رویترز خبرگزارلیگی اۉزینینگ گزارشیده امریکا قۉشمه ایالتلرینینگ جمهور رییسی دونالد ترامپ نینگ چینگه سفری نتیجهلرینی تحلیل قیلیب، «حشمتلی و کۉزگه کۉرینرلی تشریف یکونلندی، بیراق اونینگ امریکادهگی معمالری هنوز دوام اېتماقده» دېب یازگن.
رویترزگه کۉره، امریکا جمهور رییسی دونالد ترامپ پکنگه سفری چاغیده چین جمهور رئیسی شی جینپینگ بیلن تایوان، ایران و سودا مسألهلری بۉییچه کېنگ کۉلملی مذاکرهلر اۉتکزگن، بیراق بو اوچرهشوولر «کم نتیجه» بیلن یکونلنگن. ایران بۉییچه هېچ قندهی یوتوق یۉق.
جمهور رییس ترامپ سفردن آلدین چیننینگ ایران مسألهسیدهگی یاردمیگه احتیاجنی «کم اهمیتلی» قیلیب کۉرستگن اېدی. و حالانکه، اونینگ مصلحتچیلری پکن بو اوروشنی توگهتیشده واسطهچیلیک قیلیشده «مهم رۉل» اۉینشی ممکنلیگینی ایتیشگن. بو اوروش ترامپ جمهور رییسلیگی دوریدهگی اېنگ کتّه بحرانگه ایلنگن.
رویترزنینگ یازیشیچه: «ترامپ چیندن یاردم آلیش بېلگیلریسیز سفرنی یکونلهدی و پکن ایراننی کېلیشووگه مجبورلشگه قَی درجهده تیار اېکنی یاکه بونینگ عوضیگه قندهی امتیاز طلب قیلیشی حلی هم ناانیق.»
ایران بیلن باغلیق یگانه عملي قدم ترامپ چیننینگ ایران بیلن سودا قیلووچی نفتنی قَیته ایشلش کارخانهلریگه نسبتاً چېکلاولرنی بېکار قیلیشگه وعده بېرگنی دیر.
اوچرهشوو چاغیده ترامپ شوندهی دېگن: «بیزنینگ یاندشوویمیز جوده اۉخشش. بو وضعیت توگهشینی ایستهیمیز. اولر (ایران) هسته قورالیگه اېگه بۉلیشینی خواهلهمهیمیز. هرمز بۉغازی آچیق بۉلیشینی ایستهیمیز.»
شی جینپینگ بو سۉزلرگه بېواسطه جواب بېرمهگن. شو بیلن بیر وقتده چین تشقی ایشلر وزیرلیگی ایران اوروشی حقیده باشقهچه بیانات بېریب، بو ماجرا «هېچ قچان یوز بېرمسلیگی کېرهک اېدی و دوام اېتیشی اوچون سبب یۉق»لیگینی بیلدیرگن همده تینچلیککه یاردم بېریشگه تیارلیگینی ایتگن.
تایوان بۉییچه استراتژیک سکوت
تایوان مسألهسیده ترامپ مذاکرهلردن سۉنگ انیق ایضاح بېرمهگن. او شی جینپینگ بیلن گپلشگنیدن کېین ژورنالیستلر سواللریگه جواب بېرمهی، سکوت سهقلهگن.
چین بیاناتیگه کۉره، شی تایوان بۉییچه کېلیشماوچیلیکلرنی ناتۉغری باشقریش ایکّی دولت مناسبتلرینی خوفلی حالتگه آلیب کېلیشی ممکنلیگی حقیده آگاهلنتیرگن.
ترامپ اېسه امریکانینگ عنعنوي «ستراتژیک ناانیقلیک» سیاستینی سهقلب قالیشگه حرکت قیلگن. او کېینچهلیک ژورنالیستلرگه شی اونینگ تایوان بۉییچه موضوعسینی بیلماقچی بۉلگنینی ایتگن، اما اۉز جوابینی آشکار قیلمهگن.
سیاستدن کۉره کۉپراق مراسم
ترامپ چین تامانیدن قیشلاق خۉجهلیگی محصولاتلری، مال گۉشتی و بوېینگ اوچاقلری خریدی بۉییچه کېلیشوولر حقیده گپیرگن، بیراق انیق تفصیلاتلر بېریلمهگن.
اېنگ مهم سودا مسألهسی بۉلگن «تجارتی آتیش کېسین» اوزهیتیریلمهگن و ییل آخریده توگهشی کوتیلماقده. بو اېسه ینه باج تریفلری نینگ آشیشیگه آلیب کېلیشی ممکن.
مذاکرهلر یکوني بیاناتسیز توگهگن
2017-ییلدن فرقلی روشده بو سفر قۉشمه بیانات بېریلمهگن و «کتّه کېلیشوو» کوتیلگن بۉلسه-ده، رسمي نتیجهلر اعلان قیلینمهگن. چین هم انیق کېلیشوولرنی تصدیقلهمهگن.
رویترز خلاصهسیگه کۉره، «آخر-عاقبت، تشریفده مراسم و کۉرینیش سیاستدن اوستون کېلگن».
ترامپ اقشگه معمالر بیلن قَیتدی
رویترزنینگ یازیشیچه، ترامپ سفردن قَیتگن پیتده امریکا اوّلدن موجود معمالر یوقاری بنزین نرخی، اینفلیهتسيه و سیلاوچیلرنینگ ناراضیلیگی هنوز دوام اېتگن.
حساباتگه کۉره، ترامپ سیاسي غلبهگه محتاج اېدی، چونکه اونینگ حکومتی ایران بیلن اوروش عاقبتلرینی باشقریشده قیینچیلیکلرگه دوچ کېلماقده.
بو سفر کېنگ اعتبار قازانگن بۉلسه-ده، رویترز فکریچه، او عمومي سیاسي منظرهنی سېزیلرلی درجهده اۉزگرتیرمهگن.
