حماس اسرایلنینگ غزهگه اویوشتیرگن هجوملری عاقبتیده اوشبو گروه حربي قناتی قوماندانی عزالدین حداد اۉلدیریلگنینی تصدیقلهدی.
رویترز خبریگه کۉره، حماس مطبوعات سۉزلاوچیسی حازم قاسم اۉفیس بوکیده نشر قیلگن ویدیوده عزالدین حدادنینگ اۉلدیریلگنینی تصدیقلهگن، بیراق واقعه تفصیلاتلری حقیده قۉشیمچه معلومات بېرمهگن.
بوندن آلدین اسرایل اوردوسی عزالدین حداد غزه شهریگه اویوشتیریلگن هجوملرده هلاک بۉلگنینی معلوم قیلگن اېدی. اسرایل اوردوسی ادعاسیگه کۉره، حداد۲۰۲۳ ییل۷ اوکتبر هجومی نینگ اساسي رېجهلشتیرووچیلریدن بیری بۉلگن.
رویترز معلوماتیگه کۉره، حدادنینگ خاتینی و ۱۹ یاشلی قیزی بیلن بیرگه هلاک بۉلگن. اولرنینگ جنازه مراسمی غزهنینگ مرکزیدهگی الاقصی مسجدیده اۉتکزیلگن.
بو حماسنینگ۲۰۲۵ ییل آکتیبر آییده اسرایل بیلن اۉرنهتیلگن صلحدن بویان اۉلدیریلگن اېنگ یوقاری مرتبهلی قوماندانی دیر. اوشبو صلح اقش جمهور رییسی دونالد ترامپ همده مصر، تورکيه و قطر کبی منطقه دولتلری واسطهچیلیگیده عملگه آشیریلگن اېدی.
شونگه قرهمهی، صلح اۉرنهتیلگنیدن کېین هم اسرایل نینگ غزه سکتوریگه هجوملری دوام اېتماقده. رویترز خبریگه کۉره، شو وقت ایچیده کمیده۸۵۰ فلسطینلیک اوشبو هجوملرده هلاک بۉلگن.
