روسيه تشقی ایشلر وزیرلیگی بیر بیانات ترقهتیب، «امریکا و اسرایلنینگ ایرانگه قرشی اساسسیز تجاوزی عاقبتیده یوزهگه کېلگن حربي حرکتلرنی زودلیک بیلن تۉختهتیش»گه چقیردی.
وزیرلیک بوگون (جمعه،۲۹ حوت) نشر قیلگن بیاناتیده فارس کۉرفزیدهگی دوام اېتهیاتگن تۉقنهشوو و اونینگ کوچهییش خوفیدن جدّي خواطرده اېکنینی بیلدیردی.
روسيه تشقی ایشلر وزیرلیگینینگ قۉشیمچه قیلیشیچه، ایران و اونگه قۉشنی عرب دولتلریده انرژی و باشقه مهم انشاتلرگه یېتکزیلگن ضرر آرتیب بارماقده.
وزیرلیک شونینگدېک، روسيه چین، تورکيه و باشقه همفکر دولتلر بیلن بیرگه منطقهده اوزاق مدتلی برقرارلیکنی تأمینلش مقصدیده، برچه تامانلر منفعتلرینی حسابگه آلگن حالده، موجود کېلیشماوچیلیکلرنی سیاسي و دیپلوماتیک یۉللر آرقهلی حل اېتیشگه تیار اېکنینی معلوم قیلدی.
بیاناتده ایتیلیشیچه، روسيه دایما عرب دولتلری و ایران اۉرتهسیده تینچ-تاتوو یشش، خوفسیزلیک و یخشی قۉشنیچیلیک مناسبتلرینی تأمینلشنی قۉللب-قوّتلهیدی.
وزیرلیکنینگ تأکیدلشیچه، بیرینچی قدم امریکا و اسرایلنینگ حربي حرکتلرینی درحال تۉختهتیش بۉلیشی کېرهک.
روسيه تشقی ایشلر وزیرلیگی اۉز بیاناتیده عمان تشقی ایشلر وزیری بدرابوسعیدینینگ 18مارچ کونی ایکونومیست نشریده چاپ اېتیلگن مقالهسیگه هم اشاره قیلیب، اوندهگی تکلیفلر منطقهده برچه دولتلر منفعتلری موازنتیگه اساسلنگن خوفسیزلیک تیزیمینی یرهتیش بارهسیدهگی روسيه قرهشلریگه ماس کېلیشینی قید اېتدی.
سۉنگگی کونلرده امریکا قۉشمه ایالتلری و اسرایلنینگ ایرانگه قرشی حربي حرکتلری، خصوصاً نفت انشاتلریگه هجوملر آرتیدن کېسکینلشگن.
تورلی دولتلر نفت و انرژی انشااتلریگه هجوملرنی خوفلی و مسوولیتسیز دېب بهالب، تامانلرنی بوندهی حرکتلردن تيیلیشگه چقیرماقده.
