ترامپ و شیجین پینگ نینگ اوچرهشووی؛ امریکا وچیننینگ مناسبتی هر دایمگیدن یخشی بۉلیشی ممکن.
امریکا قۉشمه ایالتلرینینگ جمهور رییسی دونالد ترامپ چینگه قیلگن سفری چاغیده بو مملکت رئیسی شی جین پینگ بیلن اوچرهشیب، مذاکره اۉتکزدی.
بو اوچرهشوو بوگون اېرتهلب (پنجشنبه،۲۴حوت) محلي وقت بیلن پکندهگی «بویوک خلق سرایی»ده بۉلیب اۉتدی.
ترامپ سۉزینینگ باشیده شی جین پینگ گه مراجعت قیلیب دېدی: «سیز بیلن اوچرهشیش مېن اوچون شرَف، سیزنینگ دۉستینگیز بۉلیش هم شرَف، و چین بیلن امریکا مناسبتلری هر قچانگیدن هم یخشیراق بۉلهدی.»
اونینگ قۉشیمچه قیلیشیچه: «مېن و سیز بیر-بیریمیزنی اوزاق وقتدن بېری بیلهمیز. اصلیده بو ایکّی دولت اۉرتهسیدهگی اېنگ اوزاق دوام اېتگن علاقهدیر، هېچ بیر جمهور رییس بوندهی اوزاق مناسبتگه اېگه بۉلمهگن، بو مېن اوچون کتّه شرَف.»
دونالد ترامپ ینه شوندهی دېدی: «سیز بویوک رهبرسیز. مېن بونی همهگه ایتهمن، سیز بویوک رهبرسیز. بعضاً آدملر مېن بونی ایتیشیمنی یاقتیرمهیدی، لېکن مېن بری بیر ایتهمن، چونکه بو حقیقت. مېن فقط حقیقتنی ایتهمن.»
شی جین پینگ هم اوشبو اوچرهشووده ایکّی دولت عمومي منفعتلری کېلیشماوچیلیکلردن کۉره کۉپراق اېکنیگه ایشانیشینی بیلدیردی.
چین جمهور رئیسی، بیر کېلیشماوچیلیکنی حل قیلیش باشقهسینی حل قیلیش اوچون امکانیت یرهتیشینی ایتدی.
اونینگ ینه قۉشیمچه قیلیشیچه: «چین و امریکا ایکّلهسی هم همکارلیکدن فایده کۉرهدی، قرهمه-قرشیلیکدن اېسه ضرر کۉرهدی. بیز رقیب اېمس، بلکه همکار بۉلیشیمیز کېرهک.»
دونالد ترامپ ایکّی کونلیک سفر دایرهسیده کېچه پکنگه کېلگن اېدی. او چین جمهور رئیسی بیلن ایکّی تامانلهمه همکارلیک، ایران اوروشی، تایوان مسألهسی و یسمه آنگ بۉییچه هم مذاکره اۉتکزیشی رېجهلشتیریلگن.
بو سۉنگگی قریب اۉن ییل ایچیده امریکا قۉشمه ایالتلری جمهور رییسینینگ چینگه ایلک سفری حسابلنهدی.
ترامپ نینگ آق اویگه قَیتیشیدن سۉنگ چین-امریکا مناسبتلری تعرفهلر مسألهسیدهگی کېلیشماوچیلیکلر طفیلی کېسکینلشگن اېدی، بیراق تامانلر بو بارهده کېلیشووگه اېریشیب، آخر-عاقبت ایکّی دولت یېتکچیلری اوچرهشیب مذاکره اۉتکزیشدی.
