آسوشیتدپرسنینگ خبر بېریشیچه، ایکّی امریکالیک رسمي و بیر خبردار شخصگه تهیهنیب، امریکا و ایران اوروشنی توگهتیش مقصدیده ینگی مذاکرهلر اۉتکزیش مسألهسینی کۉریب چیقماقده.
اوشبو اوچ منبع نینگ آسوشیتدپرسگه بیلدیریشیچه، بو بارهدهگی محاکمهلر حلی دوام اېتماقده، بیراق واسطهچی دولتلردن بیری بۉلگن بیر دیپلومات ایکّی تامان بو مسألهده کېلیشووگه اېریشگنینی ایتگن.
خبرگه کۉره، پاکستاننینگ اسلام آباد شهری و سوئیسنینگ جنیوا شهری مذاکرهلر اۉتکزیلیشی ممکن بۉلگن جایلر صفتیده، پنجشنبه کونی اېسه احتمالي سنه صفتیده تیلگه آلینگن.
آسوشیتدپرس شونینگدېک، ایکّی پاکستانلیک رسميگه تهیهنیب، اوشبو مملکت تامانلر اۉرتهسیدهگی ینگی مذاکرهلرنی اۉتکزیش بۉییچه اۉز تکلیفینی بیلدیرگنینی یازگن.
ایران و امریکا اۉرتهسیدهگی بیرینچی باسقیچ مذاکرهلر شنبه آقشامیدن یکشنبه تانگیگچه پاکستان نینگ اسلام آباد شهریده بۉلیب اۉتگن و تخمیناً 21 ساعت دوام اېتیب، نتیجهسیز یکونلنگن.
امریکا رسميلری مذاکرهلرنینگ موفقیتسیز توگهشیگه ایراننینگ هسته دستوری بۉییچه کېلیشووگه اېریشیلمهگنی سبب بۉلگنینی بیلدیرگن. اېران رسميلری اېسه «کېلیشووگه فقط بیر نېچه قدم قالگن پیتده، آرتیقچه طلبلر، دایمي اۉزگریب بارهیاتگن مقصدلر و تهدید قیلیش» بیلن یوزلشگنلرینی ایتیشگن.
