امریکا قۉشمه ایالتلرینینگ جمهور رییسی دونالد ترامپ نینگ ایران بیلن احتمالي کېلیشوو مسألهسی بۉییچه اۉز کابینهسی نینگ ملي خوفسیزلیک جماعهسی بیلن «وضعیت خانهسی»ده اۉتکزگن ییغیلیشی یکونلنگنیگه بیر نېچه ساعت بۉلگنیگه قرهمهی، اوشبو اوچرهشوو نتیجهسی حاضرچه معلوم اېمس.
دونالد ترامپ جمعه کونی (۸جوزا)، محلي وقت بیلن توشدن کېین، اۉزی نینگ خوفسیزلیک مسووللری بیلن اېران مسألهسی یوزهسیدن قریب ایکّی ساعت دوامیده مذاکره آلیب باردی.
بیراق آرهدن بیر نېچه ساعت اۉتگن بۉلسه-ده، مذکور ییغیلیش نینگ یکوني قراری حقیده هېچ قندهی بیانات اعلان قیلینمهدی و ترامپ نینگ اۉزی هم بو بارهده ایضاح بېرمهدی.
سیان ان تلویزیونینینگ آق اوی رسميسیگه تهیهنیب خبر بېریشیچه، «وضعیت خانهسی ییغیلیشی یکونلندی و تخمیناً ایکّی ساعت دوام اېتدی».
مذکور آق اوی رسميسی فقطگینه شونی اېسلهتدیکی، «جمهور رییس ترامپ فقط امریکا منفعتلریگه ماس کېلهدیگن و اونینگ قیزیل چیزیقلریگه جواب بېرهدیگن کېلیشوونیگینه قبول قیلهدی».
دونالد ترامپ اوشبو ییغیلیشدن آلدین ملي خوفسیزلیک جماعهسی بیلن «یکوني قرار»نی قبول قیلیش اوچون وضعیت خانهسیگه باریشینی معلوم قیلگن اېدی.
او شونینگدېک، اوروشنی توگهتیشگه قرهتیلگن احتمالي کېلیشوو دایرهسیده اېران راضیلیک بېریشی کېرهک بۉلگن بیر قطار شرطلرنی هم تیلگه آلدی.
اما ترامپ نینگ خوفسیزلیک جماعهسی بیلن اۉتکزگن مذاکرهلری نتیجهسیده امریکا دیپلوماتيهگه ینه امکان بېرهدیمی یاکه حربي حرکتلر قَیته باشلنهدیمی حاضرچه بو مسأله انیق اېمس.
