رویترز خبر آژانسی پاکستان خوفسیزلیک منبعسیگه تهیهنیب خبر بېریشیچه، پاکستان اردوسی قوماندانی عاصم منیر، دونالد ترامپ بیلن امریکا و ایران اۉرتهسیدهگی مذاکرهلر حقیده صحبتلشگن.
خبرگه کۉره، عاصم منیر ترامپگه امریکا تامانیدن ایران بندرلریگه قۉییلگن دېنگیز قمللری تینچلیک مذاکرهلرینینگ قَیته باشلنیشیگه تۉسقینلیک قیلهیاتگنینی ایتگن.
پاکستانلیک منبعگه کۉره، ترامپ بو مسألهنی کۉریب چیقیشینی بیلدیرگن.
رویترز ینه خبر قیلیشیچه، شهباز شریف، پاکستان باش وزیری، مسعود پزشکیان بیلن صحبتده اوندن امریکا بیلن مذاکره قیلیش اوچون هیئت یوباریشنی سۉرهگن. بیراق ایران تامانی دېنگیز قملی توگهمهگونچه بوندهی قدم تشلهمسلیگینی بیلدیرگن.
شو بیلن بیرگه، اسماعیل بقایی هم بوگون ایران حاضرچه امریکا بیلن مذاکرهلرنینگ ایکّینچی باسقیچیده قتنهشیش رېجهسیگه اېگه اېمسلیگینی ایتدی.
بو آرهده، دونالد ترامپ امریکا نمایندهلری دوشنبه کونی کېچقورون اسلام آبادگه مذاکرهلر اوچون یېتیب باریشینی معلوم قیلگن.
پاکستان عاموی اخبارات واسطهلری هم احتمالي مذاکرهلر سبب اسلام آبادده کوچلی خوفسیزلیک چارهلرینی کۉریلگنی حقیده خبر بېرماقده.
دونالد ترامپ اسلام آبادده اۉتگن مذاکرهلرنینگ بیرینچی باسقیچی موفقیتسیز توگهگنیدن سۉنگ، ایراننی دېنگیز آرقهلی قمل قیلیش بویروغینی بېرگن.
سنتکام اېسه اۉتگن هفته نینگ دوشنبهسیدن باشلب بو قرارنی عملگه آشیرگن و کېچه عرب دېنگیزیده ایران بیراغی آستیدهگی یوک کېمهسینی تۉختهتگن.
ایران تامانی اېسه بو حرکتلرنی اۉت آچیشنی تۉختهتیش کېلیشووینینگ آچیق بوزیلیشی دېب بهالب، امریکانینگ دیپلوماتیک جریانگه جدّي یاندهشمهیاتگنینی تأکیدلهگن.
