک اوچووچیسیز آپاراتلر»گه قرشی حرکت قیلگنینی خبر قیلدی.
