پاکستان تشقی ایشلر وزیری محمد اسحاق دار، مملکتی ایران و امریکا مذاکرهلریده واسطهچیلیک قیلهیاتگن بیر پیتده امریکالیک همکسبی بیلن مذاکره اۉتکزیش اوچون واشنگتنگه بارهدی.
بیرلشگن ملتلر تشکیلاتینینگ خوفسیزلیک کېنگشی ییغیلیشی اوچون نیویارکده بۉلیب تورگن اسحا دار اېرتهگه (جمعه، ۸ جوزا) واشنگتنده امریکا تشقی ایشلر وزیری مارکو روبیو بیلن اوچرهشیشی رېجهلشتیریلگن.
پاکستان تشقی ایشلر وزیرلیگی بیاناتیگه کۉره، اسحاق دار و مارکو روبیو ایکّی تامانلهمه علاقهلر همده منطقوي و گلوبل مسألهلرنی محاکمه قیلهدی.
پاکستان تشقی ایشلر وزیری بو سفر پاکستاننینگ امریکا بیلن اوزاق ییللیک و کېنگ قمراولی همکارلیکنی چوقورلشتیریشگه صادقلیگینی کۉرسهتیشینی بیلدیرگن.
پاکستان حاضر امریکا بیلن علاقهلرینی کېنگهیتیرماقده. ایران و امریکا اۉرتهسیده واسطهچیلیک رۉلینی بجریشی اسلام آبادنینگ مهم گلوبل معمانی حل قیلیش یۉلیده آلیب بارهیاتگن اېنگ فعال تشبثلریدن بیری حسابلنهدی.
پاکستاننینگ امریکا و ایران اۉرتهسیده تینچلیک کېلیشوویگه اېریشیش حرکتلری تامانلر بیر-بیرینی صلحنی بوزیشده عیبلهیاتگن بیر پیتده دوام اېتماقده.
بوگون تانگده بیر امریکالیک عملدار ایران حدودیگه ینگی هجوملر اویوشتیریلگنینی معلوم قیلیب، بو هجوملرده امریکا کوچلری و هرمز بۉغازیدهگی کېمهچیلیک اوچون تهدید حسابلنگن اېرانلیک درونلر نشانگه آلینگنینی ایتدی.
بونگه جوابن ایران سپاه پاسداران مطبوعات خدمتی امریکا اوردوسی بندر عباس قۉنالغهسی یقینیدهگی نقطهگه ضربه بېرگنیدن کېین، «تجاوز منبعی بۉلگن» امریکا هوا بزهسی نشانگه آلینگنینی بیلدیردی.
سپاه پاسدارانگه بو جواب «دشمن بیلیب قۉیسین: تجاوز جوابسیز قالمهیدی و تکرارلنسه، جوابیمیز ینهده قطعي بۉلهدی» دېگن جدّي آگاهلنتیریش اېکنینی تأکیدلهدی.
خبرلرگه کۉره، اېران کویتگه درون و راکت هجوملرینی عملگه آشیرگن.
کویت اېراننی «اوشبو مملکتگه قرشی راکت و دران هجوملرینی زودلیک بیلن و هېچ قندهی شرطسیز تۉختهتیشگه» چقیرگن.
