امریکا قۉشمه ایالتلری جمهور رییسی دونالد ترامپ، بو مملکت و اېران مذاکرهچیلری اوروشنی توگهتیش بۉییچه کېلیشوونی یکونلشگه «جوده هم یقینلشگنینی» ایتدی.
ترامپ «سیبیاسنیوز» بیلن تیلفون آرقهلی صحبتده، قۉشیمچه تفصیلات بېرمسدن، «هر کونی وضعیت ینه-ده یخشیلنماقده»، دېگن.
امریکا جمهور رییسی یکوني کېلیشوو ایراننینگ هسته قورالیگه اېگه بۉلیشی نینگ آلدینی آلیشینی همده بو مملکت نینگ باییتیلگن یورانیومینی «قانیقرلی طرزده باشقریش»نی تأمینلشینی ایتیب، فقط اۉزی ایستهگن برچه نرسهگه اېریشیلهدیگن بیتیمنی امضالشینی تأکیدلهگن.
«سیبیاسنیوز» خبردار منبعلرگه تهیهنیب خبر بېریشیچه، ایران نینگ امریکا بیلن کېلیشوو بۉییچه سۉنگّی تکلیفی «هرمز بۉغازینی قَیته آچیش جریانی، خارجي بانکلرده سهقلنهیاتگن ایران نینگ اَیریم مبلغلرینی آزاد قیلیش و مذاکرهلرنی دوام اېتتیریش»نی اۉز ایچیگه آلهدی.
اوشبو نشرنینگ قۉشیمچه قیلیشیچه، ترامپ حاضرده بو تکلیفلرنی کۉریب چیقماقده و حلی یکوني قرار قبول قیلمهگن.
خبرگه کۉره، ترامپ مصلحتچیلری بیلن مصلحتلشماقده همده سعوديه عربستانی و فارس کۉرفزی دولتلری رهبرلری بیلن هم صحبت آلیب بارماقده.
اوچ منبع نینگ «سیبیاسنیوز»گه معلوم قیلیشیچه، ترامپ بوگون محلي وقت بیلن توشدن کېین فارس کۉرفزی دولتلری و باشقه مملکتلر رهبرلری بیلن تیلفون آرقهلی گپلشیب، ایران بیلن مذاکرهلرنی محاکمه قیلهدی.
ترامپ، اگر ایران کېلیشووگه راضی بۉلمهسه، او هېچ بیر دولت ایلگری دوچ کیلمهگن درجهدهگی ضربهگه اوچرهشینی تهدید قیلگن.
امریکا جمهور رییسی دونالد ترامپ نینگ بو ینگی بیاناتلری پاکستان اوردوسی قوماندانی عاصم منیرنینگ ایرانگه سفری آرتیدن ینگرهدی.
عاصم منیر بوگون ایران جمهور رییسی مسعود پزشکيان، پارلمان رئیسی محمد باقیر قالیباف و تشقی ایشلر وزیری عباس عراقچی بیلن تهران و واشنگتن اۉرتهسیدهگی مذاکرهلرنی محاکمه قیلدی همده اوچرهشوولردن سۉنگ تهراننی ترک اېتدی.
