پاکستان باش وزیری شهباز شریف، امریکا و ایران اۉرتهسیدهگی اۉت آچیشنی تۉختهتیش مدتی اوزهیتیریلگنیدن سۉنگ، هر ایکّی تامان اونی دوام اېتتیریشیگه امید بیلدیرگن.
پاکستان باش وزیری اۉزینینگ بیاناتیده امریکا جمهور رییسیگه اۉت آچیشنی تۉختهتیش مدتینی اوزهیتیریش حقیدهگی طلبنی قبول قیلگنی و دوام اېتهیاتگن دیپلوماتیک سعی-حرکتلر اوچون شرایط یرهتگنی اوچون منّتدارچیلیک بیلدیرگن.
او شوندهی یازگن: «موجود ایشانچ و اعتمادگه تهیهنگن حالده، پاکستان مذاکرهلر آرقهلی ماجرانی حل قیلیش بۉییچه جدّي سعی-حرکتلرینی دوام اېتتیرهدی.»
شهباز شریفنینگ قۉشیمچه قیلیشیچه: «مېن چین دلدن امید قیلهمنکی، هر ایکّی تامان اۉت آچیشنی تۉختهتیش رېجیمیگه رعایه قیلیشده دوام اېتهدی و اسلام آبادده رېجهلشتیریلگن ایکّینچی باسقیچ مذاکرهلرده ماجرانی دایمي توگهتیش اوچون کېنگ قمراولی تینچلیک کېلیشوویگه اېریشهدی.»
امریکا جمهور رییسی دونالد ترامپ اېسه پاکستان باش وزیری و اوردو قوماندانی التماسیگه بناءً ایران بیلن اۉت آچیشنی تۉختهتیش رېجیمینی مذاکرهلر یکونیگه یېتگونچه اوزهیتیرگنینی اعلان قیلگن.
اېران حکومتی حاضرچه بو اوزهیتیریش بۉییچه رسمي بیانات بېرمهگن. بیراق «تسنیم» اخبارات آژانسینینگ یازیشیچه، ایران اۉت آچیشنی تۉختهتیش مدتینی اوزهیتیریش بۉییچه تکلیف کیریتمهگن.
