بیرلشگن ملتلر تشکیلاتینینگ آوقت همده اېکینچلیک تشکیلاتی (فائو)جاري ییلنینگ اپریل آییده جهان آزیق-طعام نرخلری کېتمه-کېت اوچینچی آی هم آشگنینی معلوم قیلدی.
(فائو) بوگون (جمعه، 18-ثور) بو اۉسیش اساسن انرژی خرجتلرینینگ کۉپهییشی و ایراندهگی اوروش عاقبتیدهگی اوزیلیشلر بیلن باغلیقلیگینی بیلدیردی.
(فائو)نینگ دنیا بازاریده سودا قیلینهدیگن آزیق-طعام محصولاتلری نرخیدهگی آیلیک اۉزگریشلرنی کوزهتووچی «آزیق-طعام نرخلری»گه کۉره، اپریل آییده آزیق-طعام نرخلری مارچ آییگه نسبتاً 1،6 فایزگه، اۉتگن ییلنینگ شو دوریگه نسبتاً اېسه ایکّی فایزگه آشگن.
تشکیلات، اۉسیملیک یاغی نرخلری مارچ آییگه قرهگنده 5،9 فایز آشیب، 2022-ییل جولاییدن بېری اېنگ یوقاری درجهگه یېتگن.
شونینگدېک اوشبو تشکیلات جهان بازاریده گوروچ نرخلری 1،9 فایزگه آشگنینی کۉرسهتماقده. بونگه «خوشبۉی گوروچ» نرخلری نینگ قیمتلشگنی سبب بۉلگن. اېکسپورت قیلووچی اکثریت مملکتلرده خام نفت و اونینگ محصولاتلری نرخی کېسکین آشگنی آرتیدن ایشلب چیقریش و مارکیت خرجتلری هم کۉپهیگن.
(فائو) معلوماتیگه کۉره، دان محصولاتلری نرخی 0،8 فایزگه، گۉشت نرخی اېسه 1،2 فایزگه آشگن. بیراق سوت محصولاتلری نرخی 1،1 فایزگه، شکر نرخی اېسه مارچ آییگه نسبتاً 4،7 فایزگه کمهیگن.
فائو باش اقتصادچیسی ماکسیمو توررو، «هرمز بحرانی بیلن باغلیق اوزیلیشلرگه قرهمهی، گلوبل آزیق-طعام و قیشلاق خۉجهلیگی تیزیملری هنوز اۉز برقرارلیگینی سهقلب قالماقده دېدی.»
اونینگ ینه قۉشیمچه قیلیشیچه: «دان نرخلری حاضرچه فقط اۉرتهچه درجهده آشدی، چونکه اوّلگی موسملردن یېترلی ذخیره و تأمینات موجود. اما اۉسیملیک یاغلری نرخی کېسکینراق کۉتریلدی. چونکه نفت نرخینینگ آشیشی یاقیلغیگه طلبنی کوچهیتیریب، اۉسیملیک یاغلری بازاریگه قۉشیمچه باسیم قیلماقده.»
فائونینگ ایتیشیچه، جهان دان بازاری یېترلی تأمیناتگه اېگه، بیراق بازار استقبالی هنوز ناانیق بۉلیب قالماقده. چونکه هرمزنینگ یاپیلیشی اساسي خاماشیا، اینیقسه انرژی و کیمیاوي اۉغیت خرجتلرینی آشیرگن. شو بیلن بیرگه بوغدای نرخیده نسبي پسهییش کوزهتیلگن.
ایران امریکا و ایسرایلنینگ هجوملری باشلنگنیدن کېین هرمزنی یاپگن اېدی. شوندن سۉنگ دنیا بۉیلب نفت نرخلری سېزیلرلی درجهده آشدی. اوروش باشلنیشیدن اوّل جهان نفتی نینگ قریب 20 فایزی اوشبو بۉغاز آرقهلی تشیلر اېدی.
