امریکا قۉشمه ایالتلرینینگ جمهور باشلیغی دونالد ترامپ، «ینگی ایران رژیمی جمهور رییسینی، آلدینگیلریگه قرهگنده انچه کم رادیکال و انچه عقللیراق» دېب اتهگن شخص یقینده امریکادن اۉت آچیشنی تۉختهتیش سۉرهگنینی ایتگن.
ترامپ بوگون کېچقورون (چهارشنبه،۱۲ حمل) تروثسوشیال ترماغیده یازگن پُستیده امریکا بو سۉراونی فقط هرمز «آچیق، اېرکین و خوفسیز» بۉلگن تقدیردهگینه کۉریب چیقیشینی بیلدیرگن.
اونینگ قۉشیمچه قیلیشیچه «شو وقتگچه بیز ایراننی یۉق قیلیشگه یاکه، اولر ایتگنیدېک، اونی تاش دوریگه قَیتریشگه مجبور قیلهمیز.»
دونالد ترامپ بوندن اوّل هم ایراننینگ ینگی رژیمی بیلن جدّي مذاکرهلر آلیب باریلهیاتگنینی دعوا قیلگن اېدی.
بیراق ایران رسميلری امریکا بیلن هر قندهی مذاکرهلرنی رد اېتیب، فقط ایکّی تامان اۉرتهسیده واسطهچیلر آرقهلی پیاملر المشیلگنینی ایتیشگن.
ایران تشقی ایشلر وزیری عباس عراقچی سۉنگگی صحبتیده ایران اۉت آچیشنی تۉختهتیشنی قبول قیلمسلیگینی و بوتون ایران همده منطقهدهگی اوروشنی تۉلیق یکونلش همده ایرانگه یېتکزیلگن ضررلرنی قاپلشنی طلب قیلیشینی ایتگن.
