امریکا جمهور رئیسی اۉرین باسری جیدی ونسنینگ ایتیشیچه، ایراننینگ اساسي قرار قبول قیلووچیسی بو مملکت رهبری بۉلیب، جمهور رییسنینگ رۉلی اصلیده اونچهلیک مهم اېمس.
او تیناوون (چهارشنبه،۱۵ دلو) « سیروس ایکس ام» ترماغیدهگی مگان کلی بیلن صحبتده، ایران تشقی ایشلر وزیری عباس عراقچی مملکت رهبری بیلن گپلشهیاتگن و اولر بیلن علاقهده بۉلگن شخصدېک کۉرینهدی دېدی.
امریکا جمهور رئیس اۉرین باسرینینگ قۉشیمچه قیلیشیچه، «اما مملکت مسوولیتی بۉلگن شخص بیلن گپلشالمهسنگیز، بوندهی مملکت بیلن دیپلوماتيک جوده غلطی و قیین بۉلهدی.»
او شونینگدېک، دونالد ترامپ تیلفوننی آلیب، روسيه جمهور رییسی ولادیمیر پوتین، چین جمهور رییسی شی جین پینگ و امریکا بیلن جوده ضدیتلی علاقهگه اېگه بۉلگن باشقه مملکتلر بیلن گپلشیشی و مذاکره آلیب باریشی ممکن دېب ایتگن.
جیدی ونسنینگ قۉشیمچه قیلیشیچه «اما غلطی تامانی شوندهکی، بیز ایراننینگ حقیقي رهبری بیلن گپلشه آلمهیمیز. بو اېسه دیپلوماتيکنی جوده قیینلشتیرهدی.»
اونینگ ایتیشیچه، دونالد ترامپ ایران بیلن کورهشیشده برچه امکانیتلرگه اېگه، لېکن اوّلا صحبت و تینچ یۉللر آرقهلی حرکت قیلماقچی، اگر نتیجه بۉلمهسه، احتمال حربي وریانتنی هم کۉریب چیقهدی.
امریکا جمهور رئیسی اۉرین باسری شونینگدېک، اگر ایران هسته قورالیگه اېگه بۉلسه، بوتون منطقه دولتلری شونگه اینتیلیشینی و منطقهده هستوي قوراللنیش پایگهسی باشلنیشینی ایتگن.
بو بیاناتلر شوندهی پیتده بیلدیریلهدیکه اېرتهگه ایران و امریکا عمان پایتختیده ایراننینگ هسته دستوری یوزهسیدن مذاکره اۉتکزیشی کوتیلماقده.
ایکّی مملکت اۉرتهسیدهگی علاقهلر ایران ایچیدهگی نمایشلرنی باستیریش آرتیدن ترنگلشگن و حربي تۉقنهشوو احتمالینی آشیرگن اېدی.
شو بیلن بیرگه، منطقه دولتلرینینگ سعی-حرکتلری نتیجهسیده ایکّی مملکت اۉرتهسیدهگی مذاکرهلر قَیته باشلنهدی و اولرنینگ نمایندهلری ینه مذاکره چوکیسیگه اۉتیرهدی.
