رویترز آژانسینینگ خبر بېریشیچه، پاکستان اوروشنی توگهتیش بۉییچه ایکّی باسقیچلی رېجه ایشلب چیقیب، اونی امریکا و ایرانگه تقدیم اېتگن.
اوشبو ایشانچلی منبعگه کۉره، تینچلیک رېجهسینینگ بیرینچی باسقیچیده تامانلر اۉرتهسیده اۉت آچیشنی تۉختهتیش اۉرنهتیلیشی کېرهک، سۉنگره ۱۵-۲۰کون ایچیده کېنگ قمراولی کېلیشوو یکونلنیشی لازم.
رویترزنینگ معلوماتیگه کۉره، پاکستان اوردوسی قوماندانی عاصم منیر، کېچهسی دوامیده امریکا جمهور رییسی اۉرین باسری جی ونس، امریکانینگ یقین شرق بۉییچه مخصوص وکیلی استیو ویتکاف و ایران تشقی ایشلر وزیری عباس عراقچی بیلن علاقهده بۉلگن.
ایران بیر یوقاری مرتبهلی رسميسینینگ رویترگه ایتیشیچه، ایران وقتینچهلیک آتیش کېسین دایرهسیده هرمز بۉغازینی آچمهیدی و پیشنهاد کۉریب چیقیلهیاتگن پیتده قۉییلگن مدتلرنی هم قبول قیلمهیدی.
اونینگ قۉشیمچه قیلیشیچه، واشنگتن تامانیده دایمي آتیش کېسین اوچون یېترلی تیارگرلیک یۉق.
آلدینارق آکسیوس نشری امریکا، ایران و منطقوي واسطهچیلر 45 کونلیک احتمالي آتیش کېسین محاکمه قیلهیاتگنینی، بو ایکّی باسقیچلی کېلیشوونینگ بیر قِسمی بۉلیشی ممکنلیگینی خبر قیلگن اېدی.
اوروشنی تۉختهتیش بۉییچه حرکتلر کوچهیهیاتگن بیر پیتده، دونالد ترامپ اگر ایران کېلیشووگه راضی بۉلمهسه، سهشنبه کونی کۉپریکلر و برق استشنلریگه ضربه بېریلیشی ممکنلیگینی ایتیب آگاهلنتیرگن.
او شونینگدېک، دیپلوماتیک کېلیشوو بۉلمهسه و هرمز بۉغازی آچیلمسه، ایرانگه «کتّه هلاکت» کېلتیریلیشینی و مملکت «تاش عصریگه قَیتریلیشی» ممکنلیگینی تهدید قیلگن.
ایران رسميلری حاضرگچه امریکا بیلن هر قندهی مذاکرهنی همده آتیش کېسیننی قبول قیلیشنی رد اېتیب کېلماقده.
