خلق ارا عامهوي اخبارات واسطهلرینینگ خبر بېریشیچه، لبنانگه اسرایل تامانیدن عملگه آشیریلگن کوچلی هجوملر عاقبتیده ۲۵۴کیشی جان بېرگن، ۱۱۰۰ دن آرتیق آدم اېسه جراحتلنگن.
رویترزنینگ یازیشیچه، چهارشنبه کونی ۱۹حمل توشدن کېین کمیده بېش مرته کېتمه-کېت پارتلشلر بیروت پایتختینی لرزهگه کېلتیرگن و آسمانگه قلین توتون کۉتریلگن.
شو بیلن بیرگه، اسرایل اردوسی بو اوروشدهگی اېنگ ییریک موافقلشتیریلگن هجومنی عملگه آشیرگنینی بیلدیرگن. اولر نینگ ایتیشیچه، ۱۰ دقیقه ایچیده حزب الله گه تېگیشلی ۱۰۰ دن آرتیق قوماندانلیک مرکزلری و حربي مرکزلر بیروت، دره بقاع و جَنوبي لبنانده نشانگه آلینگن.
لبنان مدنی مدافعه کوچلری معلوماتیگه کۉره، عمومي قربانلر سانی 254 کیشیگه یېتگن، ۱۱۰۰دن آرتیق آدم جراحتلنگن. اېنگ کۉپ تلفات بیروتده قید اېتیلگن، ۹۱ کیشی هلاک بۉلگن. لبنان ساغلیقنی سقلش وزیرلیگی اېسه بوتون مملکت بۉیلب ۱۸۲کیشی هلاک بۉلگنینی بیلدیریب، بو رقم حلی یکوني اېمسلیگینی ایتگن.
بو ۲مارچ بېری دوام اېتهیاتگن اوروشدهگی اېنگ قانلی کون بۉلدی. اۉشه پیتده حزب الله تهراننی قۉللب-قوّتلب، ایرانگه قیلینگن امریکا و ایسرایل هجوملریدن سۉنگ اسرایلگه قرشی اۉت آچگن اېدی. شوندن کېین اسرایل کېنگ کۉلملی هوا و قوروقلیک عملیاتینی باشلهگن.
حزب الله اۉز بیاناتیده بو هجوملرنی «وحشیانه تجاوز» دېب اتهب، جواب بېریش حقوقینی تأکیدلهگن.
بیرلشگن ملتلر تشکیلاتینینگ انسان حقوقلری مسوولی ولکر ترک صفتیده قربانلر و ویرانهگرچیلیک مقیاسینی «دهشتلی» دېب بهالهگن.
شو بیلن بیرگه، امریکا و اسرایل ایران بیلن توزیلگن ۲هفتهلیک صلح لبناننی قهمرهب آلمهسلیگینی بیلدیرگن. بیراق صلحده واسطهچی رۉلینی بجرهیاتگن پاکستان باش وزیری شهباز شریف اوّلراق بو کېلیشوو لبنان و باشقه ماجرا حدودلرینی هم اۉز ایچیگه آلیشینی ایتگن اېدی.
