امریکا جمهور رییسی دونالد ترامپ، کانگرسدهگی ییللیک نطقیده ایران مسألهسینی دیپلوماتیک آرقهلی حل قیلیشنی افضل کۉریشینی ایتدی.
او ایران حکومتینی دنیادهگی تروریزمنینگ اېنگ ییریک حاميسی دېب اتهدی و هېچ قچان اونینگ هستوي قورالگه اېگه بۉلیشیگه یۉل قۉیمسلیگینی تأکیدلهدی.
ترامپ اۉزینینگ بیر آز اوّل یکونلنگن اوزاق نطقیده شونی ایتدیکی، امریکا سیاستی اۉنلب ییللر دوامیده ایراننینگ هستوي قورالگه اېگه بۉلیشیگه یۉل قۉیمسلیککه قرهتیلگن. او حاضرده ایران بیلن مذاکرهلر دوام اېتهیاتگنینی، اېرانلیکلر کېلیشوو ایستهیاتگنینی، بیراق حاضرگچه اولردن «بیزهېچ قچان هستوي قورالگه اېگه بۉلمهیمیز» دېگن گپنی اېشیتمهگنینی ایتدی.
امریکا و ایران اۉرتهسیدهگی مذاکرهلرنینگ نوبتدهگی باسقیچی اېرتهگه جنېوا شهریده اۉتکزیلیشی رېجهلشتیریلگن. ایران تشقی ایشلر وزیری عباس عراقچی تیناوون کېچقورون شوندهی بیان قیلدی: اوّلگی باسقیچده شکللنگن کېلیشوولر اساسیده، قیسقه مدت ایچیده عدالتلی و خالص کېلیشووگه اېریشیش اوچون قطعي اراده بیلن، جنېواده امریکا بیلن مذاکرهلر قَیته باشلنهدی.
او شوندهی دېدی: «بیزنینگ اساسي موضوعلریمیز و اعتقادلریمیز مطلقا روشن. ایران هېچ قندهی شرایطده هستوي قورالنی رواجلنتیریشگه اینتیلمهیدی؛ شو بیلن بیرگه، بیز ایرانلیکلر خلقیمیز منفعتلری اوچون تینچ مقصدلرده هستوي تکنالوژيدن فایدهلنیش حقوقیمیزدن هېچ قچان واز کېچمهیمیز.»
عراقچی «حاضر اۉز ارا خواطرلرنی برطرف اېتیب، عمومي منفعتلرنی تأمینلهیدیگن مثلی کۉریلمهگن کېلیشووگه اېریشیش اوچون تاریخي امکانیت موجود»، دېدی. اونینگ ایتیشیچه، کېلیشووگه اېریشیش ممکن، اما فقط دیپلوماتیک اوستوارلیک بېریلگن تقدیردهگینه.
امریکا جنوری آییدن بویان یقین شرقدهگی حربي اشتراکینی کوچهیتیردی. بو قدم، تهران و واشنگتن اۉرتهسیده مذاکرهلر کېتهیاتگنیگه قرهمهی، امریکانینگ ایرانگه هجوم قیلیشی و اوروش یوز بېریشی حقیدهگی خواطرلرنی کوچهیتیردی.
امریکا جمهور رییسی بوگونگی کېچکی نطقیده ینه تکرارلب، ایران حکومتی ناراضیلیک نمایشلری وقتیده۳۲مینگ کیشینی اۉلدیرگنینی ایتدی. شونینگدېک، او نطقی نینگ بیر قِسمیده ایران اروپا و امریکا حربی مرکزلریگه تهدید سالیشی ممکن بۉلگن راکتلرنی یرهتگنینی، حاضر اېسه امریکا حدودیگچه یېتیب بارهدیگن راکتلرنی ایشلب چیقیشگه اورینهیاتگنینی تأکیدلهدی.
