بیرلشگن ملتلر تشکیلاتی باش کاتبی آنتونیو گوترش، انسان حقوقلری بوتون دنیا بۉیلب تۉلیق مقیاسده هجوم آستیده اېکنینی ایتدی.
آنتونیو گوترش بوگون (دوشنبه، ۴ حوت) بیرلشگن ملتلر تشکیلاتی انسان حقوقلری کېنگشی نینگ 61-ییغینی آچیلیشیده سۉزلب، انسان حقوقلریگه هجوم آچیقچهسیگه، همه نینگ کۉز اۉنگیده و کۉپینچه اېنگ کتّه حاکمیت اېگهلری تامانیدن عملگه آشیریلهیاتگنینی تأکیدلهدی.
بیرلشگن ملتلر تشکیلاتی باش کاتبینینگ قۉشیمچه قیلیشیچه، «بوتون دنیا بۉیلب انسان حقوقلری اتهیلب، استراتیژیک طرزده و بعضاً حتی فخر بیلن آرتگه سوریلماقده».
او انسان حقوقلریگه هجوم عاقبتلری حقیده آگاهلنتیریب، شوندهی دېدی: انسان حقوقلری قولهگنیده همه نرسه یېمیریلهدی- تینچلیک، ترقیات، اجتماعي بیردملیک، ایشانچ و همجهتلیک.
آنتونیو گوترشنینگ ایتیشیچه، عیناً شو سببلی انسان حقوقلری کېنگشینینگ واسطهلری- مخصوص معروضهچیلر، مخصوص میکانیزملر، تېرگاو میکانیزملری و عموم جهان دَوري کۉریب چیقیش تیزیمی حیاتي اهمیتگه اېگه.
او، شونینگدېک، حاضر هر قچانگیدن هم کۉره ژئوپولیتیکی علاقهلر انسان حقوقلرینی همه جایده مستحکملش یۉلیگه ایلنیشی مهملیگینی ایتدی.
باش کاتب دنیادهگی تورلی ماجرالرگه اشاره قیلیب، بیز کېنگ کۉلملی انساني عذاب-عقوبتلر آقلنهیاتگن بیر دنیاده یشهیاتگنیمیزنی بیلدیردی.
او «آدملر سودالشوو واسطهسیگه اَیلنماقده، خلق ارا حقوق اېسه شونچهکه بیر بېزاوتهلیک صفتیده کۉریلماقده. ماجرالر کۉپهیماقده و جزاسیزلیک یوقوملی کسللیککه ایلنیب بارماقده» دېدی.
بو حالت بیلیم، واسطه یاکه انستیتوتلر یېتیشمسلیگیدن اېمس، بلکه سیاسي تنلاولر نتیجهسیدیر. «انسان حقوقلریگه بېفرقلیک بحرانی یالغیز حالده موجود اېمس، بلکه باشقه برچه گوبل بۉلینیشلرنی عکس اېتتیرهدی و کوچهیتیرهدی»، دېدی او.
اونینگ سۉزلریگه کۉره، انسان حقوقلریگه هجوم و بېفرقلیک ایلگری هم ضعیف بۉلگن گروهلر نینگ ینهده چېتگه سوریلیشیگه آلیب کېلهدی.
گوترش شوندهی دېدی: «انسان حقوقلری فقط یخشی کونلر اوچون شعار اېمس، بلکه برچه زمانلر اوچون مجبوريت دیر. شو نینگ اوچون بیز اولر اوچون توریشیمیز کېرهک- حتا بو قیین، ناقولهی یاکه قیمتگه توشسه هم»
بیرلشگن ملتلر تشکیلاتی باش کاتبی عمومي انساني اساسلرنی حمایه قیلیش، انسان حقوقلری انستیتوتلرینی مستحکملش و انسان حقلرینینگ کوچینی آچیب بېریش اوچون زودلیک بیلن چارهلر کۉریشگه چقیردی.
او، انسان حقوقلری حرمت قیلینگنده، آدملر اېرکینراق یشهیدی، اقتصادیات عدالتلیراق رواجلنهدی و تینچلیک همده برقرارلیک قرار تاپهدی دېیه تاکیدلهدی.
شونینگدېک، گوترش دنیا مملکتلرینی انسان حقوقلرینینگ سیاسي منفعتپرهستلیک و ژئوپولیتیکی رقابت اوچون قبول قیلینگن نرخگه ایلنیشیگه یۉل قۉیمسلیککه چقیردی همده کوچ قانوننی قَیته یازهدیگن، ضعیفلر حقوقسیز، قدرتلیلر اېسه چېکلاوسیز بۉلهدیگن ترتیب پیدا بۉلیشیگه یۉل قۉیمسلیک ضرورلیگینی ایتدی.
