امریکا قۉشمه ایالتلری جمهور رییسی دونالد ترامپ مملکت دېنگیز کوچلری هرمز بۉغازیگه کیریش-چیقیشنی رېجهلهیاتگن برچه کېمهلرنی نظارت قیلیش و بو حدودنی ماینلردن تازهلش ایشلرینی باشلشینی ایتدی.
او تروثسوشیال ده یازیشیچه، «هر قندهی اېرانلیک کوچ بیزگه یاکه فقرالیک کېمهلریگه اۉق اوزسه، قتّيق یۉق قیلینهدی.»
ترامپنینگ سۉزلریگه کۉره، وقت کېلیب برچه کېمهلرگه هرمز بۉغازیدن اېرکین اۉتیش امکانیتی یرهتیلهدی.
او ایراننی تنقید قیلیب، «فقط اۉزلری بیلهدیگن احتمالي ماینلر بار» دېگن وجه بیلن بو جریانگه تۉسقینلیک قیلهیاتگنینی ایتدی.
ترامپنینگ قۉشیمچه قیلیشیچه، «بو گلوبل تاولمچیلیکدیر و دولت رهبرلری، اینیقسه امریکا، هېچ قچان بوندهی باسیمگه بۉیسونمهیدی.»
شونینگدېک، او امریکا دېنگیز کوچلریگه خلق ارا سوو حدودیده ایرانگه تۉلاو قیلگن هر قندهی کېمهنی انیقلش و تۉختهتیش بۉییچه تاپشیریق بېرگنینی بیلدیردی.
اونینگ تاکیدلهشیچه: «کیم ناقانوني تۉلاو قیلسه، آچیق دېنگیزده خوفسیز حرکتلنه آلمهیدی.»
تیناوون امریکا مرکزي قوماندانلیگی (سنتکام) هم ایکّی حربي کېمه هرمز بۉغازیدن اۉتگنینی و ایران تامانیدن اۉرنهتیلگن ماینلرنی تازهلش باشلنگنینی معلوم قیلگن اېدی.
بیراق ایران یېتکرمهلر مملکت انقلابي سپاه پاسداران امریکا کېمهلرینینگ بۉغازدن اۉتگنینی رد اېتگنینی خبر قیلدی.
هرمز بۉغازی دنیادهگی اېنگ مهم خلقارا دېنگیز یۉللریدن بیری بۉلیب، گلوبل نفت سوداسی نینگ تخمیناً 20 فایزی شو یۉل آرقهلی اۉتهدی.
امریکا و ایسرایل نینگ ایرانگه قرشی اوروشی باشلنگنیدن کېین بو یۉنهلیشده کېمهلر حرکتی کېسکین کمهیگن و نتیجهده جهان نفت نرخلری آشگن اېدی.
اېران امریکا بیلن اۉت آچیشنی تۉختهتگچ، ایکّی هفته دوامیده اۉز کوچلری بیلن موافقلشتیریلگن حالده خوفسیز اۉتیشنی تأمینلشینی بیلدیرگن اېدی. اما اسلام آباددهگی مذاکرهلر موفقیتسیز توگهگچ، بو یۉل خوفسیزلیگی بارهسیدهگی خواطرلر ینه کوچهیدی.
