رویترز اخبارات آژانسینینگ خبر بېریشیچه، کمیده ایکّی کېمه هرمز بۉغازیدن اۉتهیاتگنده اۉققه توتیلگن.
اوشبو نشر اوچته دېنگیز خوفسیزلیگی و کېمه قتناوی منبعلریگه تهیهنیب یازیشیچه، بو کېمهلر ایران بۉغاز اوستیدن نظارت اوّلگی حالتگه قَیتگنینی اعلان قیلگنیدن بیر ساعت اۉتمهی نشانگه آلینگن.
رویترز معلوماتیگه کۉره، اَیریم تجارت کېمهلری اېران دېنگیز کوچلریدن رادیو آرقهلی «هرمز بۉغازی ینه یاپیلدی و هېچ بیر کېمه حرکتلنه آلمهیدی» دېگن خبرنی آلگنینی بیلدیرگن.
ایراندهگی خاتم الانبيا مرکزي قوماندانلیگی بوگون امریکا تامانیدن اوشبو مملکتگه نسبتاً دېنگیز قملی دوام اېتهیاتگنی سبب، هرمز بۉغازی اوستیدن نظارت ینه اوّلگی حالتگه قَیتگنینی و قوراللی کوچلر تامانیدن قطعي باشقرووگه آلینگنینی معلوم قیلگن.
ایران کېچه لبناندهگی اۉت آچیشنی تۉختهتیش آرتیدن، امریکا بیلن صلح دوام اېتهدیگن مدت آخریگچه هرمز بۉغازی تجارت کېمهلری اوچون تۉلیق آچیق بۉلیشینی اعلان قیلگن اېدی.
بیراق ایران نینگ بو بیاناتیدن بیر نېچه دقیقه اۉتیب، امریکا جمهور رییسی دونالد ترامپ بۉغاز آچیلگنیگه قرهمهی، ایران بیلن تۉلیق کېلیشووگه اېریشیلگونگه قدَر دېنگیز قملی دوام اېتیشینی ایتگن.
امریکا اسلام آباددهگی مذاکرهلر موفقیتسیز یکونلنگچ، ایران بندرلریگه دېنگیز قملینی باشلهگن و بو قرار اۉتگن هفته دوشنبهدن کوچگه کیرگن.
ایران اېسه بو قملنی اقشنینگ «وعدهگه خلاف حرکتی» و «دېنگیز قراقچیلیگی» دېب بهالب، ینه هرمز بۉغازینی یاپگن.
ایران اطرافیدهگی اوروش باشلنگنیدن بېری هرمز بۉغازیدن نفت تانکرلری نینگ قتناوی کېسکین کمهیگنی گلوبل نفت نرخلریگه کوچلی تأثیر کۉرسهتیب، اولرنینگ آشیشیگه سبب بۉلگن.
