آق اوی، امریکا قۉشمه ایالتلرینینگ جمهور رییسی دونالد ترامپ بوگون (چهارشنبه،۲۳ ثور) رسمی بیر تشرییف بیلن پکنگه سفر قیلیب، چینلیک همکسبی شی جینپینگ بیلن اوچرهشهدی.
بو۲۰۱۷-ییلده ترامپ نینگ چینگه قیلگن سفریدن کېینگی ایلک امریکا جمهور رییسی تشریفی حسابلنهدی. سابق جمهور رییس جوبایدین اۉز جمهور رییس لیک دوریده چینگه هېچ قندهی سفر قیلمهگن.
پکن امریکا جمهور رییسینی کوتیب آلیش اوچون مخصوص تیارگرلیک کۉرگن و ترامپ همده شی جینپینگ اۉرتهسیده پنجشنبه و جمعه کونلری رسمي اوچرهشوولر همده طنطنهلی تدبیرلر اۉتکزیلیشی رېجهلشتیریلگن.
خلق ارا عاموی اخبارات واسطهلرینینگ خبرلریگه کۉره، ایران اوروشی، تایوان مسألهسی، تجارت و یسمه آنگ ایکّی کوچ یېتکچیلری محاکمه قیلهدیگن اساسي موضوعلر بۉلهدی.
اۉتگن هفته ایران تشقی ایشلر وزیری عباس عراقچی صفتیده چینگه بارگن اېدی. امریکا قۉشمه ایالتلری تشقی ایشلر وزیری مارکو روبیو اېسه «پکن ایرانگه ایتیلیشی کېرهک بۉلگن گپلرنی ایتیشیگه امید قیلهمیز»، دېب بیانات بېرگن.
دونالد ترامپ هم بیر نېچه بار چین نینگ ایرانگه تأثیری حقیده گپیریب، امریکا پکننینگ بو تأثیریدن فایدهلنیب، مذاکرهلرده واسطهچیلیک قیلیشی و اوروشنی توگهتیشگه یاردم بېریشینی امید قیلیشینی بیلدیرگن.
تایوا مسألهسی هم اوچرهشوودهگی مهم موضوعلردن بیری بۉلهدی، چونکه چین اونی اۉز حدودی نینگ بیر قِسمی دېب حسابلهیدی.
اۉتگن ییلی امریکا تایوانگه۱۱ میلیارد دالرلیک حربي یاردم بستهسینی اعلان قیلگن بۉلیب، بو چین نینگ کېسکین ناراضیلیگیگه سبب بۉلگن.
اقش تایوان مستقللیگینی رسماً تن آلیشی کوتیلمهیدی، بیراق آرال نینگ اقش بیلن حربي همکارلیگی دوام اېتماقده، شو بیلن بیرگه چین اونینگ اطرافیده حربي مشغولاتلرنی کوچهیتیرماقده.
تجارت و یسمه آنگ مسألهلری هم ترامپ و شی جینپینگ اۉرتهسیدهگی مذاکرهلرنینگ اساسي یۉنهلیشلری صفتیده تیلگه آلینگن.
